УИХ-ын гишүүн Б.Энхбаяраар ахлуулсан Хянан шалгах түр хороо "Хөгжлийн банкны" гэх сонсголыг зохион байгуулж, багагүй "НУУЦ"-ыг ил болгосон билээ.
Тус сонсголоор парламентын танхимд хэн нь хэн бэ, хэдийг авсан бэ, төлсөн үү, төлөөгүй бол яагаад, зээл авахад хэн нөлөөлсөн, хэн хамаатай, авсан зээлээ зориулалтын дагуу ашигласан эсэх гээд олон зээлдэгчийн багийг хуулж, олон нийтэд мэдээлэл өгч, зармынх нь зээлийг төлүүлж чадав. Тэгвэл нөгөө нэг "ДУУЛИАН" болох "НҮҮРСНИЙ" гэх хэргийн сонсгол өнгөрсөн дөрөвдүгээр сарын 10-12-ны хооронд болох байв.
Гэвч УИХ-ын гишүүн Г.Ганболдоор ахлуулсан Хянан шалгах түр хорооноос "АТГ-аас УИХ-ын Хянан шалгалтын тухай хуульд зааснаар Түр хорооны үйл ажиллагаа болон эрх бүхий бусад байгууллагын хэрэг маргаан хянан шийдвэрлэх үйл ажиллагаанд саад учруулах, хөндлөнгөөс оролцохыг хориглоно" гэсэн заалтыг зөрчиж байгаа тул сонсголыг хойшлуулж буй талаараа мэдээлсэн байдаг.
Уг нь Нүүрсний хэргийг хянан шалгах түр хороо өнгөрсөн хугацаанд нүүрсний хулгайн хэрэгтэй холбоотой 20 мянга гаруй хуудас нотлох баримтуудыг холбогдох байгууллагуудаас авч, шинжлэн судалсан. Нээлттэй сонсголд гэрчээр дуудах 114 хүний нэр ч бэлэн болоод байлаа.
Нүүрсний хэрэг бол хамрах хүрээ, хохирлын хувьд Хөгжлийн банкны зээлүүдээс хэд дахин том хулгай. Тиймдээ ч нүүрсний хулгайн хэргийн сонсголоос ч Хөгжлийн банкных шиг үр дүнг олон нийт хүлээж байсан нь ойлгомжтой. Энэ хэрээр нөгөө талд нүүрсчид “айж” байсан нь тодорхой. Тэгэхээр энэ удаагийн сонсгол хойшилсон нь нүүрснийхэнтэй ч холбоотой байж магадгүй
Өнгөрсөн оны зургадугаар сарын 10-нд байгуулагдсан 13 гишүүний бүрэлдэхүүнтэй түр хороог УИХ-ын гишүүн Г.Ганболд ахалж буй бөгөөд бүрэлдэхүүнд УИХ-ын гишүүн Ц.Анандбазар, Б.Баттөмөр, Л.Мөнхбаатар, Г.Мөнхцэцэг, Н.Наранбаатар, Т.Энхтүвшин, С.Бямбацогт, С.Одонтуяа, Б.Бейсен, С.Ганбаатар, Н.Ганибал, Т.Доржханд нар багтаж байна.
Like
0
Зөв
0
1
Буруу
0
Воов
0
Уйтгартай
0
Дуртай
© 2013-2021
