Монгол Улсын Филармонийн Морин хуурын чуулга анх удаагаа Австралийн Холбооны Улсын Сиднейн дуурийн театрт “Монголын сайхан орон” бүрэн хэмжээний тоглолтоо анх удаа толилуулжээ.
Сиднейн Дуурийн театр нь ЮНЕСКО-гийн Дэлхийн өвийн жагсаалтад бүртгэгдсэн, орчин үеийн Австрали Улсын бэлгэ тэмдэг болсон архитектурын хосгүй бүтээл бөгөөд ногоон тивийн хамгийн алдартай, хамгийн хөл хөдөлгөөн ихтэй урлаг соёлын төв бөгөөд жилд 11 сая гаруй зочин хүлээн авч, 1,800 гаруй арга хэмжээг зохион байгуулдаг байна.
“Монголын сайхан орон” тоглолтод Монгол Улсын Хөдөлмөрийн баатар, Ардын жүжигчин, Төрийн хошой шагналт, хөгжмийн зохиолч Н.Жанцанноров, Монгол Улсын Хөдөлмөрийн баатар, Чингис хаан одонт, Төрийн шагналт, Урлагийн гавьяат зүтгэлтэн, хөгжмийн зохиолч Б.Шарав нарын бүтээлүүд Монгол Улсын Урлагийн гавьяат зүтгэлтэн Д.Түвшинсайхан удирдаачаар удирдуулан эгшиглэсэн байна.
Морин хуурын чуулга Сиднейн Дуурийн театрын тайзнаа өөрийн урын сангаасаа үндэсний, ардын болон сонгодог төрлийн 20 гаруй бүтээлийг толилуулсан нь үзэгч олны талархлыг хүлээсэн бөгөөд тус театрт тоглосон Монголын анхны уран бүтээлчид болж байгаа аж.
Мөн тоглолтод Улсын Дуурь, бүжгийн эрдмийн театрын гоцлол дуучин МУГЖ Б.Гомбо-Очир, дуурийн гоцлол дуучин МУГЖ Ө.Уянга нар оролцжээ.
Тоглолтыг Австралийн төр, засгийн байгууллага, бизнесийн төлөөлөл, гадаад улсаас Австралийн Холбооны Улсад суугаа Дипломат төлөөлөгчийн газрын тэргүүн нар, тус улсад оршин суугаа монгол иргэдийн холбоод, төрийн бус байгууллагын төлөөлөл зэрэг 2,200 гаруй хүн үзэж сонирхсон байна.
Like
0
Зөв
0
0
Буруу
0
Воов
0
Уйтгартай
1
Дуртай
© 2013-2023. Вэб сайт бүтээсэн: Tsast Solution LLC
