Зам, тээврийн хөгжлийн Сайдын өгсөн үүрэг даалгаврын дагуу Төрийн нарийн бичгийн даргын баталсан удирдамжийн хүрээнд ажлын хэсэг байгуулагдаж Зам, тээврийн хөгжлийн яамны Салбарын хяналтын газар, “Зам, тээврийн хөгжлийн төв” ТӨҮГ, ЦЕГ-ын “Тээврийн Цагдаагийн Алба”, “Автотээврийн Үндэсний Төв” ТӨҮГ болон холбогдох албаны хүмүүс ажилалаа.

Өвөрхангай аймгийн Нарийнтээл сумын нутагт орших Баянтээгийн уурхайгаас Орхон аймгийн чиглэлд эрчим хүчний нүүрсийг даац хэтрүүлэн тээвэрлэж байгааг газар дээр нь үзэж танилцан авто замын хучилт, гүүрийг эвдэн, байгаль орчинд сөрөг нөлөөлөл үзүүлж байгааг таслан зогсоох, Улсын чанартай авто замын ашиглалтын бэлэн байдлыг хангуулж, хяналт тавих механизмыг бүрдүүлэх, холбогдох байгууллагуудтай хамтран ажиллах ажлын хэсэг гарч ажиллав.
Хяналт шалгалтын хүрээнд илэрсэн зөрчилд Улсын ахлах байцаагчийн албан шаардлагыг хүргүүлсэн бөгөөд Улсын чанартай хатуу хучилттай авто замаар ачаа даац хэтрүүлсэн тээврийн хэрэгсэлийн үйл ажиллагааг шууд зогсоож байгааг онцоллоо. Дээрх ажлын хүрээнд Өвөрхангай аймгийн Засаг дарга болон албаны хүмүүстэй уулзалдаж холбогдох хууль тогтоомж, стандартыг мөрдөх чиглэлээр тус яамнаас баримталж буй бодлогын талаар танилцуулж мөн санал солилцон тээвэрлэлтийн үйл ажиллагаа, авто замын ашиглалтын байдалд хяналт тавих талаар нэгдсэн ойлголтод хүрч ажилласан байна. Мөн Зөрчлийн тухай хуулийн дагуу торгуулийн арга хэмжээ авахын зэрэгцээ хамгийн эхний хяналт шалгалт хийгдсэн цэгээс ачаа үүссэн цэгт буцааж, гаргасан зөрчлийг арилгуулах, илүү ачсан ачааг буулгуулах, хөдөлгөөнийг цааш үргэлжлүүлэхийг хориглох зэрэг арга хэмжээ авч байгаа тул эхлэлийн цэгээс стандартын шаардлагад нийцүүлэн ачаа тээвэрлэх арга хэмжээ авахыг аж ахуйн нэгж, байгууллагуудад анхааруулж байна. 
Цаашид дээрх стандартын шаардлага баримтлаагүйгээс үүдэн тээвэрлэлт саатсан хариуцлагыг тухайн аж ахуйн нэгж, хувь хүн өөрсдөө хариуцаж, авто зам, замын байгууламжид үүссэн хохирлыг холбогдох хуулийн дагуу буруутай этгээд барагдуулах болохыг мэдэгдээд байна.

Манай улсад мөрдөгдөж буй “Автотээврийн хэрэгслийн техникийн байдалд тавих ерөнхий шаардлага” MNS 4598:2020 стандартаар нэг тэнхлэг дээрх жин 11тонн, нийт жин 44 тонн. 

Тус стандартыг аль ч улиралд мөрдөн ажиллах бөгөөд авто зам хэрэглэгчдийн дунд хавар газар гэсэх, намар газар хөлдөх үед тус стандартыг мөрдөж ажиллах бусад тохиолдолд стандартыг баримтлах шаардлагагүй гэсэн буруу ойлголттой байна. 
Өвлийн улиралд газар хөлдөж хөшүүн чанартай болсон үед хүнд даацын тээврийн хэрэгслээр зорчиход деформаци үүсэж замын зорчих хэсэгт хагарал, овойлт үүсдэг. Хавар газар гэсэх үед газрын хөрс хэв гажилтанд орж  хүнд даацын тээврийн хэрэгслээр зорчиход замын зорчих хэсгийн хагарал нэмэгдэж, суулт өгч томоохон хэмжээний нүхэн эвдрэлүүд ихээр үүсдэг байна.
Монгол улсад тавигддаг үзүүлэлт нь эдгээр улс орны үзүүлэлттэй ойролцоо байгаа нь манай улсад  тавигддаг хэмжээ нь олон улсын шаардлагад нийцэж байгааг нотолж байна.
Түүнчлэн иргэн, аж ахуй нэгж, байгууллагууд улсын чанартай автозамаар том оврын ачааны автомашинаар тээвэрлэлт хийхдээ дараах зөрчил дутагдлыг мөн гаргаж байна. Үүнд.
• Тээврийн хэрэгслийн гадна талын гэрэлтүүлэх хэрэгсэл бүрэн бус;
• Тээврийн хэрэгслийн улсын дугаар бүдгэрсэн, арилсан, гээгдүүлсэн; 
• Тээврийн хэрэгслийн оврын хэмжээг илтгэсэн хажуу болон арын хэсэгт туузан наалт байрлуулаагүй;
• Тээвэрлэлт хийх үедээ зохиулалтын бүтээлэггүй;
• Эмийн сан, гал унтраагуур, ослын зогсолтын тэмдэг, хол, ойрын болон оврын гэрлийн нөөц чийдэн байхгүй; 
зэрэг зөрчил дутагдлууд илэрч байна. 
Тус төлөвлөгөөт бус шалгалтыг тогтмол хийж, хэрэгжүүлж эхэлсэнтэй холбогдуулан иргэд, аж ахуй нэгж, байгууллагууд хуулийн хүрээнд тээвэрлэлт хийхийг анхааруулж байна. 
"Том оврын даац хэтрүүлсэн авто машин зорчих нь авто замд нүхэн эвдрэл, овоолт суулт үүсгэн авто замын насжилтад сөргөөр нөлөөлсөөр байна. Үүнээс үүдэн авто замын осол аваар гарч, иргэдийн амь нас, эрүүл мэнд, эд хөрөнгө ихээр хохирох, аюулгүй байдал алдагдах эрсдэл бий болсоор байна.