Спорт хүнийг хатуужилтай болгодог. Тийм ч учраас эцэг эхчүүд бага насны хүүхдээ аль болох спортоор түлхүү хичээллүүлэхийг зорьдог гэж хэлж болно. Спортоор хичээллэсэн хүн, хэн хүний бие бялдраас ялгарах олон тал байдаг.  Тэгвэл манай улсад энэ байдал сүүлийн хэдэн жил спортын салбарт утгаа алдаж ирлээ. Спортын салбараар овоглодог хэд нь салбарынхаа нэрийг “баастай” хутгаж гарсан. 

Тухайлбал, спортын салбарт хүчин зүтгэж буй гавьяатууд нь ээлж дараалалтайгаар бүлэглэн зодоон цохион хийж иргэдийн дунд эзлэх байр сууриа хумьж байна. Магадгүй тэд “аавын хаалгыг татаж” ухаан суух юм шиг. 

Ард түмний хайртай хүү, аав ээжийн элбэрэлт хүүгийн царай гаргаж, тив дэлхийд Монголынхоо тугийг мандуулж явсан эрхмүүд "хар устай толгой холбож" хэдэн жилийн нөр их хөдөлмөрөө ганцхан цагийн дотор салхинд хийсгэж ирлээ. Түүний нэгээр та биднийг нэг үе баярлуулж, овог мэт өмнөө барьж байсан жүдо бөхийн тамирчин Н.Түвшинбаяр билээ. Тэрбээр журмын анд, хар багийн анд, найз нөхөр болох Улсын өсөх идэр начин Э.Энхбатыг сэхээнд ортол зодож амь насанд нь хохирол учруулангаа алдсан билээ. Бантсан хүн балайрна гэгчээр өөрөө мөн адил бэртсэн гэж хөл, гараа хээ нэггүй боож, хэд хэдэн газар төлбөртэй мэдээ бичүүлж байхад багийн анд нь үхэл амьдралтай тэмцэж байсанг хэн хүнгүй мэднэ. Гэвч муу юм модон улаантай гэгчээр Н.Түвшинбаяр андынхаа араас санаа зовж суудаггүй юм гэхэд, чимээгүй тансаглаж чадалгүй эхнэрт нь баригдаж, хэр нударгагүй хүн гэдгээ дахин баталсан.

Сайн ах нарын хөшигний ард том хүн байж ирсний нэгэн жишээ бол Н.Түвшинбаярын ард Монгол улсын ерөнхийлөгч асан Х.Баттулга байж ирсэн. Учир нь тэд нэг холбоонд харьяалагдаж, хамт бэлтгэл хийж ирсэн хуурай ах дүүс гэлцдэг. Үүнтэй хэн нэгэн маргахгүй байх.

Н.Түвшинбаярын ээлжит "хүүхэнг" экс ерөнхийлөгч Х.Баттулга зохицуулж явдаг гэх яриа олны дунд гарсан байдаг. Олны үг ортой байх магадлалтай. Тэрбээр цаг ямагт хэрэгт холбогдох болгонд хөшигний ард байх ах руугаа хэлдэг байсанг олон хүн нотлох байх.

Магад эр хүний цээжинд эмээлтэй, хазаартай морь багтдаг гэгчээр тэрбээр нэр цэвэр байх үедээ “Саарал ордонд” шунаж байсан. Гэвч сархдад толгойгоо мэдүүлээгүй бол “СААРАЛ ОРДОНД” байх боломж түүнд байсан. Учир нь тэрбээр ард түмний дунд баатрын дүрд нэг үе тоглож байсан. Харин анд нөхрөө сэхээнд ортол дэвссэн ч 30 хоног цагдан баривчлагдсанаас өөр ямар ч арга хэмжээ эдлээгүй юм.

Түүгээр ч зогсохгүй Н.Түвшинбаяр МҮОХ-ны ерөнхийлөгчийн тамгаа авч зугтаж, имэйл хаяг хуурамчаар үйлдсэн нь газар дээрээ баригдаад өөрөө тамгаа хүлээлгэн өгсөн. Харин одоо хаана, ямар тансаглал  эдэлж буйг хэн ч мэдэхгүй байгаа. Н.Түвшинбаяр өвсөнд хаясан зүү шиг хийсэн нүглээ наминчлан чимээгүй суугаа болов уу? Эсвэл дараагийн хороо найруулах гэж толгойгоо гашилган, нойргүй хонож байгаа болов уу?

Төрийн дээд одонг хүртсэн, улсаасаа авч болох бүх зүйлийг сайн ахынхаа буянд эдэлж, хэрэглэж яваа тэрбээр үхэл амьдралын заагт аваачсан Улсын өсөх идэр начин Э.Энхбатыг санан дурсдаг болов уу? Найдангийн Түвшинбаярт үхэл амьдралын заагт иртлээ зодуулсан Э.Энхбат өнөөдөр ямар байгааг зодсон Хөдөлмөрийн баатар бүү хэл, гудамжинд яваа нохой хүртэл сонирхохоо болсон байна.

Нэг хүний амьдрал, нэг хүний гал голомт тасрах дээрээ тулж байгаа билээ. Э.Энхбат начин өнөөдөр БНСУ-д эмчлэгдэж байгаа хэдий ч  эрүүл саруул хүн шиг амьдрах нь таамаг төдий байна. Итгэж явсан найздаа ийм болтлоо зодуулна гэж  начин зүүдлээгүй явсан байх. Гэргий н.Нандинцэцэг нь өөрийн цахим хуудсаараа дамжуулан Н.Түвшинбаяр миний нөхрийн эмнэлгийн төлбөрийг бүү хэл, бие нь яаж байна гэж нэг ч удаа залгаж асууж байгаагүй гэж хэлсэн.

Амьдрал гэдэг хатуу ч энэ өрх айлд дэндүү чанга хандаж байна. Харин үйлийн үрийг үүрэх ёстой нэгэн нь хэний ч мэдэхгүй газар өнгөт орчлонг хараад явж байгаа болов уу?