Гадаад харилцааны сайд Б.Батцэцэг БНХАУ-ын Гадаад хэргийн сайд Ван И-гийн урилгаар өчигдөр тус улсад албан ёсны айлчлал хийлээ.
Хоёр улсын Гадаад харилцааны сайд нар худалдааны эргэлтийг 10 тэрбум ам.долларт хүргэх, байгалийн хий нийлүүлэх хоолойг Монгол Улсын нутгаар дамжуулах төслийн ТЭЗҮ-ийг боловсруулах ажлыг урагшлуулахад дэмжлэг үзүүлэх, монгол оюутнуудыг БНХАУ-д танхимаар хичээллэх боломжоор хангах зэргийн талаар ярилцсан байна.
Мөн Ковид-19 цар тахлын эсрэг хамтын ажиллагааг улам бүр идэвхжүүлэхээр хоёр тал санал нэгдэж, “Цар тахалтай тэмцэх хамтын ажиллагааг бэхжүүлэх тухай хамтарсан мэдэгдэл”-ийг гаргасан юм.
Түүнчлэн Ерөнхийлөгч У.Хүрэлсүх, БНХАУ-ын дарга Ши Жиньпин нарын 7 дугаар сарын 16-ны өдөр утсаар ярилцахдаа хүрсэн олон чухал тохиролцоог ажил хэрэг болгох үүднээс нягт хамтран ажиллахаар санал нэгдсэн байна.
Ялангуяа хилийн боомтуудаар бараа, бүтээгдэхүүний тээвэрлэлтийг нэмэгдүүлэх, урт хугацааны нүүрс худалдан авах гэрээг арилжааны зарчмаар байгуулах, тээвэрлэлтийн шинэлэг хэлбэрийг судлан хэрэгжүүлэх замаар Монголоос нийлүүлэх нүүрсний экспортыг нэмэгдүүлэхээр тохиролцжээ.
Түүнчлэн хөдөө аж ахуйн бүтээгдэхүүний экспортыг нэмэгдүүлэх, баруун бүсээс мах экспортлохыг сэргээх явцыг түргэтгэхэд хамтран ажиллахаар тохиролцсон нь Монгол Улсын уул уурхайн бус экспортыг нэмэгдүүлэх, хоёр улсын худалдааны эргэлтийг 10 тэрбум ам.долларт хүргэх зорилтод хүрэхэд чухал нөлөө үзүүлэх юм.
Мөн цөлжилт, шороон шуургатай тэмцэх чиглэлээр хамтарсан төсөл хэрэгжүүлэхээр болсон байна.
Ийнхүү хоёр улсын төрийн тэргүүн нарын утсаар ярилцсан олон ажлыг Гадаад харилцааны сайдын түвшинд дахин ярилцаж, тохиролцоонд хүрлээ.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
