ЮВУУХҮҮГИЙН АЛТАЙХҮҮ
(1961-2023)
Монгол Улсын Тэргүүний барилгачин, Хөдөлмөрийн гавьяат Ювуухүүгийн Алтайхүү 2023 оны 3 дугаар сарын 31-ний өдөр өвчний улмаас мөнх бусыг үзүүлсэнд гэр бүл, үр хүүхэд, төрөл төрөгсдөд нь гүн эмгэнэл илэрхийлье.
Ю.Алтайхүү нь 1961 оны 11-р сарын 05-ны өдөр Улаанбаатар хотод Ювуухүүгийн отгон хүүхэд болон мэндэлсэн. Бага насаа гэрийн хүмүүжлээр хүмүүжин, 1969-1979 онд 45 болон 24 дүгээр дунд сургуулиудад суралцан төгсөж, 1979-1983 онд Политехникийн дээд сургуулийг Барилгын инженер мэргэжлээр төгссөн. Улмаар ХАА-н барилгын зургийн институтээс хөдөлмөрийн гараагаа эхлүүлэн 1985-1990 онд ажиллаж, 1990-1992 онд МҮЭ-ийн Төв зөвлөлд рашаан сувиллын зургийн хяналтын инженер, орлогч даргаар ажилласан. 1992 онд барилга, газрын тосны чиглэлээр “Чандмань” ХХК-ийг үүсгэн байгуулж, 2005 онд “Чандмань бар” ХХК болгон өөрчлөн 30 гаруй жилийн турш удирдан, Монгол Улсын барилгын салбарын хөгжил дэвшилд бодитой хувь нэмэр оруулж ирсэн.
Тэрээр Монгол Улсын баруун хязгаараас зүүн хил хүртэл өргөн уудам газар нутагт дэд бүтэц, инженерийн шугам сүлжээ, барилгын ажлуудыг удирдан гүйцэтгэж байснаас дурдвал, 1000 гаруй барилгын зураг төслийг боловсруулж, 140 гаруй төрлийн зам, талбайн ажил, 200 гаруй нефть хангамжийн бааз болон шатахуун түгээх станцын барилга угсралтын ажил, орон сууцны болон үйлдвэрлэл үйлчилгээний зориулалттай барилга угсралтын ажил, нарны цахилгаан станц барих зэрэг ажлуудыг удирдаж гүйцэтгэсэн.
Түүнчлэн, нийгмийн хариуцлагын хүрээнд өндөр ач холбогдолтой ажлууд болон эко төслүүдийг тогтмол хэрэгжүүлж ирсэн билээ. Тухайлбал, Улаанбаатар хотын Төв цэвэрлэх байгууламжид олон жил хуримтлагдсан 900 мянга гаруй м3 хур лагийг үнэргүйжүүлэн хоргүйжүүлж, боловсруулах ажлыг гүйцэтгэсэн нь нийслэл хотын иргэд болон байгальд нэн хэрэгцээтэй, ач тустай ажил байв. Эдгээр ажлуудыг Засгийн газар, төр ба хувийн хэвшлүүдийн итгэлийг хүлээн, гүйцэтгэсэн нь салбарынхаа манлайлагч байсныг илтгэх аж. Мөн зөвхөн сүүлийн 3 жилд гэхэд 1 тэрбум гаруй төгрөгийн татварыг улсын төсөвт төлж, олон зуун хүнийг ажлын байраар ханган, хөдөлмөрч хамт олныг бүтээжээ.
Тэрээр ажиллаж, хөдөлмөрлөхийн зэрэгцээ өөрийгөө тогтмол хөгжүүлж ирсэн ба 2011 онд Их Британи, Умард Ирландын Нэгдсэн Хаант Улсад, 2018 онд Япон улсын Токио хотод мэргэжил дээшлүүлэн, туршлага судлан ажиллаж, шинэлэг инновацилаг техник тоног төхөөрөмж, мэдлэгийг Монголд нутагшуулж ирсэн.
Ю.Алтайхүүгийн хөдөлмөр зүтгэлийг төр засгаас өндрөөр үнэлж Тэргүүний барилгачин хүндэт тэмдэг, Газрын тосны тэргүүний ажилтан хүндэт тэмдэг, Хөдөлмөрийн хүндэт медаль, Алтангадас одон, Хөдөлмөрийн гавьяаны улаан тугийн одонгоор тус тус шагнасан.
Бурхан болооч нь амьдралынхаа туршид халамжит хань, сайн аав, хайрт өвөө, зарчимч, хүнлэг, бусдад тустай, сайн удирдагч байв. Явсан газар бүртээ инээд хөөр, итгэл найдвар бэлэглэж, урам зоригоор тэтгэсэн, ажилч хөдөлмөрч хүн байлаа.
Таны ажилч хичээнгүй, шулуун шударга, төлөв даруу зан чанар, эх оронч, хүнлэг сайхан сэтгэл бид бүхний сэтгэлд үүрд мөнх дурсагдах болно.
Ум мани бад мэ хум
БАРИЛГЫН ХӨГЖЛИЙН ТӨВ" ТӨҮГ-ЫН УДИРДЛАГА, ХАМТ ОЛОН
Like
0
Зөв
0
0
Буруу
0
Воов
0
Уйтгартай
0
Дуртай
Үндсэн хуулийн өдөрт зориулсан үндэсний бөхийн барилдаанд улсын арслан Ц.Бямба-Отгон түрүүллээ
© 2013-2023. Вэб сайт бүтээсэн: Tsast Solution LLC
