Азийн Социал демократ намуудын сүлжээ, Фридрих Эбертийн сан хамтран энэ сарын 20-23-ны хооронд Улаанбаатар хотноо "Эмэгтэйчүүдийн нийгэм, улстөрийн оролцоо" сэдэвт олон улсын сургалтыг зохион байгуулж байна. Тус сургалтад 10 гаруй улсын 30 орчим эмэгтэй хамрагдаж байгаа юм.

     Азийн улстөрийн сүлжээ нь дэвшилтэд үзэл санаа, бодлогоо чөлөөтэй солилцох, нийгмийн ардчилсан намуудыг дэмжих, хамтран ажиллах платформ бүхий социал демократ болон дэвшилтэт улстөрийн намуудын бүс нутгийн сүлжээ аж. Энэ сүлжээ нь 2009 онд байгуулагдсан бөгөөд өнөөдрийн байдлаар 10 улс орны 14 намыг нэгтгэсэн дэвшилтэт намуудын хамгийн том нэгдэл юм байна. 

2009 онд тус сүлжээг байгуулахад МАН-аас томоохон хувь нэмэр оруулсан бөгөөд өнөөг хүртэл Соцдемийн үйл ажиллагаанд идэвхтэй оролцож, 2020 оноос УЗ-д МАН-ыг төлөөлж Гадаад харилцааны хэлтсийн дарга М.Цэлмүүн ажиллаж байна.

МАН-ын Гадаад харилцаа хариуцсан нарийн бичгийн дарга О.Батнайрамдал: Эрэгтэй, эмэгтэй хүмүүсийн дээд боловсролын зөрүү 17 орчим хувьтай байна

-МАН-ын хувьд дэвшилтэт бодлогынхоо хүрээнд өнөөдрийн сургалтыг хамтран зохион байгуулж байна. Энэхүү сургалт нь УИХ-аар "Пропорциональ намын жагсаалт болон эмэгтэйчүүдийн улстөрийн оролцоо"-г ярьж буй энэ үед болж буйгаараа өндөр ач холбогдолтой. Энэтхэг, Непаль, Малайз, Индонези, Шинэ Зеланд зэрэг Ази, номхон далайн орны Социал демократ үзэл баримтлалтай намуудын төлөөлөл чуулж, улс төр дэх эмэгтэйчүүдийн оролцоо ямар байгааг хоёр өдрийн турш хэлэлцэхээр төлөвлөөд байна.

         Судалгаанаас харахад, сүүлийн 15 жилийн хугацаанд эрэгтэй, эмэгтэй хүмүүсийн дээд боловсролын зөрүүг 17 орчим хувь буюу эмэгтэйчүүд боловсролын төвшин илүү өндөр байгаа юм. Цаашид эдийн засгийн талаас нь харсан ч тэр, МАН-ын Социал демократ үзэл баримтлал, тэр дундаа хүний эрхийн үзэл баримтлалаас авч үзсэн ч тэр, шийдвэр гаргах төвшин дэх эмэгтэйчүүдийн оролцоог олон улсын төвшинд хүргэх ёстой гэж үзэж байгаа.

Швейдийн Социал демократ намын гишүүн, Гадаад харилцааны сайд асан Ann Liunda: ҮХНӨ болон бусад хуулиуд маш дэвшилттэй харагдаж байгааг онцолмоор байна

-Би сүүлийн долоон жилийн хугацаанд Худалдаа болон Гадаад харилцааны сайдаар ажилласан. Ингэхдээ Монгол Улстай маш ойр харилцаатай байж ирсэн бөгөөд энэ хүрээнд Гадаад харилцааны сайд Б.Батцэцэгийг маш сайн мэднэ. Тэр Гадаад харилцааны эмэгтэй сайд нарын сүлжээн дэх чухал гишүүдийн нэг. 

          Миний хувьд Швейдийн Социал демократ намын гишүүн бөгөөд манай нам нь МАН-тай олон арван жил хамтран ажиллаж ирсэн түүхтэй. Өнөөдөр явагдаж буй эмэгтэйчүүдийн оролцоог улстөрийн төвшинд нэмэгдүүлэх мөн ҮХНӨ болон бусад хуулиуд маш дэвшилттэй харагдаж байгааг онцолмоор байна. Энэ нь ч амжилттай болж, эмэгтэйчүүд улстөрийн оролцоонд манлайлна гэдэг итгэлтэй байгаа.

МАН-ын нарийн бичгийн дарга А.Ариунзаяа: Сонгуульд эмэгтэйчүүд бага сонгогдсон нь өөрийгөө хангалттай таниулж чаддаггүйтэй холбоотой

-Монгол ардын нам нь 2020 онд 30 дугаар их хурлаа хийсэн. Ингэхдээ Социал демократ үзэл баримтлалыг намынхаа үзэл баримтлал хэмээн тунхагласан байгаа. Өнөөдрийн үйл ажиллагаагаар Ази, номхон далайн бүсэд тулгамдаж буй асуудлуудыг эмэгтэйчүүд хэрхэн яаж шийдвэрлэх вэ гэдэг дээр энд цугласан 10 орны төлөөлөгчид санал солилцож, хэлэлцэж байна. Монгол Улсын хувьд Сонгуулийн тухай хууль, Улстөрийн намын тухай хууль, ҮХНӨ зэрэг томоохон хуулиуд яригдаж байгаа нь цаг үеэ олсон, эмэгтэйчүүдийн оролцоог улстөрд нэмэгдүүлэхэд тулгамдсан асуудлуудыг хэлэлцэж байгаа нь олон улсад туршлага болж байгаа гэж харж байна. 

           Монгол Улс сүүлийн 30 жилийн хугацаанд болсон парламентийн сонгуулиудад холимог тогтолцоог нэг л удаа буюу 2012 онд туршиж байсан. Бусад нь мажоритар буюу тойргийн системээр явагдсан байна. Түүнчлэн, эмэгтэйчүүдийн сонгогдсон байдал бага байгаа нь юутай холбоотой вэ гэхээр өөрийгөө хангалттай таниулж чаддаггүй. Сурталчилгааны материал нь дутуу байдаг. Мөн санхүүгийн чадамж нь бага учраас эрэгтэйчүүдээс бага боломжтой байдаг гэсэн үг. 

Азийн Социал демократ намуудын сүлжээ нь нийгмийн ардчилсан болон дэвшилтэт улстөрийн намуудын дэлхийн хамгийн том сүлжээ болох Прогрессив Альянсын гишүүн юм. Прогрессив Альянсын гишүүнээр дэлхийн 140 улстөрийн нам элссэн байдаг бөгөөд УЗ-д нь 40 орны улстөрийн намын төлөөлөл сонгогдон ажилладаг аж.

Монгол Улсаас Ерөнхий сайд, МАН-ын дарга Л.Оюун-Эрдэнэ, УИХ-ын гишүүн Ц.Мөнхцэцэг нар УЗ-д нь сонгогдон ажиллаж байна.