Оюу толгой төслийн туслан гүйцэтгэгч "Эпирок Монголиа" ХХК-ийн ажилтнууд энэ сарын 9-ний 06:00 цагаас эхлэн ажил хаялт зарлах гэж буйгаа мэдэгдлээ.
Энэ талаар тус компанийн ҮЭХ-ноос мэдээлэл хийх үеэр "Эпирок Монголиа" ХХК-ийн ҮЭХ-ны гишүүн Х.Цэнгүүн "Бид 2022 оны тавдугаар сард ҮЭХ-гоо байгуулж, компанитайгаа 2022 оны долдугаар сарын 1-нд Хамтын гэрээгээ үзэглэхээр ярилцаж эхэлсэн. Гэвч өнөөдрийг хүртэл зөвшилцөлд хүрээгүй бөгөөд "Хамтын гэрээ" байгуулах явц удааширлаа.
Ажил олгогчийн зүгээс ҮЭХ-той тохиролцохгүй байгаа гол шалтгаан нь илүү цаг болон дундаж цалин хөлсөө тооцуулах тухай асуудал юм. Бид хөдөлмөрийн эрхийн маргаан үүсгэж, эвлэрүүлэн зуучлах шатыг дамжсан ч үр дүнд хүрээгүй. Иймд Хөдөлмөрийн тухай хуулийн 25.1.4 дэх заалтыг үндэслэн ажил хаялтыг Оюу толгойн уурхайн талбарт тавдугаар сарын 9-ний 06:00 цагаас эхлүүлэх мэдэгдлээ ажил олгогчдоо хүргүүлсэн" хэмээв.
"Эпирок Монголиа" ХХК-ийн ҮЭХ-ны тэргүүлэгч гишүүн Б.Сосорбурам "Хөдөлмөрийн тухай хуулийн дагуу өдөрт найман цагаас илүү хугацаагаар ажилласан бол илүү цагийн хөлс бодох ёстой. Одоогоор бид 10 цаг нь энгийн, хоёр цаг нь илүү цагаар тооцуулж байгаа. Мөн цалин хөлсийг нийт цагт нь тооцох ёстой. Гэвч А/49 хавсралтаар А.Ариунзаяа сайдын гаргасан тогтоолд илүү цагийн нэмэгдлийг тооцохгүй байж болно гэх өгүүлбэр орсон. Үүнээс болоод ажил олгогч маань илүү цагийн хөлсийг дундаж цалингаас хассан тул сарын орлого 20-30 хувь буурсан" гэлээ.
Тус компани нь ил болон далд уурхайд өрмийн тоног төхөөрөмж, бэхэлгээний машин нийлүүлж, засвар үйлчилгээг хариуцдаг, дэлхийн 150 орчим улсад салбартай юм байна. Монгол дахь салбар компани нь 260 гаруй ажилтантайгаас уртын ээлжид 172 хүн ажиллаж байгааг ҮЭХ-ноос нь мэдээлэв.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
