Монголын Төр хэдэн багачууддаа "ХҮҮХДИЙН МӨНГӨ" нэртэй тус бүр 100 мянган төгрөг олгох гэж үйлээ үзэж, "нус"-аа хацартаа нааж байна. Ерөнхий сайд Л.Оюун-Эрдэнэ өөрөө ч "Би Ц.Элбэгдорж, Х.Баттулга нарын зуурсан бантанг арилгах гэж үйлээ үзэж байна" гээд өөрөө хэлчихсэн. Энэ "бантан" дотор нь "ХҮҮХДИЙН МӨНГӨ" яваа байх. 

Та бид 91 болон 9 гэсэн тоог андахгүй болсон. Учир нь нийт хүүхдийн 91 хувьд нь "хүүхдийн 100 мянга"-аа олгож, баян 9 хувьд нь олгохгүй гэх шийдвэр гарсан байдаг. 

Баян ч гэж дээ... Тухайн гэр бүл автомашинтай, орон сууцтай бол "баян" гээд хасчихсан. Эцэг, эхчүүд "Хүүхэд минь хасагдсан болов уу, яасан бол" гэж "И-Монголиа"-гаар эргэлдсэн. Зарим айл огт хүүхэдгүй болсон бол нөгөө хэсэг нь гэнэт "Алдарт эцэг, эх" болов. Бид та бүхэнд хүргэж байсан "Мянгуужингийн үлгэр"-ээ дахин сийрүүлж байна.

Хүүхдийн мөнгөний тухай “МЯНГУУЖИНГИЙН ҮЛГЭР”-ийг энд ярьж өгье.  

ГУРВАН МЯНГАН ТӨГРӨГ:  УИХ-ын 2004 оны ээлжит сонгуулийн өмнө “Эх орон-Ардчилал” эвсэл хүүхэд бүрд 10 мянган төгрөг гэж амлаж байлаа. Энэ нь сонгуулийн амлалт байсан ч Ц.Элбэгдорж Засгийн газрыг удирдаж эхлэхдээ амьжиргааны баталгаажих түвшнээс доогуур орлоготой өрхийн хүүхдэд  сард гурван мянган төгрөг олгох болов. 

ХОРИН МЯНГАН ТӨГРӨГ: 2018 онд ОУВС-ийн хөтөлбөрт хамрагдах үед Хөдөлмөр нийгмийн хамгааллын сайдын 2018 оны 01 дүгээр сарын 29-ний өдрийн тушаалаар “Өрхийн нэгдсэн санд бүртгэгдсэн өрхийн 0-18 хүртлэх насны хүүхдэд сар бүр бэлэн мөнгө хэлбэрээр хүүхдийн мөнгө олгох босго оноог амьжиргааны түвшний үнэлгээний 554 болон түүнээс доош орлогоор тогтоохоор” заасныг үндэслэн хүүхдийн мөнгөн тэтгэмжийг өрхийн мэдээллийн нэгдсэн санд бүртгэлтэй нийт хүүхдийн 60 орчим хувь буюу 684.0 мянган хүүхдэд 164.2 тэрбум төгрөг олгохоор баталсан байдаг. Ингэж баталчхаад ядуурлын түвшинг бодож 80 хувьд хүргэсэн гэх. Ингээд ус буцалгагчтай, хөргөгчтэй, машинтай, зурагттай айлуудыг 20 хувьд хамруулж хасаад ЯЛГАЖ ОРХИСОН. 

Төд удалгүй хүсэлт гаргасан хүүхэд бүр авах боломжтой болсноор бүх хүүхдэд олгож эхлэв. 

ЗУУ МЯНГАН ТӨГРӨГ:  Улс төрийн оноо УЛС ТӨРЧДӨД тун чухал. 2020 оны сонгууль ч дөхлөө. Ковид-ийн үе ч таарав. Энэ үед Засгийн газраас 20 мянган төгрөгийг 100 мянган төгрөг болгон нэмэгдүүлж, хүүхэд бүрд ХҮҮХДИЙН МӨНГӨ олгож байлаа. 

91 ХУВЬ БА ЧИНЭЭЛЭГ 9 ХУВЬ:  2023 оны төсвийг Сангийн яамнаас оруулж ирэхдээ 91 хувьд нь хүүхдийн мөнгө олгоно гэв. 9 хувь нь БАЯН ТАНСАГ, ЧИНЭЭЛЭГ амьдралтай юм байх. Тэгвэл нэг машинтай, цалин нь нэг сая хүртэлх, байрны лизингтэй өрх ЧИНЭЭЛЭГ ангилалд орчихсон хүүхдийн мөнгөнөөс ХАСАГДЖЭЭ. Өрхийн амьжиргааг тооцох гэж Улсын бүртгэл, Хөдөлмөр, халамжийн ерөнхий газар, Засгийн газар, Сангийн яам БУДИЛЖ орхисон. Төрийн ямар ДАМПУУГ саяхан харав.  

Ингэж явж явж Засгийн газар ХҮҮХДЭЭ ЯЛГАВ. 

ХҮҮХЭД БҮРД ТЭГШ БОЛОМЖ:  Хүний эрх, эрх тэгш боломж ярьдаг Л.Оюун-Эрдэнэ ерөнхий сайд ХҮҮХДҮҮДИЙГ ЯЛГАЖ, ТЭГШ БУС харьцчихаад ШУДАРГА ТОГТОЛЦОО-ны тухай, шинэ үе, шинэ мянганы залуучуудын гүүр нь байх болно хэмээн хэлэхээс ичих хэрэгтэй. Одоо Эдийн засаг сэргэж байгаа тул төсөвт тодотгол хийж хүүхэд бүрД олгох боломжтой гэж Засгийн газар нь яриад суух. 

         Эдийн засаг, хөгжлийн сайд Ч.Хүрэлбаатар нь орон гарантсан яриаг хэвлэлд өгч, Сангийн сайд Б.Жавхлан ч эргэж буцсан тайлбар өгөөд буйг та бид харсаар байгаа. Жишээлбэл, Ч.Хүрэлбаатар өнгөрсөн гуравдугаар сарын 22-нд манай сайтад яриа өгөхдөө "Эдийн засаг сайжирч байгаа тул төсөвт ТОДОТГОЛ хийж, хүүхдийн мөнгө олгох боломжтой" гэж байв. Харин маргааш нь сэтгүүлчдэд ярихдаа "Эдийн засаг арай хийж сайжирч байхад хүүхдийн мөнгөнөөс болж, төсөв ТОДОТГОЖ болохгүй" хэмээн будилав.

Тэгвэл Сангийн сайд Б.Жавхлан "Хүсэлт гаргасан хүүхэд бүрт "ХҮҮХДИЙН МӨНГӨ" олгох боломжтой бүрдлээ" гэх мэдээлэл өгсөн нь иргэдийн эгдүүцлийг хүргээд авлаа. Ийнхүү хүүхдийн мөнгөний "МЯНГУУЖИНГИЙН ҮЛГЭР" үргэлжилсээр...