Иргэдийн дунд 136 дугаар сургуулийг татан буулгахтай холбоотой асуудлаар Баянзүрх дүүргийн Боловсролын хэлтсийн дарга Б.Ганбаттай ярилцлаа.
136 дугаар сургуулийн нөхцөл байдлын талаар танилцуулахгүй юу? 
    Тус сургууль нь 19-р хорооны хүүхдүүдийг хамруулдаг бөгөөд 136 дугаар сургууль, 210 дугаар цэцэрлэгийн цогцолбор юм. Тус сургуульд нь 180 хүүхдийн хүчин чадалтай бага сургууль бөгөөд одоогийн байдлаар 1-5 дугаар ангийн 347 хүүхэд суралцдаг. Харин 210 дугаар цэцэрлэгт 238 хүүхэд хамрагддаг. Тус хороонд сургуулийн өмнөх насны 800 хүүхэд байгаагаас цэцэрлэгийн орны тоо хүрэлцээгүйгээс ердөө хамрагдах ёстой хүүхдүүдийн 29 хувь нь л 210 дугаар цэцэрлэгт хамрагдаж байгаа юм. Харин үлдсэн 71 хувь цэцэрлэгт явах боломжгүй гэртээ байдаг.

136 дугаар сургуулийн барилга, 210 дугаар цэцэрлэг барилга нь П хэлбэртэй, бага сургууль, цэцэрлэгийн цогцолбор барилга юм.  

Баянзүрх дүүргийн 19 дүгээр хорооны 136 дугаар сургуулийг татан буулгах гэж байгаа тухай асуудал яригдаж эхлээд байна. Энэ үнэн үү ?
  Иргэд болон Нийслэлийн иргэдийн төлөөлөгчөөс гарсан санал, эцэг эх оршин суугчдын саналыг харгалзан үзсэний үндсэн дээр 19 дүгээр хорооны сургуулийн өмнөх боловсролд хамрагдах хүүхдийн тоог нэмэх зорилготойгоор 136 дугаар сургууль, 210 дугаар цэцэрлэгийн нэгдсэн цогцолборыг цэцэрлэг хэлбэрээр ашиглаж, 136 дугаар сургуулийг шинээр ашиглалтанд орсон 148 дугаар сургуультай нэгтгэх юм. Харин 136 дугаар сургуулийг цэцэрлэг болгосноор гэртээ байгаа хүүхдүүд цэцэрлэгт хамрагдах боломж бүрдэж байгаа юм. Өөрөөр хэлбэл бага сургуулийн барилгыг цэцэрлэг болгоно л гэсэн үг.  
Тус хороонд 148 дугаар сургууль баригдсаны дараа сургуулийг нэгтгэх хүсэлтийг эхлээд гаргасны үндсэн дээр хороо, дүүргээс нийслэл рүү илгээсэн. 
136 дугаар сургуулийг шилжүүлснээр хуучин байрыг ямар зориулалтаар ашиглах вэ?
19 дүгээр хороонд цэцэрлэгийн насны 800 гаруй хүүхэд байдгаас түүнээс 29% нь хамрагддаг гэж хэллээ. Аль болох олон хүүхдийг хамруулахын тулд тус 136 дугаар сургуулийг шилжүүлж дан цэцэрлэгийн зориулалтаар ашигласнаар цэцэрлэгийн хүртээмж 50% хүртэл өсөх юм. 
136 болон 148 дугаар сургуулийг яагаад нэгтгэх болсон юм бэ?
136-р сургуулийг 148-дугаар сургуультай нэгтгэж байгаа гол шалтгаан нь 148-р сургууль өнгөрсөн жил ашиглалтанд орсон боловч цар тахлын улмаас хичээллээгүй. Тэр сургуулийн бүртгэл дээр өнгөрсөн жил ердөө 136 хүүхэд байсан. Сургууль өөрөө 640 хүүхдийн хүчин чадалтай, 2 ээлжээр хичээллэвэл 1280 хүүхэд хамрагдах боломжтой болно. 
Энэ хичээлийн жилд 19-р хорооны хамран сургах тойрогт 53, 44-р сургуульд явж байгаа хүүхдүүдийг харьяаллынх нь дагуу 148-р сургууль руу нийт 800 хүүхдийг шилжүүлж байгаа. Хүчин чадал хангалттай байгаа учраас 136-р сургуулийн 5-р анги төгсөгчдийг нэгтгэж оруулах юм.
Байршлын хувьд 136-р сургуулийн хүүхдүүд 148-р сургууль руу явахад хүндрэлтэй юу? Хэр хол вэ? 
136 дугаар сургууль нь 19 дүгээр хорооны захад байрладаг учраас сурагчид сургуульдаа явах гэж дунджаар 3-3.5 км явж хүрдэг. Мөн тус сургуулийг төгссөн 5 дугаар ангийн сурагчид 44, 53, 102 гэх мэт өөр хорооны сургуульд шилжин суралцдаг зэрэг хүндрэлтэй асуудлууд байсан. Харин 148 дугаар сургууль бол хорооны төв хэсэгт байрлахаас гадна 136-р бага сургуулийг төгссөн 5 дугаар ангийн хүүхдүүд өөр сургуульд шилжиж суралцах шаардлагагүйгээр бүрэн дунд боловсролоо эзэмших боломж нээгдэж байгаагаараа давуу талтай юм. 
Одоо суралцаж байгаа 1-5-р ангийн хэдэн хүүхдийг 148 дугаар сургууль рүү шилжүүлэх вэ?
Одоо 136 дугаар сургуульд 1-5 дугаар ангийн 337  сурагч суралцдаг. Эдгээр сурагчид гэртэйгээ ойрхон 148 дугаар сургууль руу шилжих юм. 
136 дугаар сургуулийн багш ажилчдыг хэрхэх нь тодорхойгүй байгаа нь иргэдийн санааг их зовоож байгаа?
Шилжүүлж байгаа болохоос татан буугдаж байгаа асуудал огт биш. Зарим нэг мэдээллийн сайтаар асуудлыг өнгөц байдлаар нэг талын эрх ашгийн төлөө иргэдэд буруу ташаа ойлголт төрүүлэхүйц мэдээлэл гарсан байна.

Тус сургуулийн багш ажилчид бүгд ажилтай байна. Ангиа дагаад багш нар нь хамт очино.

Тэнд ажиллаж байсан ажилтан алба хаагчид сургууль цэцэрлэгүүддээ хуваарилагдаад ажиллана. Нэг ч хүн ажилгүй үлдэхгүй.  
Мөн 26 дугаар хороонд шинээр баригдаж байгаа 157 дугаар сургуулийн зориулалттай барилгыг ашиглалтад оруулж 133 дугаар сургуулийн хичээлийн байраар өөрчлөх саналыг иргэд тавьсан гэсэн. 

Шинээр баригдаж байгаа 157 дугаар сургууль нь одоогийн байдлаар дэд бүтцэд холбогдоогүй. Ус, дулаан тавиагүй, дотоод заслын ажил энэ жилийн төсөвт тусгагдаагүй тул ашиглалтанд орох боломжгүй байна. Гадна угсралтын ажил 80 хувьтай явж байгаа.