Өнгөрсөн хавраас хойш махны үнэ огцом өсөж, иргэдийг бухимдуулсаар байгаа. Тэгвэл махны үнэ болон нийлүүлэлтийн асуудлаар ХХААХҮ-ийн сайд Х.Болорчулуунаас тодрууллаа.
-Сүүлийн саруудад махны үнэ эрчимтэй өссөөр кг-ийн үнэ 20 мянгыг хол давлаа. Танай яам бодлогынхоо ямар арга хэмжээ авч ажиллаж байна?
-Махны үнэ зах зээлийнхээ зарчмаар явж байна. Гэхдээ нөөцийн махыг бэлтгэж байж, махны үнэд зохицуулалт хийж байгаа. Нийслэлд 400 гаруй цэгээр дамжуулан нөөцийн мах худалдаалж буй бөгөөд өнөөдрийн байдлаар борлуулалт 70 хувьтай байна. Ер нь хавар болохоор л махны үнэ нэмэгддэг шүү дээ. Энэ жил дээд тал нь 25-26 мянган төгрөгт хүрлээ. Хүмүүс юмыг амархан мартах юм даа. 2019 онд махны үнэ 25 мянган төгрөгт хүрч л байсан. Одоо харин махны үнэ эргээд буурч, 20-21 мянган төгрөг болсон байна. Тиймээс "Одоо мал таргалаад, махны үнэ буугаад ирнэ ээ" гэдгийг хэлье.
Түүнээс гадна экспортод мах сайн гарч байгаа. Өнгөрсөн онд нийт 16 мянган тонн мах гарсан бол энэ оны эхний хагас жилд 40 мянган тоннд хүрсэн. Оны эцэст 60-70 мянган тонн мах экспортод гарах болов уу гэсэн хүлээлт байна. Яагаад гэвэл ХХААХҮЯ-наас махны нэг цэгийн бодлого баримталж, хүнд суртлыг арилгаж байгаа.
-УИХ-ын дарга Г.Занданшатар чуулганы индэр дээрээс "Махны үнийн өсөлтөд Засгийн газар хяналт тавих ёстой" гэж хэлсэн. Засгийн газрын төлөөлөл нь танай яам. Та яамандаа ямар чиглэл өгч ажиллаж байна?
-Хяналт тавьж байна гээд зах зээлийн эзэмшилд шууд оролцож болохгүй. Өнгөрсөн жилийн тухайд мах, гурил, шатахуун гээд гол нэрийн бүтээгдэхүүн дээр 6 хувийн хүүтэй дэмжлэг олгосон. Гэхдээ ерөнхий инфляц унаад, зардал нь хүүний зөрүү буюу 10 хувиасаа хэтэрсэн тохиолдолд яалт ч үгүй энэ төрлийн бүтээгдэхүүн үнэтэй болчхоод байгаа юм. Та бүхэн мэдэж байгаа. Гадны дайны гэх мэт нөхцөл байдлаас болж, бүх юмны үнэ өсчихлөө. Тиймээс үнийг хүчээр тогтооно гэвэл тэр салбараа унагах учраас төр энэ асуудалд оролцох ямар ч боломжгүй.
Like
0
Зөв
0
0
Буруу
0
Воов
0
Уйтгартай
0
Дуртай
Үндсэн хуулийн өдөрт зориулсан үндэсний бөхийн барилдаанд улсын арслан Ц.Бямба-Отгон түрүүллээ
© 2013-2023. Вэб сайт бүтээсэн: Tsast Solution LLC
