Дорнод аймгийн Дашбалбар сумын уугуул иргэн Монгол Улсын Дархан мэргэн Дашнямын Бор-Охин өдгөө 80 насны босгыг давсан ч өөрийн сонирхлын дагуу тасралтгүй 48 дахь жилдээ сур харваж байна.
Амьдралынхаа 50 шахам жилийг сурын спортод зориулж яваа тэрбээр үр хүүхдүүдээ ч энэ спортод “уруу татжээ”.
Бид энэ удаа Дархан мэргэн азай буурайтай ярилцсан ярилцлагыг та бүхэнд хүргэж байна.
-Та хамгийн анх хэзээ сур харваж эхэлсэн бэ. Энэ спорт руу таныг хэн хөтлөж оруулав?
-Намайг Дашнямын Бор-Охин гэдэг. Одоогоос тэртээ 1973 онд Дорнод аймагтаа хамгийн анх сур харваж байлаа. Тэр цагаас хойш өнөөдрийг хүртэл сур харваж байна. Амьдралынхаа тэн хагасыг буюу 48 жилийг сурын спортод зориулжээ.
Бага балчир насандаа хичээл номдоо нэг л “ёозгүй” хүүхэд байсан болохоор дөрөвдүгээр ангиа төгсөөд сургуулиасаа гарч байлаа. Тэгээд гэнэт л сур харваж эхэлсэн.
Анх сумын наадамд харваж буй ах эгч нарыг харахад их л сайхан харагдаж, тэр үеэс эхлэн харвах сэдэл төрсөн. Аав ээжийн алтан нэр, ах дүүсийн нэрийг сэвтээхгүй, нутаг усандаа хэрэгтэй охин нь болох гэж их хичээсэн. Ээж, аав маань тухайн үед нум сум харвахад их л дэмжсэн. Манай удамд сур харвадаг харваач байхгүй, удамдаа анхдагч нь болсон доо.
-Таныг оролцсон наадам болгондоо амжилт үзүүлж ирсэн гэдэг. Улсын наадамд хэр оролцдог байв?
-Аймгийн баяр наадамд түлхүү оролцож амжилт гаргасан. Хичээллэсэн цагаасаа эхлэн ялалт байгуулж эхэлсэн нь миний хувьд их сайхан байсан. Одоо санаж буйгаар аймгийнхаа наадмын 1975, 1979, 1987 онуудад түрүүлсэн. Мөн бүх ард түмний V, VI спартакиадад түрүүлж төр гавьяаг минь үнэлсэн байдаг. Энэ хугацаанд нийтдээ таван удаа түрүүлжээ. Эргээд дурсахад сайхан байна шүү.
-Таныг бэлтгэл хангахгүй сум тавьж, тавьсан сум бүр нь байгаа онодог чадварлаг харваачын нэг гэдэг? Чухам та яагаад бэлтгэл хийдэггүй байв аа?
-Би эмнэлэгт түргэний жолоочоор ажилладаг байсан. Эмнэлэгт ажилладаг байсан болохоор төдийлөн чөлөө авах, бэлтгэл хангах боломжгүй байсан юм л даа. Тийм учраас сумдаа итгээд наадамдаа оролцдог байлаа. Өнөө цагт харваачид нэг гал болж бэлтгэл хийдэг болсон байна.
Миний хувьд гал болж бэлтгэл хийж байгаагүй. Тийм ч боломж ч байсангүй.
Төрөөс хөдөлмөрийг минь үнэлж Соёлын тэргүүний цол тэмдгээр мялаасан. 2017 онд зохиогдсон бүх ард түмний наадмаас Дархан мэргэн цол хүртсэн.
-Тэгэхээр та жолооны ардаас шууд сурын талбайд очдог байжээ?
-Харин тийм. Залуу байхад их л зоригтой, омголон байж. Би чинь зүгээр сууж чаддаггүй хүн шүү дээ.
-Одоо таны үр хүүхдүүдээс сурын спортоор хичээллэж буй хүүхэд бий юу?
-Манай хүүхдүүд бүгд хичээллэж байгаа. Хүү маань Ч.Батжаргал сурын спортын 1-р зэрэгтэй, охин Ч.Баярмаа нь байт сурын спортын дэд мастер, охин Ч.Оюунцэцэг нь үндэсний сурын спортын мастер, охин Ч.Оюунгэрэл нь үндэсний сурын спортын дэд мастер цолтойгоор удам залган харваж байгаа. Энэ жил аймгийн наадам болоогүй болохоор хүүхдүүд бэлтгэл хангаагүй амралтын байдалтай л байна.
-Та Дорнод аймагт зохион байгуулагдсан сур харваад оролцсон байна лээ. Сур харваа сайхан болж өндөрлөв үү?
- Дорнод аймагт зохион байгуулагдсан сур харваа сайхан болж өндөрлөлөө. Тэмцээнд урдын адил нум сумаа авч очоод сумаа тавиад ирсэн. Энэ жилийн тэмцээнд мөн адил бэлтгэл хангахгүй шууд оролцсон.
Насаараа дасгал хөдөлгөөнтэй байж ирсэн болохоор харвахгүй байхаар биед нэг л биш хөндүүр байдаг.
Тийм болохоор 80 насыг зооглосон ч насаараа хичээллэж ирсэн спортоосоо хөндийрч чадахгүй өнөөдрийг хүртэл хичээллэж л байна.
-Ярилцсан баярлалаа. Танд эрүүл энхийг хүсье.
Төр.мн
Like
4
Зөв
0
0
Буруу
0
Воов
0
Уйтгартай
5
Дуртай
Г.Занданшатар: Хүн сольсноор асуудал шийдэгдэхгүй, тогтолцоогоор нь авч үзэх хэрэгтэй
© 2013-2023. Вэб сайт бүтээсэн: Tsast Solution LLC
