Нийслэлийн нийтийн тээвэрт 2009 оноос хойш парк шинэчлэл хийгдээгүй байсан. Харин Засгийн газар, нийслэлийн зүгээс үүнд онцгойлон анхаарал хандуулснаар өнгөрсөн жил 415 автобусаар парк шинэчлэл хийсэн юм. Мөн энэ жил 810 автобус оруулж ирэх бөгөөд ингэснээр 1225 автобусаар буюу иж бүрэн парк шинэчлэл хийнэ.
Үүнтэй холбоотойгоор Нийслэлийн Засаг дарга бөгөөд Улаанбаатар хотын Захирагч Д.Сумъяабазар Сонгинохайрхан дүүргийн 22 дугаар хорооны нутагт барьж буй “Зорчигч тээвэр гурав” ОНӨААТҮГ-ын нийтийн тээврийн автобус паркт ажиллалаа.
Энэ үеэр Зорчигч тээвэр гурав ОНӨААТҮГ-ын дарга О.Ганбаатар:
-"2018 онд 12 компанид 13 багц ажлыг хэсэгчилж хувааж өгсөн. Үүнтэй холбоотойгоор зарим хүндрэл үүсэж байна. Коронавирусийн нөхцөл байдлын үед зарим компанийн ажил удааширсан. 140 автобусны багтаамжтай хоёр гарааш байгуулж байгаа. Эхнийхийг есдүгээр сарын сүүлчээр ашиглалтад оруулахаар төлөвлөсөн. Манайх 172 автобустай. Цахилгааны ажил 100 хувь дууссан. Уурын зуухын ажил 95 хувьтай байгаа" гэлээ.
Зам, талбайн ажлыг гүйцэтгэж буй "Тэгш плант" ХХК-ийн гүйцэтгэх захирал М.Золбаяр:
-"Зам, талбайн ажил 55 хувьтай байна. Шугам, сүлжээ, газар доорх байгууламжийг хийсний дараа хамгийн сүүлд манайх ажлаа хийнэ. Шинэ удирдлага ирснээр 12 компанийн уялдаа холбоо сайжирч байгаа. Бид компаниудад талбай чөлөөлж, газар доорх байгууламжаа хийж дуусгах, ажил хийсний дараа газар ухахгүй байх шаардлага тавьж буй" гэлээ.
"Бум констракшн" ХХК-ийн захирал Х.Бум “Уурын зуухыг зураг төслийн дагуу гүйцэтгэсэн. 2 МВт-ын хоёр зуух, 8 МВт-ын ус халаах нэг зуух бий. Хүчдэл өгвөл галлахад бэлэн” гэсэн бол "Тэлмүүнлхам констракшн" ХХК-ийн ерөнхий захирал Д.Азжаргал “Манайх оффисын барилгыг барьж байгаа. Одоо сарын ажил л үлдсэн” гэв.
Мөн "Эрчим хайрхан" ХХК-ийн ерөнхий инженер Б.Амартүвшин “Манайх цахилгаан хангамжийн ажил хийж байгаа. Баянголын амнаас 8.7 км цахилгаан дамжуулах шугам татсан" гэсэн юм.
Сэлбэг, аж ахуйн агуулахын ажил 2019 оны гуравдугаар сард эхэлсэн бөгөөд энэ арваннэгдүгээр сард дуусгахаар төлөвлөн ажиллаж байна. Ажил 80 хувьтай үргэлжилж байгаа аж.
Хотын дарга Д.Сумъяабазар “2009 оноос хойш нийтийн тээвэрт дорвитой парк шинэчлэл хийгээгүй. Засгийн газар, нийслэлийн зүгээс нийтийн тээврийн үйлчилгээг сайжруулахад анхаарч ажиллаж байна. Парк шинэчлэлийн хүрээнд энэ жил 800 гаруй автобус оруулж ирнэ. Тиймээс ажлаа яаравчлах шаардлагатай. Аж ахуйн нэгжүүд нэгдсэн зохион байгуулалтад орж, шуурхай ажиллах хэрэгтэй” гэлээ. Мөн ажлын чанар, гүйцэтгэлд анхаарах хэрэгтэйг сануулж байв.
Like
0
Зөв
0
0
Буруу
0
Воов
0
Уйтгартай
0
Дуртай
Үндсэн хуулийн өдөрт зориулсан үндэсний бөхийн барилдаанд улсын арслан Ц.Бямба-Отгон түрүүллээ
© 2013-2023. Вэб сайт бүтээсэн: Tsast Solution LLC
