УИХ дахь МАН-ын бүлгийн ээлжит хурал өнөөдөр /2023.10.23/ хуралдаж, нийслэлийн түгжрэлийг буурууулах, гэр хорооллыг орон сууцжуулах тухай хуулийн төслийг хэлэлцлээ. Хуралдаанаас гарсан шийдвэрийн талаар УИХ дахь МАН-ын бүлгийн дарга Д.Тогтохсүрэн, дэд дарга М.Оюунчимэг, дэд дарга Ж.Батжаргал, УИХ дахь МАН-ын бүлгийн Ажлын албаны дарга С.Далхаасүрэн нар сэтгүүлчдэд мэдээлэл өглөө.
Бүлгийн дарга Д.Тогтохсүрэн “Бүлгийн хуралдаанд Нийслэлийн Засаг дарга бөгөөд Улаанбаатар хотын захирагч Х.Нямбаатар “Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай” хуулийн төслийг танилцууллаа. Улаанбаатар хотын хамгийн тулгамдсан асуудал бол түгжрэл юм. Тиймээс хотын дарга ажлаа хүлээж аваад, долоо хоногийн хугацаанд судалсны үндсэн дээр хуулийн төсөл боловсруулан намын бүлэгт танилцуулж байна. Ингэхдээ хотын түгжрэлийг бууруулах чиглэлээр хуультай байх нь зүйтэй гэж үзэж, анхдагч хуулийн төслийг боловсруулж оруулж ирсэн байна. Хуульд гурван гол агуулгыг чухалчилж үзсэн. Үүнд:
Нэгдүгээрт, хотын түгжрэлийн асуудлыг бууруулахад чиглэсэн олон арга хэмжээг төлөвлөсөн байна. Тухайлбал, төлбөртэй бүсүүд, автомашины зогсоолын талаар зохицуулалтыг тусгасан байна.
Хоёрдугаарт, татвар, хураамжтай холбоотой асуудлыг хөнджээ.
Гуравдугаарт, гэр хорооллыг дахин төлөвлөхдөө хуулийн хүрээнд шийдвэрлэх асуудал байна гэж үзсэн байна. Эдгээр асуудлыг өнөөдрийн бүлгийн хуралдаанд танилцууулсан. Бүлгийн гишүүд түгжрэлийг бууруулахад чиглэсэн арга хэмжээ, гэр хорооллыг орон сууцжуулах асуудлыг ерөнхийд нь дэмжиж байгаа. Харин татвартай холбоотой асуудлыг Засгийн газар олон талаас нь ярилцаж, тооцоо судалгааг сайтар хийх ёстой гэж үзлээ.
Энэ удаагийн бүлгийн хуралдаанаар нийслэл хотод нэгэнт агаар, орчны бохирдол, түгжрэлийг шийдэх олон асуудал байгаа учраас дорвитой арга хэмжээ авах хэрэгтэй гэдэгт бүлгийн гишүүд санал нэгдлээ” гэв.
Энэ үеэр УИХ-ын гишүүн, УИХ дахь МАН-ын намын бүлгийн дэд дарга М.Оюунчимэг нийслэл Улаанбаатар хуулийн төслийн үзэл баримтлалтай холбоотой асуудлаар мэдээлэл өглөө. Тэрбээр,
“Ковидоос хойш Улаанбаатар хотыг дэд бүтэцжүүлэх асуудал хөрөнгө мөнгөний хувьд зогссон байсан. Улаанбаатар хотын захирагч Х.Нямбаатар гэр хорооллыг дахин төлөвлөх, түгжрэлийг бууруулах хуулийн төслийг багцаар нь оруулж ирсэн. Ингэхдээ, татварын хөнгөлөлт үзүүлэх талаар хөндсөн байна. Тухайлбал, Сэлбэ дэд төвийг түшиглээд Сүхбаатар, Чингэлтэй дүүрэгт орон сууцыг төр, хувийн хэвшлийн түншлэлийн хүрээнд байгуулах боломжтой болсон талаар тусгажээ. Мөн гэр хороололд барилга барих ААН-үүдийг НӨАТ, гаалийн татварын хөнгөлөлт үзүүлэх таатай нөхцлийг заасан хуулийн заалтыг оруулж ирсэн байна. Ингэснээр гэр хорооллыг дахин төлөвлөх ажил бодитоор хэрэгжиж эхлэх таатай боломж нээгдэж байна” гэв.
Like
0
Зөв
0
0
Буруу
0
Воов
0
Уйтгартай
0
Дуртай
Үндсэн хуулийн өдөрт зориулсан үндэсний бөхийн барилдаанд улсын арслан Ц.Бямба-Отгон түрүүллээ
© 2013-2023. Вэб сайт бүтээсэн: Tsast Solution LLC
