“Болор цом”-ын эзэн, яруу найрагч Тоомойн Очирхүүгийн нэрэмжит “УРАМ ХАЙРЛА III” яруу найргийн наадам ажилттай болж өндөрлөлөө. Наадмын сүүлийн шатанд Говь-Алтай аймгийн залуу уран бүтээлчдээс шалгарсан шилдэг 16 оролцогч шүлгэн хүлгээ уралдуулснаас тэргүүн байрт Б.Эрдэнэ-Очир, дэд байрт Б.Буянжаргал, гутгаар байрт Л.Даваа нар шалгарлаа. Зохион байгуулагч “Ирээдүй-Алтай” холбооноос тус наадмын хамгийн залуу шүлэгч буюу Есөнбулаг сумын 11 дүгээр ангийн сурагч Б.Майнбаярт, Монгол Улсын үндэсний номын сангийн хамт олноос яруу найрагч Г.Хосбаяр нарт тусгай шагнал гардууллаа.
Наадмыг Монгол Улсын соёлын гавьяат зүтгэлтэн, хэл бичгийн ухааны доктор, зохиолч, яруу найрагч, сэтгүүлч Лханаагийн Мөнхтөр, “Болор цом” наадмын дэд байрын болон “Алтан өд” шагналт, яруу найрагч, орчуулагч Хандхүүгийн Нямхишиг, “Урам хайрла” анхдугаар наадмын тэргүүн байрын шагналт, яруу найрагч Цэцэгмаагийн Энхболд нар шүүн тунгаалаа.
Наадмын нээлтэд Тоомойн Очирхүү агсны нэгэн үеийн уран бүтээлч Монгол Улсын Төрийн шагналт яруу найрагч Санжаажавын Оюун, найрагчийн шавь Монгол Улсын Төрийн шагналт, Соёлын гавьяат зүтгэлтэн Хайдавын Чилаажав нар оролцож, Т.Очирхүүгийн бүтээл туурвилын онцлог, Монголын яруу найрагт оруулсан хувь нэмрийг дурдаж, дурсамж дэлгэлээ. Мөн Монгол Улсын соёлын гавьяат зүтгэлтэн Б.Дашзэвэг, Монгол Улсын гавьяат багш Д.Батсүрэн, яруу найрагч Р.Мөнхтариа, Ц.Ганболд, Ж.Батсайхан, Бя.Даваацэрэн, Т.Сайхнаа, В.Түвшинтогтох, О.Билэгсайхан зэрэг уран бүтээлчид уригдан ирсэн байлаа.
Т.Очирхүү нь Анагаах ухааны дунд, дээд сургуулийг төгссөн, эмч найрагчдаас төрсөн анхны “Болор цомын эзэн” ажээ. Тиймээс түүний нэрэмжит наадмыг Анагаахын шинжлэх ухааны үндэсний их сургуулийн Соёлын төвд зохион байгуулсан бөгөөд хамт суралцаж байсан оюутан үеийн найзууд, өнөө цагийн эрүүл мэндийн салбарын алдартан, гавьяатууд зорин ирсэн байлаа. Мөн зохиолч, найрагчийн үелүүд, охин Т.Хулан, Т.Баянаа нар оролцож, төлөөлөл нь үг хэллээ.
Яруу найрагч Т.Очирхүү “Манай ангийнхан”, “Зүүдний хайртай нутаг”, “Ээжтэйгээ өтлөх сайхан” зэрэг ард түмний сэтгэлд хоногшсон олон дууны зохиогч юм. Наадмын үеэр Монгол Улсын гавьяат жүжигчин Ц.Оюунцэцэг “Зүүдний хоймор Алтай”, “Ахан дүүс” хамтлагийн дуучин Т.Гантөмөр “Оюутан цагаа дурсана уу” дуунуудаар нь мэндчилж, МУБИС-ийн оюутан Т.Сарантуяа “Ёогүй Чулууны дууль”-ийг нь уншиж, Соёлын тэргүүний ажилтан А.Оросоо, хөтлөгч, дуучин, Б.Мэндбаяр нар ая дуугаа өргөлөө.
Монголын зохиолчдын эвлэлийн болон Ч.Лодойдамбын шагналт зохиолч, “Болор цом”-ын эзэн, яруу найрагч Тоомойн Очирхүүгийн бүтээлийн үзэсгэлэнг дэлгэн харуулсан нь уншигчдын сонирхлыг татаж байлаа. Тэрээр яруу найраг, дууль, нийтлэлийн төрлөөр “Тэнгэрийн хаяаны од”, “Морьтой хүн”, “Газрын татах хүч”, “Алтайн унага”, “Алтан нулимс шиг навч”, “Чулууны магтаал”, “Аргамжааны чулуу”, “Тоомой панз миний аав” зэрэг 20 гаруй ном бүтээжээ.
“Урам хайрла” наадмыг Тоомойн Очирхүүгийн 80 насны ойг тохиолдуулан зохион байгуулсан бөгөөд өмнө нь 2006, 2008 онд болж байв.
Like
2
Зөв
0
0
Буруу
0
Воов
0
Уйтгартай
1
Дуртай
Үндсэн хуулийн өдөрт зориулсан үндэсний бөхийн барилдаанд улсын арслан Ц.Бямба-Отгон түрүүллээ
© 2013-2023. Вэб сайт бүтээсэн: Tsast Solution LLC
