Төв аймгийн Сэргэлэн сумын нутагт орших Хөшигийн хөндийд байгуулагдсан шинэ нисэх буудал болон түүнийг дагаж хөгжих дагуул хотуудын талаар  Барилга Хот Байгуулалтын сайд Б. Мөнхбаатар болон холбогдох албаныхан Хөшигийн хөндийгөөс мэдээлэл хүргэлээ.

2008 онд анх Хөшигийн хөндийд олон улсын нисэх буудал барихаар төлөвлөсөн бөгөөд Улаанбаатар хотын хэт төвлөрлийг бууруулахын тулд дагуул хот байгуулахаар төлөвлөж, эхний ээлжинд 2013 онд 12 мянган га талбайг онгоцны буудалд зориулан улсын тусгай хэрэгцээнд авсан байна. Онгоцны буудал ашиглалтад орсны дараа ачаа бараа, карго болон тээвэр логистикийн бусад үйлчилгээ хөгжих тул “Богдхан” төмөр замын трасст оруулжээ. Ингээд Улаанбаатар хотоос тээвэр, логистикийн үйлчилгээнүүдийг Хөшигийн хөндий рүү шилжүүлэхээр төлөвлөж, 4500 га газрыг улсын тусгай хэрэгцээнд авахаар төлөвлөсөн байна.
Энэ үеэр холбогдох албаныхан "Чингис хаан" олон улсын нисэх буудлыг түшиглэн "Шинэ Зуунмод", "Майдар хот"-ыг байгуулах ерөнхий төлөвлөгөө батлагдсан, шинэ хотуудын нэгдсэн төлөвлөлтийг 22415 га газарт төлөвлөнө. Дагуул хот нь нийт 150 мянга орчим хүн амтай байх ба 2000 орчим тээвэр ложистикийн төв, худалдаа үйлчилгээний томоохон төвүүдийг байгуулна. Олон улсын хэмжээний дотоодын компаниудын төрийн бус хөрөнгө оруулалтын байгууллагуудаас хөрөнгө босгох боломжтой " гэлээ.

БАРИЛГА, ХОТ БАЙГУУЛАЛТЫН САЙД Б.МӨНХБААТАР: ГАЗАР ДООРХ "ХОТ"-ЫГ БИЙ БОЛГОСОН ҮЕД ГАЗАР ДЭЭР НЬ БОСОХ ХОТЫГ ЗӨВ ТӨЛӨВЛӨНӨ
БХБ-ын сайд Б.Мөнхбаатар:

 “Эхний ээлжид онгоцны буудлын ойр Эдийн засгийн чөлөөт бүс, орон сууц, худалдааны төв байгуулах асуудлыг Хөшигийн хөндийн усны нөөц, ногоон байгууламжтай уялдуулан төлөвлөнө. Хөшигийн хөндийн ойролцоо Майдар цогцолбор, Манзуширын хийд байгаа. Тиймээс аялал жуулчлалын бүс хөгжүүлнэ. Түүнчлэн Зуунмод хотод ноосны том үйлдвэр бий. Говь компани ч газар аваад, ноолуурынхаа үйлдвэрийг гаргаж, ажилтнуудынхаа орон сууцыг барих хүсэлтээ илэрхийлсэн тул Хөнгөн үйлдвэрлэлийн бүсийг мөн Хөшигийн хөндийг байгуулахаар төлөвлөж байна. 

Түүнчлэн Хөшигийн хөндийн 19 мянган га газрыг энэ оны аравдугаар сард улсын тусгай хэрэгцээнд авна. Энд ХӨСҮТ-өөс эхлээд улсын чанартай сургууль, эмнэлгийг байгуулна. ХӨСҮТ гэхэд л 18 объект барихад 15 га газар шаардлагатай. Энэ мэтээр бид төлөвлөлтийг хийж, цаашлаад дэд бүтэц байгуулсны дараа хувийн хэвшлүүдэд дуудлага худалдаагаар газар олгоно. Үүнээс олсон мөнгөөр дараагийн дэд бүтцийг хөгжүүлэх юм. 

Улмаар онгоцны буудлын хойно үерийн ус зайлуулах хоолой байгуулах, дулааны болон цахилгаан станц байгуулна. Энэ газруудаа бид одоо улсын тусгай хэрэгцээнд авч, хадгалах ёстой. Энд барих цахилгаан станцын зургийг хийсэн бөгөөд үүнд зарцуулах 16.8 тэрбум тэрбум төгрөгийг ирэх оны төсөвт суулгахаар ярилцаж байна. Онгоцны буудлын орчимд эхний ээлжид 5000 хүн, яваандаа 15-20 мянган хүн суурьшина гэж төлөвлөсөн. Тиймээс хоногт 20 мянган шоо метр бохир хүлээж авах хүчин чадалтай цэвэрлэх байгууламж байгуулахаар төлөвлөж байгаа. Үүнд л гэхэд 10 га газар шаардлагатай. Энэ бүхэнд хамгийн багадаа 1-2 жил шаардлагатай” гэлээ.
Мөн Хөшигийн хөндийн автозамын сүлжээг сайжруулж, “Чингис хаан” нисэх буудлаас Төв аймгийн төв рүү, Сэргэлэн сум руу зам тавих бөгөөд ирэх жилийн улсын төсөвт замын зураг хийх төсвийг суулгах ажээ.

ГЗБГЗГ-ЫН ОРЛОГЧ ДАРГА М.БУЯНДЭЛГЭР: ХӨШИГИЙН ХӨНДИЙ ОРЧИМД, 499 ИРГЭН, ХУУЛИЙН ЭТГЭЭДИЙН ГАЗАР ЭЗЭМШИХ ЭРХИЙГ ЦУЦАЛНА
М.Буяндэлгэр:

Хөшигийн хөндийн нэгдсэн төлөвлөлтийн хүрээнд зохион байгуулж буй газар чөлөөлөлтөөр 499 иргэн, хуулийн этгээдийн газрын эзэмших эрхийг цуцлах тооцоо гарсан байна.
"Улсын тусгай хэрэгцээнд авахаар төлөвлөж буй 19 мянган га газарт газар чөлөөлөх ажлыг зохион байгуулахаар Барилга хот байгуулалтын сайдын 2021 оны 160 дугаар тоот газар чөлөөлөх ажлын хэсэг байгуулсан. Энэ бүсэд 3173 иргэн аж ахуй нэгж байгууллагатай холбоотой асуудлыг газрыг улсын тусгай хэрэгцээнд авах журмын хүрээнд газар чөлөөлөх ажлыг зохион байгуулна. Газрыг нөхөн олговортой солих, хууль бус газар олголтыг цуцална. Эхний ээлжид 499 аж ахуй нэгжийн газрын зөвшөөрлийг цуцална.

Газар чөлөөлөх хугацаа энэ сарын 15-нд дууссан бөгөөд энэ хугацаанд тайлбар саналаа ирүүлээгүй иргэн, хуулийн этгээд газар эзэмших, ашиглах эрхийн гэрчилгээг хүчингүй болгож байна. Нийт иргэдийн 50 хувь нь ирж уулзсан бөгөөд үүнээс 30 хувь нь гомдолтой байгаа илэрхийлж хүсэлт ирүүлсэн. Сонсох ажиллагаа нь иргэн, хуулийн этгээдийн эрх ашгийг хамгаалах арга хэмжээ учир эрх ашиг нь зөрчигдөж буй иргэн, хуулийн этгээдэд газар чөлөөлөлтийн нөхөн олговор тооцох, чөлөөлөх газрыг тодорхойлох талаар сонсох ажиллагааг Захиргааны ерөнхий хуулийн дагуу зохион байгуулж байна" гэлээ.