Ардчилалыг авчирсан гэж цээжээ дэлсдэг Ардчилсан нам “МӨХӨЛ”-ийн ирмэгт ойртжээ. Ингэж хэлэхийн учир нь Ардчилсан нам хоёр хуваагдаж, зөрчил, маргаан, үл ойлголцол, талцал хуваагдлын идээ бээрт автсан байна. Энэ маргаан 31 жил үргэлжлэв. Хэзээд нэгдмэл байж ирээгүй Ардчилсан намын дотоод хэрүүл, тамганы төлөөх тэмцэл эхнэр, нөхрийн маргаанаас дор болж шалдаа буулаа.

АРДЧИЛСАН НАМ ”ХОГИЙН САВ” БОЛЛОО

Ардчилсан нам дотроосоо ялзраад удаж байгааг намын гишүүд, дэмжигчид дуу нэгтэй хэлж байна. Дарга гэх сэнтийн араас хөл алдан хөөцөлдөх нөхөд цайлган сэтгэлтэй намдаа үнэн ч байж ирсэн гишүүдийн мөнгөөр халаасаа дүүргэж,  тэдний мөнгийг хайр найргүй цацаж яваа сурагтай. 31 жилийн хугацаанд хэн дуртай нь АН-д элсэж, хүссэн үед хаяад явдаг, намын босго, цензургүй нам гэж Ардчилсан намыг хэлэх байх. Магадгүй энэ нь намын ардчилал юм болов уу?

Энэ намын хаалгыг татаагүй улс төрчид байхгүй болж. Намаасаа хөөгдөгсөд, намд гологсод, худал хэлэх попрогч нар, “хулгай” хийсэн улс төрчид гээд дурын нэгэн Ардчилсан нам руу сарвайдаг, тэднийг голохгүй тосоод авдаг нь энэ намыг “ХОГИЙН САВ” болгож орхилоо.

“ГУДАМЖ”-ны тэмцэгч нэрт Ж.Батзанданг АН тосоод авав. Хэдэнтээ намын квотоор их хуралд суусан тэрбээр намаасаа хөөгдөж, ШИНЭ нам байгуулж хариу барив. Үүнд Лу.Болд нэгдэж Ардчилсан нам руугаа нулимаад орхисон.  Нэгэн цагт намын дарга хийж явсан УИХ-ын гишүүн Н.Алтанхуяг мөн л намаасаа хөөгдөөд, Ерөнхийлөгчийн сонгуулийн сургаар төрхөмдөө буцсан. Ерөнхийлөгчийн суудалд санаархсан боловч сачий нь хүрсэнгүй, эцэстээ өлсгөлөнгийн хэлбэрт шилжив. Төрийн тэргүүний суудал горилогч Босоо С.Ганбаатар МАХН-аасаа нүүр буруулж, АН-ийг сонгосон ч дагздуулав. Шинэ гишүүнд бүү хэл намын луйхаруудад зайгаа тавьж өгдөггүй “ЦЭНХЭР”-үүд Босоо Ганбаагийн улс төрийн карьерийг ингээд дуусгав бололтой.

Түүнчлэн УИХ-ын гишүүн асан Ц.Оюунгэрэл 29 жил зүтгэж ирсэн Ардчилсан намаасаа өөрийн хүсэлтээр захиа бичиж намаасаа татгалзаж, Иргэний оролцоотой гурван тогтолцоот намаа байгуулаад тун чиг завгүй явна. Ардчилсан намд орсон, гарсан улс төрчдийг дурдвал урт жагсаал үргэлжилнэ.

Хаа газрын “гологдмол” гишүүдийг намдаа элсүүлэн авч дараа нь хөөж гаргадаг, зарим нь хаяад явдаг Ардчилсан намд С.Жавхлан хүртэл элссэн байдаг. Харин тэрээр явцгүйг мэдсэн үү урлагийн замаа хөөхөөр болж АН-ыг орхиж байгаагаа мэдэгдсэн билээ. Намынхаа гишүүд, дэмжигчдэд хөөгдөж, үг хэлж ч чадаагүй “Нэргүй”  улс төрч Э.Бат-Үүл буцаад АН-даа ирж, бүр Сонгинохайрхан дүүрэгт нөхөн сонгуульд үзэх гээд нэр дэвшээд явж байна.

Муу нэрт, луу данст С.Эрдэнэ бууриа сахиж үлдсэн ч намынхаа эв нэгдлийг хангаж чадсангүй. Нам доторх “цөөвөр чоно”-оос намаа хамгаалсан ч түүний улс төрчийн замнал цааш үргэлжлэхэд тун бэрх боллоо.

Нэгэн үед хүчтэй гэж хэлэгдэж байсан Ардчилсан нам “ХОГИЙН САВ”-аа цэвэрлэхгүй болбоос ялзарч дуусах нь...

АРДЧИЛСАН НАМЫН ХӨГШЧҮҮД СААРАЛ ОРДОН РУУ САНААРХАВ

Ухаан сийрэг нэг нь бууриа сэлгэж байхад урдах замаа хардаг нэг нь “явуургүй” болчихсон намынхаа суудлын төлөө дотроо цэц булаацалдаж байна. Тамганаас өөр энэ намд юу ч байхгүй. Өөрийн гэсэн намын байр байхгүй аж.

Хоёр дарга, хоёр тамгатай Ардчилсан намын эрх мэдлийн төлөөх дайн үргэлжилсээр, хэзээ дуусах нь тодорхойгүй. Намын дайнд хэн ялах нь үл мэдэгдэнэ. Тодруулбал, Их хуралд суусан 12 гишүүн нь нэг тал, намаа харуулдан суугаа хэд нь нөгөө тал болж нам дотроо дайтаж байна.

Урдаа барих оюунлаг боловсон хүчингүй ардчилсан нам залуучуудаар дутагдаж байна. Ардчилсан залуучуудын холбоо нь хүртэл эрх мэдэлтэй хэн нэгний улыг шагайж буй аж. Учир нь жил жилийн АН сонгуульд “Хөгшчүүдээ” өмнөө барьж парламентад суулгах гэж үзэж буй нь бухын дордохыг харж үнэг турж үхнэ гэдэг болж байна.

Тус намд залуучуудын байр суур хэрэггүй аж. Саарал ордонд суухгүй л бол амь тавих гэж байгаа мэт АН-ын хууччуул залуустаа зай тавьж өгөхгүй өөрсдөө зүтгэсээр байна. Түүний нэгэн жишээ бол УИХ-ын нөхөн сонгуульд Э.Бат-Үүл, Б.Гарамгайбаатар нар нэр дэвшсэн явдал юм. Тэд муу нэртэй, улс төрийн хар түүхтэй улс. Гэтэл 60 настай ч биологийн нас нь 20-той хэмээн нөхөн сонгууль руу сарвайж байх юм.

Биеэ засаад гэрээ, гэрээ засаад төрөө гэх үг бий. Тэд өөрсдийнхөө асуудлаа шийдэж чадаагүй байж төр барихаар санаархаж байгаа ч ичмээр харагдаж байна.

Тэртээ 31 жилийн өмнө байгуулагдаж байсан Ардчилсан нам бүрэн шинэчлэгдэх цаг болжээ. Үгүй бол ингээд энэ намын түүх дуусах нь.

Төр.мн