Улаанбаатар хотыг УТААГҮЙ болголоо гэж хэдэн жилийн өмнө шоудаж, энэ шоуны “АЛДАР”-ыг ямбатай хамт “Тавантолгой түлш” ХХК эдэлсэн байдаг. Чухам л хамгийн сайн ажиллаж байгаа гэж төр засгаар магтуулж явсан уг үйлдвэр Ц.Даваацэрэнгийн гарт очсоноор “ДАМПУУРЧ” орхих нь тэр. Учир нь Ц.Даваацэрэн “Тавантолгой түлш” ХХК-ийн гүйцэтгэх захирлаар очсон тэр цагаас хойш түлшээ ч үйлдвэрлэж чадахаа больж,  Хятадаас хагас коксожсон нүүрс турших дээрээ ч тулж, Утаа ч талийлаа, угаартаж ч үхлээ, түлшний НЭМЭР ч, үр дүн алга боллоо. 

“Эрдэнэт” үйлдвэрийн захирлаар ажиллаж байхдаа Эрүүгийн гэмт хэрэгт холбогдон шалгагдаж байсан тэрбээр “хэргээс мултрах” гэж ажлаа сольж “Тавантолгой түлш” ХХК-д ирсэн гэж хэлж болохоор.

Ц.Даваацэрэнг “Эрдэнэт үйлдвэр”-ийн захирлаар ажиллаж байхдаа эрх мэдэл, албан тушаалаа урвуулан ашиглаж, онц их хэмжээний хохирол учруулсан хэргээр АТГ-ын Мөрдөн шалгах хэлтсээс шалгаж байсан. Мөн түүнийг 2019 оны есдүгээр сард хойшлуулшгүй ажиллагаа явуулж, баривчилж байсан юм. 

     Ингээд намдаа “мөргөж”, “сайн ах” нараасаа “гуйж гуйж” “Тавантолгой түлш” ХХК-ийн захирлаар ирэх нь тэр.  Гэхдээ ЗАСРАХГҮЙ нэгэн гэж бий. Явсан газар бүртээ хэрэгт холбогдож явдаг тэрбээр “Тавантолгой түлш” ХХК-ийг “дампууруулаад” зогсохгүй, эрх мэдэл, албан тушаалын байдлаа урвуулан ашиглаж орхиж. 

      Өнгөрсөн 2022 онд “Тавантолгой түлш” ХХК-ийн гүйцэтгэх захирал Ц.Даваацэрэн тус компанийн ерөнхий нягтлан бодогч н.Билэгдэмбэрэл нарыг хууль хяналтын байгууллагаас шалгаж, АТГ-ын мөрдөгчид Ц.Даваацэрэнгийн гэр болон албан өрөөнд нэгжлэг хийж, санхүүгийн бичиг баримтыг лацдаж, бэлэн мөнгийг эд мөрийн баримтаар хураан авсан байдаг. 

Түүнийг эрх мэдэл, албан тушаалын байдлаа урвуулан ашиглаж, бусдад давуу байдал олгож, их хэмжээний авлига авсан байж болзошгүй үндэслэлээр шалгаж байсан.

Ц.Даваацэрэн нь зүүн бүсийн сайжруулсан шахмал түлшний үйлдвэрийн бүтээн байгуулалтын хүрээнд баригдах төмөр замын ажлыг гүйцэтгэхдээ бусдад давуу байдал олгосон. Тодруулбал, тус замын ажлыг гүйцэтгэх тендер зарлахгүйгээр, гэрээ байгуулахгүйгээр бусдад их хэмжээний мөнгө шилжүүлэх даалгавар өгсөн байж болзошгүй, өөрийн хамаарал бүхий компанид давуу байдал олгож, гэрээ хийхгүйгээр таван тэрбум төгрөг өгсөн гэх үндэслэлээр шалгасан байдаг. 

     Утааг бууруулах зорилгоор сайжруулсан шахмал түлш үйлдвэрлэж Тавантолгой түлш ХХК-ийг байгуулсан байдаг. Гэтэл буурсан утааг улам нэмж, түлшээ үйлдвэрлэж чадахаа больж, эцэст нь хагас коксжих түлш турших дээрээ тулж байгаа нь Ц.Даваацэрэнгийн “МУУГИЙНХ” бөгөөд чадваргүйн илрэл.

    Эрүүгийн гэмт хэргээр хэдэнтээ шалгагдаж байсан этгээд энэ тэнд дамжин албан тушаал хашиж яваа нь хэр шударга бөгөөд үнэнд нийцэх вэ?

Чухам яагаад эрүүгийн гэмт хэргээр шалгагдаж байгаа хүнийг албан тушаалд томилж байна вэ? АТГ-аас “Тавантолгой түлш” ХХК-ийн 2019-2023 оны худалдан авах ажиллагааны төлөвлөлт, хэрэгжилтийг судлан үзэж, гэмт хэргийн шинжтэй үйлдлийг шалгуулахаар Мөрдөн шалгах хэлтэст шилжүүлсэн. Түүнчлэн Тавантолгой Түлш ХХК-ийн захирал Ц.Даваацэрэнд холбогдох хэргийг ч шалгаж байна.

    "Тавантолгой түлш" компанитай холбоотой авлига, албан тушаалын хэрэг, мөнгө идсэн, уусан, завшсан  зэрэг олон үйлдэл байгаа тул Монгол Улсын Ерөнхий сайд Л.Оюун-Эрдэнэ хариуцлага тооцох тухай асуудлыг хөндөн ярилцаж байгаа бололтой. Татвар төлөгчдийн мөнгийг САЛХИНД ХИЙСГЭДЭГ, өөрсдийгөө ШАГНАДАГ, ямар ч бичиг баримтын бүрдэл байхгүй, архивын материалгүй гээд хэсэг бүлгийн "ӨМЧ" болсон тус үйлдвэрийг ДАМПУУРАХААС нь өмнө АВРААЧ. Иймдээ ч хууль хяналтын байгууллага Тавантолгой түлш компанитай холбоотой асуудлыг шуурхай шийдвэрлэхээр ч ажиллаж байгаа аж. Хаврын улс төрч эхэллээ. Энэ үеэр Монгол Улсын засгийн газар Эрүүгийн хэрэгт холбогдогч Ц.Даваацэрэнд ХАРИУЦЛАГА ТООЦОХ асуудлыг ч ярих аж. 

Төр.мн