МАН-ын дарга, Монгол Улсын Ерөнхий сайд Л.Оюун-Эрдэнэ Увс аймгийн Улаангом хотын  иргэд, сонгогчидтой уулзлаа.  Тэрбээр   уулзалтын эхэнд 2024 оны УИХ-ын сонгуулийн онцлог болон Үндсэн хуульд өөрчлөлт оруулж, холимог тогтолцоонд шилжсэнээр Монгол Улс анх удаа 126 гишүүнтэй парламенттай болж, нийгмийн төлөөлөл нэмэгдэх боломж бүрдсэн талаар танилцууллаа.

“Энэ сонгууль бол “Ард түмэн ялах уу, авлигачид ялах уу” гэдгийг шийдэх чухал сонгууль.

МАН улстөрчдийг тойрогт өрсөлдүүлж, мэргэжлийн экспертүүдийг жагсаалтад нэр дэвшүүлсэн нь шинэ хүмүүст боломж олгох зорилготой” гэдгийг намын дарга Л.Оюун-Эрдэнэ тайлбарлаад “Засгийн газрын Шинэ сэргэлтийн бодлого бол мартагдсан зорилгоо санах, алдагдсан зарчим руугаа буцах, авлигатай нам харгалзалгүй тэмцэх та бидний хамтын эр зориг юм” гэдгийг онцлов. Засгийн газраас улсын хэмжээнд хийж хэрэгжүүлсэн ажил, бодлогын талаар Ерөнхий сайд товч танилцуулав. 

•    Цар тахлыг олон улсын дунджаас тав дахин хохирол багатай даван туулж, 1.4 сая иргэн эрт илрүүлэгтээ хамрагдаж чадлаа.
•    Боомтын боомийг тайлж, экспортын гурван шинэ төмөр замын бүтээн байгуулалтыг үргэлжлүүлж байна.
•    “Эрдэнэт”-ийн 49 хувийг төрийн мөнгөөр луйвардаж авсан системийн авлигыг таслан зогсоолоо. 
•    “Оюутолгой”-н Дубайн гэрээг цуцалж, 2.3 тэрбум ам.долларын өрийг тэглүүлж, гүний уурхайг ашиглалтад оруулав. 
•    “Эрдэнэс Тавантолгой” компанид онцгой дэглэм тогтоож, нүүрсний хулгайг илчилж, экспорт түүхэн амжилтыг тогтоолоо.
•    Хөгжлийн банкны чанаргүй зээлийн өрийг цэгцэлж, хаадын нэрээр гаргасан бондыг төлж, гадаад өрийн барьцаанаас чөлөөлөгдөв.
•    Хөтөлийн цемент, Дарханы төмөрлөгийн үйлдвэрийн хууль бус хувьчлалыг Засгийн газар хүчингүй болгов.
•    E-Mongolia цахим засаглалыг нэвтрүүлж, тусгай сангуудын мэдээллийг ил тод болгож, иргэдийн мэдэх эрхийг хангав.
    Үүний үр дүнд Монгол Улсын ДНБ 37 их наядаас 68.9 их наяд төгрөг болж, гадаад валютын нөөц 5.0 тэрбум ам.долларт хүрч, түүхэн амжилтыг тогтоов. Иргэдийн 1072 хувьцаа амилж, хуулийн дагуу ногдол ашгаа тогтмол хүртэж эхэлсэн юм.  Мөн Увс аймагт 2016-2024 он улсын төсөв болон гадаадын зээл, тусламжийн эх үүсвэрээр нийт 472 тэрбум төгрөгийн хөрөнгө оруулалтын төсөл, арга хэмжээг хэрэгжүүлжээ. 

-Увс нуур-Улаангом чиглэлийн хатуу хучилттай авто замын төслийн хөрөнгө оруулалтыг шийдвэрлэж, эхний үе шатны 26.3 км замын тендерийг зарлаад байна.
-Азийн хөгжлийн банкны санхүүжилтээр Ховд-Улаангом чиглэлийн 163.3 км хатуу хучилттай авто замыг хэрэгжүүлэхээр  тендер зарлагдаж, сонгон шалгаруулалт хийгдэж байна.
-“Боршоо боомт”-ыг өргөтгөн шинэчилж, нийт 4.680 м2 талбайг шинээр барилгажуулан, нэвтрэх зорчигчийн тоо 4.8 дахин, ачаа тээврийн хэрэгслийн тоо гурав дахин, суудлын машины тоо 6.7 дахин нэмэгдлээ. 

-Өнгөрсөн дөрвөн жилд Увс аймагт  долоон сургууль, 10 цэцэрлэг, таван соёлын төв, долоон дотуур байр,  спортын заалны барилгыг шинээр барьж, ашиглалтад оруулсан.

-Аймгийн нэгдсэн эмнэлгийн 50 ортой хүүхдийн эмнэлэг,  дөрвөн сумын Эрүүл мэндийн төвийн байрыг шинээр барьж, эмнэлгүүдийг шаардлагатай тоног төхөөрөмжөөр хангаж, аймгийн нэгдсэн эмнэлгийн өргөтгөлийг шинээр барьж байна.
-Олон жилийн хугацаанд гацаад байсан Увс аймгийн хөгжимт драмын “Ойрад” театрын барилга угсралтын ажилд шаардагдах хөрөнгийг шийдвэрлэж, ашиглалтад оруулахаар ажиллаж байна. 

УИХ-ын сонгуулийн хоёрдугаар тойрог буюу баруун бүс 10 мандаттай. Тус тойрогт МАН-аас “Шинэ хоршоо” хөдөлгөөнийг манлайлан, хэрэгжүүлж буй Д.Амарбаясгалан УИХ-д дарааллан сонгогдон ажиллаж буй туршлагатай парламентч С.Бямбацогт, Ч.Хүрэлбаатар, Б.Чойжилсүрэн, Б. Баярсайхан, баруун бүсийн хөгжлийг цогцоор нь төлөвлөх, эдийн засгийн коридорын төслүүдийг амжилттай хэрэгжүүлэх, хойд, урд хөрштэйгөө болон гадаад харилцаагаа хөгжүүлэхэд Э.Болормаа Шинэ сэргэлтийн бодлогыг амжилттай хэрэгжүүлэх, төмөр зам, авто замын шинэ төслүүдийг хэрэгжүүлэх, баруун бүсийн хөгжлийг шинэ шатанд гаргах хүн гэдэгт итгэж Ц.Цэрэнпунцаг, мал аж ахуйн салбарыг шинэ шатанд гаргаж малчдын ахуй амьдралыг дээшлүүлэхэд, Монгол Улсын Ерөнхийлөгчийн санаачилсан “Хүнсний хувьсгал” хөтөлбөрийг эрчимжүүлж, монгол хүн эх нутагтаа өөрийн гараар бий болгосон эрүүл хүнсийг хэрэглэх боломжийг бүрдүүлэх чиглэлд хэрэгтэй хүн хэмээн үзэж З.Мэндсайхан, эрүүл мэнд болон нийгмийн салбарын шинэчлэл, иргэн төвтэй эрүүл мэндийн тусламж үйлчилгээг хүргэх, эрүүл мэндийн салбарт ажиллаж буй эмч,эмнэлгийн ажилчдын эрх зүйн байдлыг хамгаалах, зорилтыг хэрэгжүүлэхэд хэрэгтэй гэж С.Энхболд, шат дараалан бэлтгэгдсэн шударга төрийн албан хаагчдын төлөөлөл Б.Заяабал нарыг нэр дэвшүүлж буй бөгөөд МАН-ын нэр дэвшигчдийг багаар нь дэмжихийг намын дарга Л.Оюун-Эрдэнэ уриаллаа.