Монгол Улсын Засгийн газар, Европын сэргээн босголт, хөгжлийн банктай хамтран ажиллах стратегийн баримт бичгийн хүрээнд Монгол улсад хэрэгжүүлэх 300 сая ам.долларын Санхүүжилтийн ерөнхий хэлэлцээрийг 2019 оны 4 дүгээр сард байгуулж талууд гарын үсэг зурсан ба мөн оны 9 дүгээр сард Монгол Улсын Засгийн газрын тогтоолоор Төслийн жагсаалтыг баталж, Монгол улсын Улсын Их Хурлаар соёрхон баталсан.
Тус тогтоолоор нийт 6 төсөл хэрэгжихээр батлагдсаны нэг нь “Улаанбаатар хотын төвлөрсөн дулаан хангамжийн төсөл” юм.
Төслийг ЕСБХБ-ны 10 сая ам.долларын хөнгөлөлттэй зээл, Европын холбооны 4.5 сая еврогийн буцалтгүй тусламж, Австри Улсын Засгийн газрын 1.5 сая.еврогийн техникийн туслалцааны санхүүжилтээр 2020-2025 онд хэрэгжүүлж байна.
“Улаанбаатар хотын төвлөрсөн дулаан хангамжийн төсөл” нь төвлөрсөн дулаан хангамжийн системд сүүлийн 20 гаруй жилийн хугацаанд анх удаа хийгдэж байгаа гадны томоохон хөрөнгө оруулалт төдийгүй Европын сэргээн босголт, хөгжлийн банкнаас манай улсын эрчим хүчний салбарт хамтран ажиллаж байгаа анхны төсөл юм.
Төслийн хүрээнд:
1. Дамжуулах сүлжээний өргөтгөл шинэчлэл /8а,б,в,г магистралийн өргөтгөл, 5в-12а магистралийн холбоос шугам, Даралт өргөх Насос станцын өргөтгөл/
2. Улаанбаатар хотын шинэ төлөвлөлтийн бүсүүд рүү шинээр дамжуулах шугам татаж төвлөрсөн дулаан хангамжийн хамрах хүрээг тэлэх.
3. Дулааны хангамжийн системд орчин үеийн шинэ техник, технологи нэвтрүүлэх.
4. Компанийн чадавхийг сайжруулах, ТЭЗҮ боловсруулах, сэргээгдэх эрчим хүчний судалгаа хийх, Төсөл хэрэгжүүлэх нэгжид дэмжлэг үзүүлэх зөвлөх үйлчилгээ гэсэн 4 үндсэн чиглэлээр 16 нэр төрлийн ажил 40%-100% гүйцэтгэлтэй хэрэгжиж байна.
Мөн Улаанбаатар хотын шинэ төлөвлөлтийн 3 бүсэд /Толгойт, Амгалан, Бичил хороолол/ дулааны шугам шинээр байгуулж төвлөрсөн дулаан хангамжийн системийн хамрах хүрээг тэлж, Нийслэлийн гэр хорооллын дахин төлөвлөлт, Хэсэгчилсэн ерөнхий төлөвлөгөөний дагуу бий болох орон сууцны хороолол, нийгэм ахуйн барилга байгууламжууд, бага, дунд чадлын халаалтын зуухтай газруудыг эх үүсгүүрүүдийн хүчин чадлын өргөтгөлтэй уялдуулан төвлөрсөн дулаанаар хангах техникийн боломж бүрдүүлж байна.
Үүний нэг нь буюу III, IV хорооллын эцэс, Бичил 7-р хорооллыг хангах 2х400 мм-ийн голчтой 1.3 хос.км дулааны шугамыг 2024.11.24-ний өдөр ажиллагаанд залгаж туршилт тохируулга, зүгшрүүлгийн ажлыг хийж гүйцэтгээд өнөөдөр байнгын ажиллагаанд оруулах Улсын комиссоор хүлээн авлаа. Тус шугамыг ажиллагаанд оруулснаар өнөөдрийн байдлаар орон сууцны 29 барилга, 1 сургууль, 2 цэцэрлэг, 1 өрхийн эмнэлэг, үйлчилгээний 18 нийт 51 барилгын 10 Гкал/ц-ийн хэрэглээг төвлөрсөн дулаанаар хангаж эхэлсэн ба цаашид 30 Гкал/ц-ийн хэрэглээг хангах боломжтой болоод байна.
Төслийн үр дүнд Монгол Улсын Засгийн газрын Шинэ сэргэлтийн бодлого-Эрчим хүчний сэргэлт, Агаар орчны бохирдлыг бууруулах үндэсний хөтөлбөрийн биелэлтийг хангах, Нийслэлийн гэр хорооллын дахин төлөвлөлт, Хэсэгчилсэн ерөнхий төлөвлөгөөний дагуу бий болох орон сууцны хороолол, нийгэм ахуйн барилга байгууламжууд, бага, дунд чадлын халаалтын зуухтай газруудыг төвлөрсөн дулаанд холбох техникийн боломжийг дамжуулах сүлжээний хувьд бүрдүүлэх бөгөөд дулаан хангамжийн системд орчин үеийн дэвшилтэт техник технологийг нэвтрүүлж үр ашгийг дээшлүүлэх юм.
Like
0
Зөв
0
0
Буруу
0
Воов
0
Уйтгартай
0
Дуртай
Үндсэн хуулийн өдөрт зориулсан үндэсний бөхийн барилдаанд улсын арслан Ц.Бямба-Отгон түрүүллээ
© 2013-2023. Вэб сайт бүтээсэн: Tsast Solution LLC
