Монгол Улсын Шадар сайд, УОК-ын дарга С.Амарсайхан өнөөдөр УОК-ын шуурхай штабт ажиллаж, өвөлжилтийн бэлтгэл ажлыг хангах болон агаарын бохирдлыг бууруулах чиглэлээр авч хэрэгжүүлж буй арга хэмжээтэй танилцаж, үүрэг чиглэл өглөө.
Тухайлбал, Нийслэл, аймаг, орон нутгийн эрүүл мэндийн байгууллагууд баярын өдрүүдэд хүн амын эрүүл мэндэд анхаарч ажиллах; Эрүүл мэндийн даатгалын санхүүжилт хийгдээгүй аймаг, орон нутгийн эмнэлгүүдийн мэдээллийг тодорхой болгож, шуурхай шийдвэрлэх; 21 аймгийн шуурхай штабын үйл ажиллагаанд хяналт тавих, үнэлэлт дүгнэлт хийх, Шуурхай штабын удирдлагуудыг үүрэг чиглэлээр хангаж ажиллах; Авто тээврийн үндэсний төв, Зам тээврийн яамны ажилтан албан хаагчид орон нутгийн бүх чиглэлийн зам харгуйг цэвэрлэх, давс бодис сайтар цацаж, аюулгүй байдлыг хангаж ажиллахыг үүрэг болголоо.
Монгол Улсын хэмжээнд 11 аймгийн 34 суманд “цагаан зудархуу” нөхцөл байдалтай байна. Сарын дунджаар авч үзвэл нутгийн баруун хагаст олон жилийн дунджаас хүйтэн, зүүн хагаст дунджийн орчим, хур тунадас баруун болон төвийн аймгуудын зарим газраар олон жилийн дунджаас ахиу цас орох төлөвтэй байна. Улсын хэмжээнд 17 мянга гаруй өрх, 7 сая гаруй толгой мал отор, нүүдэл хийж байна.
“Шинэ хоршоо” хөдөлгөөн эхэлснээс хойш нийт 6599 шинэ хоршоо байгуулагдаж, 68.500 гишүүн элсжээ. Өнөөдрийн байдлаар 4877 хоршооны 16.009 малчинд 551.8 тэрбум төгрөгийн зээл олгогдоод байна. Зээлд хамрагдсан малчдын дийлэнх нь үржлийн мал худалдан авсан бол бусад нь Стандартын шаардлага хангасан малын хашаа, хороо, саравч худалдан авч, шинээр барьсан, Мал аж ахуйн үйлдвэрлэлд зориулагдсан техник, технологи, тоног төхөөрөмж худалдан авсан, Мах сүү цагаан идээ бэлтгэх, боловсруулах чиглэлийн үйлдвэрлэл эрхэлсэн, Малын тэжээл, тэжээлийн ургамал тариалах, тэжээл үйлдвэрлэлийн цех байгуулсан, Мал бордох чиглэлийн үйл ажиллагаа явуулсан зэргээр зээлээ үр дүнтэй зарцуулжээ.
Агаарын бохирдлыг бууруулах чиглэлээр урт богино хугацааны төлөвлөгөөг боловсруулсан бөгөөд 2025.01.10-ны өдрөөс “Яндангүй бүс тогтоох” хяналт шалгалтын нэгдсэн арга хэмжээг хэрэгжүүлэхээр төлөвлөжээ. Мөн сайжруулсан шахмал түлшний хэрэглээнд хяналт тавих ажлыг ДЗДТГ, Цагдаа, Онцгой байдлын байгууллага хамтран зохион байгуулах, Агаарын чанарын өдөр тутмын мэдээг нэгтгэн боловсруулж холбогдох удирдлагуудыг мэдээллээр хангах, Экологийн цагдаа, Захирагчийн ажлын албаны “Сайжруулсан шахмал түлшний хяналтын хэлтэс” хамтран 8 товчоонд хяналт тавих, Нийслэлийн нутаг дэвсгэрт түүхий нүүрс ашиглах тусгай зөвшөөрөл бүхий төрийн өмчийн сургууль, цэцэрлэг, хороо, цагдаагийн байгууллагыг халаадаг 174 уурын зууханд хяналт шалгалт хийх зэрэг ажлыг шуурхай зохион байгуулж байна.
Харин угаарын хийн хордлогын талаар цаашид авч хэрэгжүүлэх арга хэмжээний хүрээнд Түргэвчилсэн оношилгооны багаж, тоног төхөөрөмж, лабораторийн хүчин чадлыг нэмэгдүүлэх, Угаарын хийн хордлогын шалтгаан, эрсдэлт хүчин зүйл, урт хугацааны үр дагаврыг судлах, Иргэдийн мэдлэг, дадлыг сайжруулах, мэдээлэл, сургалт, сурталчилгааны хүртээмжийг нэмэгдүүлэх, мэдээлэл түгээх сувгийг нэмэгдүүлэх, Угаарын хийн хордлого, химийн бодисын хордлогыг тандан, бүртгэх нэгдсэн программ хангамжтай болох чиглэлд анхаарч ажиллаж байна.
Like
0
Зөв
0
0
Буруу
0
Воов
0
Уйтгартай
0
Дуртай
Үндсэн хуулийн өдөрт зориулсан үндэсний бөхийн барилдаанд улсын арслан Ц.Бямба-Отгон түрүүллээ
© 2013-2023. Вэб сайт бүтээсэн: Tsast Solution LLC
