Монгол Улсын Төрийн албаны зөвлөл төрийн албан хаагчийн улсын нэгдсэн тоо бүртгэлийг хөтлөх хуулиар хүлээсэн чиг үүргийнхээ дагуу төрийн албаны “Хүний нөөцийн удирдлагын мэдээллийн тогтолцоо цахим систем”-ийг хөгжүүлж, 4271 байгууллагыг хамарсан, нийт 228820 албан хаагчийн мэдээлэл бүхий их өгөгдлийн суурийг бий болгоод байна.
Төрийн албаны “Хүний нөөцийн удирдлагын мэдээллийн тогтолцоо” цахим системийн танилцуулах уулзалт өнөөдөр (2025.01.31) боллоо.
Системийн танилцуулга уулзалтад төрийн байгууллагуудын албан хаагчдын төлөөлөл, системийг хөгжүүлсэн “Дижитал Воркс”, “Энгүй шийдэл”, “Leader vision” компанийн хамт олон оролцов.
Уулзалтыг Төрийн албаны зөвлөлийн дарга Л.Цэдэвсүрэн нээж, шинээр хөгжүүлсэн зарим модуль, дэд системүүдийн талаар Төрийн албаны зөвлөлийн гишүүн Ц.Амартөгс танилцууллаа.
• Төрийн албанд гарч байгаа хууль бус томилгоог төлөвлөгөөт шалгалт болон өргөдөл, мэдээллийн дагуу хянадаг байв. Цаашид зөрчилтэй томилгооны мэдэгдэл цахим системд ирж, иж бүрэн хянах боломжийг бүрдүүллээ. Ингэснээр хууль бус томилгооны улмаас төрд хохирол учрахаас урьдчилан сэргийлж, мэдсэн даруйд таслан зогсоох боломжтой болж байна.
Төрийн албан хаагчийн оролцооны модулийг хөгжүүлэв. Үүний үр дүнд төрийн албан хаагч нэгдсэн систем дэх хувийн хэргийн мэдээлэлтэйгээ танилцах, мэдээллийн үнэн зөв байдалд хяналт тавих, засвар хийлгэх боломжтой болж байгаа юм. Хүний нөөцийн мэргэжилтний баталгаажуулсан анкетийг дахин гараар бичих шаардлагагүй болж, QR кодоор баталгаажуулсан анкетаа илгээх, хэвлэх боломж бүрдлээ. Түүнчлэн төрийн албан хаагч мэргэжил, шаардлага, ур чадвартаа тохирох сул орон тооны мэдээллийг системээр дамжуулан үзэх, тэдгээр орон тооноос сонголт хийх, шалгалтад орох, карьераа төлөвлөх боломжийг нэмэгдүүллээ.
Төрийн албаны “Хүний нөөцийн удирдлагын мэдээллийн тогтолцоо” цахим системийн модулиудыг хөгжүүлж нэвтрүүлсний үр дүнд төрийн албаны их өгөгдлийг бий болгох, судалгаа шинжилгээнд суурилсан шийдвэр гаргах тогтолцооны суурь тавигдаж, шаардлагатай мэдээллийг богино хугацаанд гаргах, дүн шинжилгээ хийж боловсруулах боломж бүрдэж байна.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
