Төгөлдөр хуурын багш, шүүгч Батнасангийн Ичинхорлоог онцолж байна.

Тэрбээр хөгжмийн урлаг, боловсролын салбарт өөрийн өвөрмөц арга барил, манлайлах чадвараараа ялгарч, АНУ-д ажиллах хугацаандаа зөвхөн Монгол төдийгүй олон улсын авьяаслаг сурагчдыг бэлтгэн, нэр хүндтэй олон улсын хөгжмийн тэмцээнүүдэд 40 гаруй сурагчийг амжилттай оролцуулан 1,2,3 байр удаа дараалан эзэлсэн авьяаслаг багш.

Түүний шавь нар Нью-Йоркийн алдарт Карнегийн танхимд (Carnegie Hall) уригдан тоглож, Монгол болон олон улсын хөгжмийн боловсролын чанарыг дэлхийд таниулж яваа. Залуу хэдий ч Б.Ичинхорлоо АНУ-д зохиогдож буй төгөлдөр хуурын нэр хүндтэй олон улсын тэмцээнүүдэд шүүгчээр урилгаар ажиллаж эхэлсэн бөгөөд өөрийн мэдлэг, туршлага, мэргэжлийн ур чадвараараа хөгжмийн салбарт үнэлэгдэж буй.

Тэрбээр Сан Франциско хот дахь төгөлдөр хуурын сургуулийн ахлах багшаар ажиллаж байна. Түүнтэй цөөн хором ярилцлаа. 

-Танд энэ өдрийн мэнд хүргэе. Урлаг тэр дундаа төгөлдөр хуурын багш, шүүгчээр ажиллаад багагүй хугацаа өнгөрчээ. Энэ хугацаанд Монгол хүүхдүүд хэр их хичээллэж, бас төгөлдөр хуурыг сонирхон судалж байна вэ? 

-Сайн байна уу? Энэ өдрийн мэндийг хүргэе. Тийм ээ, төгөлдөр хуурын багш, шүүгчээр ажиллаад аль хэдийн олон он жилийг ардаа орхижээ. Энэ хугацаанд харж, мэдэрсэн зүйлс үнэхээр сэтгэл догдлом сайхан байдаг. Монгол хүүхдүүдийн хөгжмийн боловсролд тэмүүлсэн хүсэл, зүтгэл жилээс жилд өсөн нэмэгдэж байгааг бахархалтайгаар хэлмээр байна. Төгөлдөр хуурын урлагт дурласан, хичээнгүйлэн суралцаж буй олон залуу авьяастнууд төрөн гарч, тэдний нүдэнд гялалзах хүсэл мөрөөдлийг харах сайхан.

Өнөөдрийн Монголын хүүхдүүд төгөлдөр хуурын урлагаар дамжуулан тэвчээр, уран нарийн мэдрэмж, дотоод сэтгэлийн гоо сайхныг хөгжүүлж, дэлхийн тайзнаа нэрээ дурсгах мөрөөдөлдөө тэмүүлж буйг харахад ирээдүй гэрэлтэй мэт санагддаг. Тэдний эрмэлзэл, хичээл зүтгэл багш нарын урам зоригийг улам бүр бадрааж өгдөг юм.

-АНУ-ын Сан Франциско хотын Калифорни мужийн Их Сургуулийг төгсөхдөө онц дүнтэй төгсөж, "Төгсөгчийн Онцгой Амжилтын Шагнал"-аар (Graduate Distinguished Achievement Award) шагнагдсан. Тэр үеийн сэтгэгдэл ямар байсан бэ? 

-Тэр мөч үнэхээр үгээр илэрхийлэхийн аргагүй их баяр бахдал, догдлол дүүрэн байсан. Өдөр шөнөгүй нойр хоолгүй зүтгэж, уйгагүй хичээллэсэн олон жилийн минь хөдөлмөрийг үнэлж, тэр олон авьяаслаг оюутнуудаас шалгаруулан "Төгсөгчийн Онцгой Амжилтын Шагнал"-аар шагнасан нь миний хувьд асар том бахархал, урам зоригийн эхлэл болсон юм. Одоо ч гэсэн миний нэр сургууль дээр “Шилдэг төгсөгч”-ийн нэрсийн дунд алтан үсгээр бичигдэн үлдсэн байдаг. Үүнийг харах бүртээ тэр үед өөрөөрөө, өөрийнхөө туулсан зам мөрөөр, амжилтаараа маш ихээр бахархаж байсан. Тэр халуун дулаан мэдрэмжийг дахин дахин санадаг. Энэ шагнал надад зөвхөн нэгэн төгсөлтийн баярыг бус, амьдралдаа өөрийгөө ялж чадсан нэгэн том ялалтыг авч ирсэн.  

-Шавь нар тань Нью-Йоркийн алдарт Карнегийн танхимд (Carnegie Hall) уригдан тоглож, Монгол болон олон улсын хөгжмийн боловсролын чанарыг дэлхийд таниулж яваа. Монгол хүүхдүүдийн авьяас ирээдүй хэр байна гэж харж байна вэ?

-Карнегийн танхимд шавь нараа тоглож байгааг харах үнэхээр бахархмаар байдаг. Монгол хүүхдүүд ч гэлтгүй, ер нь аливаа орны хүүхдүүд хүсэл тэмүүлэлтэй байхад гайхалтай амжилтад хүрч чаддагийг би өдөр бүр мэдэрдэг. Авьяас, хөдөлмөр хоёр байхад хүүхэд бүр дэлхийн тайзанд гарах боломжтой гэдэгт би итгэдэг.

-АНУ-д зохиогдож буй төгөлдөр хуурын нэр хүндтэй олон улсын тэмцээнүүдэд урилгаар шүүгчээр ажилладаг. Төгөлдөр хуурын хөгжил ямар түвшинд явж байгаа гэж хардаг бэ? 

-АНУ-д зохиогддог олон улсын нэр хүндтэй тэмцээнүүдэд шүүгчээр ажиллахдаа би төгөлдөр хуурын хөгжил маш өндөр түвшинд хүрснийг хардаг. Зөвхөн техник биш, уран сэтгэмж, хөгжимд хандах гүн мэдрэмжийг ч ихэд үнэлдэг болсон. Хүүхдүүд, залуучууд бүгд маш авьяаслаг, өөрийгөө илэрхийлэх ур чадвар өндөр болсон нь төгөлдөр хуурын урлаг улам л өргөжин тэлж байгааг харуулж байна.

-Эх орондоо хэзээ ирэх бэ? Таны цаашдын төлөвлөгөө болон төгөлдөр хуур сонирхдог хүүхэд залууст хандаж хэлэх үг?

-Одоогоор би залуу насандаа гадаадад ажиллаж, туршлага хуримтлуулах нь зөв гэж үзээд АНУ-д ажиллаж байна. Одоогийн байдлаар Сан Франциско хотын төгөлдөр хуурын сургуульд ахлах багшаар ажиллахаар болсон. Олон үндэстний авьяаслаг хүүхдүүдтэй хамтран ажиллах нь надад маш их урам зориг өгдөг. Удахгүй эх орондоо туршлага, мэдлэгээрээ дүүрэн очно гэж найдаж байна.

Төгөлдөр хуур сонирхдог хүүхэд, залуустаа хандаж хэлэхэд зүрх сэтгэлээрээ суралцаж, авьяас хөдөлмөрөө хослуулж чадвал хаана ч амжилтад хүрнэ. Том мөрөөдөлтэй байгаарай, мөрөөдөлдөө итгээрэй. 

- Ярилцсанд баярлалаа. Танд амжилт хүсье. 

-Маш их баярлалаа. Та бүхний ажилд өндөр амжилт хүсье.