Хөдөлмөрийн хууль тогтоомжид тусгах төрийн албан хаагчдын саналыг сонсож байна

Төр.мн I www.tur.mn

2025-05-08

“Бүсчилсэн хөгжил-Төрийн албаны манлайлал” сэдэвт баруун бүсийн зөвлөгөөн Ховд аймагт 5 дугаар сарын 7-8 өдрүүдэд болж байна. Тав дахь бүсдээ зохион байгуулагдаж буй тус зөвлөгөөнд Ховд, Увс, Завхан, Говь-Алтай, Баян-Өлгий аймгийн 30335 албан хаагчийг төлөөлж 700 гаруй төлөөлөгч оролцов.
Бүсийн зөвлөгөөнөөр Төрийн албаны тухай хууль, Төрийн албан хаагчийн ёс зүйн тухай хууль, Хөдөлмөрийн тухай хуулийн хэрэглээ сэдвүүдээр хэлэлцүүлэг өрнүүлж буй.

Төрийн албан хаагчдын зөвлөгөөнд Хөдөлмөрийн тухай хуулийн хэлэлцүүлгийг багтаасан зорилго нь 2021 онд шинэчлэн батлагдсан тус хуульд үзэл баримтлалын шинжтэй томоохон өөрчлөлтүүдийг таниулж, нэгдсэн ойлголт өгөх явдал байв.

Түүнчлэн Гэр бүл, хөдөлмөр, нийгмийн хамгааллын яамнаас Хөдөлмөрийн тухай хуулинд нэмэлт, өөрчлөлт оруулахтай холбоотой төрийн албан хаагчдын хуулийн шинэчлэлд тусгах саналыг нэгтгэх ажил давхар явагдаж байгаа аж. Энэ талаар Төрийн албаны зөвлөлийн Хүний нөөцийн удирдлага, аудитын газрын дарга С.Нямбаяраас тодрууллаа.

С.Нямбаяр: Төрийн албаны зөвлөл өнгөрөгч 2-3 дугаар сард 330 сум, тосгонд ажиллаж, сумдад ажиллаж буй төрийн албан хаагчдын ажиллах нөхцөл байдал, хуулийн хэрэгжилт, хууль хэрэглээний асуудлыг газар дээр нь үзэж танилцсан юм. Хөдөлмөрийн харилцааны зөрчил, буруу ташаа ойлголт орон нутагт түгээмэл байсан учраас бүсийн зөвлөгөөний хөтөлбөрт энэ асуудлыг тусгай хэлэлцүүлэг болгон оруулж ирсэн юм.

Хэрэгжээд 5 жил гаруй өнгөрч буй Хөдөлмөрийн тухай хуульд үзэл баримтлалын шинжтэй томоохон өөрчлөлтүүд тусгасан. Үүнийг төрийн албан хаагчид тэр дундаа төрийн үйлчилгээний удирдах албан хаагчдад таниулж, ойлголтын зөрүүг арилгахаар тав дахь бүсдээ хэлэлцүүлэг өрнүүлж байна.

Учир нь Хөдөлмөрийн хуультай уялдан төрийн албаны тухай хуульд дагаж өөрчлөлт орсон. Эдгээр хуулийн шинэчлэл, зохицуулалтын талаар ойлголт, мэдлэг өгч байна. “Бүсчилсэн хөгжил-Төрийн албаны манлайлал” баруун бүсийн зөвлөгөөнөөр хэлэлцүүлэг өрнүүлэхэд бүсийн хэмжээнд төрийн албан хаагчид шинэчилсэн найруулгын талаар мэдлэг, ойлголт бага байгаа нь ажиглагдлаа. Энэ чигээрээ мэдээгүй, ойлгоогүй гээд өнгөрвөл тухайн төрийн албан хаагч Төрийн албаны тухай хуулийн 37, 39 дүгээр зүйлд заасан төрийн албан хаагчийн нийтлэг үүргээ биелүүлээгүй, хориглох зүйл заалтыг зөрчсөн гэж үзэн хариуцлагын асуудал яригдах эрсдэлтэй. Тиймээс бүсийн зөвлөгөөнд Хөдөлмөрийн тухай хууль тогтоомжийн хэрэглээ хэлэлцүүлгийг багтааснаар зорилго биелсэн гэж үзэж байна.

Үүнээс гадна Гэр бүл, хөдөлмөр, нийгмийн хамгааллын яамнаас Хөдөлмөрийн тухай хуульд нэмэлт өөрчлөлт оруулахаар ажиллаж байгаа тул хэлэлцүүлгийн үеэр төрийн албан хаагчдын хуулийн шинэчлэлд оруулах саналыг авч, нэгтгэх ажил давхар явагдаж байна.

“Бүсчилсэн хөгжил- Төрийн албаны манлайлал” бүсийн зөвлөгөөн өнөөдрийн байдлаар Хойд, Төв, Говь, Зүүн, Баруун бүсэд амжилттай зохион байгуулагдаад байна. Энэ хугацаанд 3000 гаруй төрийн албан хаагчид Хөдөлмөрийн тухай хууль тогтоомжийн талаар нэгдсэн ойлголттой болж буй нь бүсийн зөвлөгөөний нэг зорилго биелж байна гэсэн үг юм.

Зөвлөгөөнийг төрийн албан хаагчдаа сонсох, тэдний шийдлийг хууль тогтоомж, бодлого, үйл ажиллагаандаа тусгах зорилгоор Төрийн албаны зөвлөл санаачилж, УИХ, ЗГХЭГ, Ёс зүйн хороо, орон нутгийн захиргааны байгууллагууд хамтран зохион байгуулж байгаа ажээ.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.