Монгол Улсын Ерөнхий сайд Г.Занданшатар аймаг, сум, дүүргийн Засаг дарга нартай цахим уулзалт хийлээ. Уулзалтын эхэнд  улс эх орны өнөөгийн нөхцөл байдлыг танилцууллаа. Гадаад, дотоод нөхцөл байдал амаргүй байгаа энэ үед хэмнэлтийг төр өөрөөсөө эхлүүлж, бүсээ чангалж давж гарна гэдгийг онцлов. 

Нэгэн үе хаягдаад байсан хөдөө, орон нутгийн хөгжлийн асуудал энэ үед шинэ түвшинд гарсан. Засгийн газар орон нутагтайгаа нэгдсэн удирдлагатай, эргэх холбоотой ажиллана гэв. 

Мөн Засгийн газар орон нутгийн Засаг дарга нарын эрх мэдлийг хязгаарлаад буй дүрэм, журмыг цуцалж, эрх мэдлийг нэмэгдүүлэх багц арга хэмжээ авахаар төлөвлөсөн тухай Ерөнхий сайд онцоллоо. 

Орон нутгийн хөгжлийн сангийн төсвийг тодотголоор хасахгүй байх, уул уурхайн ашиглалт, хайгуулын лиценц олголтод онцгой анхаарах, сургууль, цэцэрлэг, эмнэлгийн царцсан барилгын санхүүжилтийг шийдвэрлэж өгөх, хоршоо хөгжүүлэх сангийн журмыг өөрчлөх, тендерийн тухай хуулийг эргэж харах зэрэг асуудлыг уулзалтад оролцогчид нийтлэг тавилаа. 

Дорнод аймгийн Цагаан-Овоо сумын Засаг дарга “Бүтээн байгуулалт хийхэд төсөв нь 3-4 жил дамжиж төсөвт суудаг байдал өртгийг нэмэгдүүлж, тухайн барилга царцахад хүрч байна. Тухайлбал, 2019 онд баригдаж эхэлсэн 160 хүүхдийн багтаамжтай дотуур байр царцсан. Хүүхдүүд дотуур байргүй байна.

     Дундговь аймгийн Баянжаргалан сумын Засаг дарга “Өмнө нь ажиллаж байсан хүмүүсийн ажлын хариуцлага одоо ажиллаж буй хүмүүст тооцогдох нөхцөл байдал үүсээд байна. Хууль, хяналтын байгууллага өнгөрсөн асуудлыг шалгаад шийдвэрлэхдээ одоо ажиллаж байгаа хүмүүст хэргийг халдааж байгаа нь иргэдийг төрийн албанд ажиллах итгэл үнэмшлгүй болгож байна”. 

Сүхбаатар аймгийн Эрдэнэцагаан сумын Засаг дарга, “Уул уурхайн хайгуулын зөвшөөрөл нийт газар нутгийн 10 хувийг хамраад байна. Үүнээс шалтгаалж мал бэлчээргүй болж, иргэдийн амьдрах орчиндсөргөөр нөлөөлж буйд анхаарч өгнө үү”. 

Дорноговь аймгийн Даланжаргалан сумын ИТХ-ын дарга “Манай суманд уул уурхайн ашиглалтын 80, хайгуулын 10 нийт 90 зөвшөөрөл байна. Сумын иргэд жагсаал хийсний үр дүнд уул уурхайн зөвшөөрөл дахин олгохгүй гэсэн боловч энэ амлалт хэрэгжихгүй байгаа юм. Дахиад нэг л зөвшөөрөл олгоход иргэдийн тэмцэлтэй нүүр тулахаар байдал үүссэн”.

Хөвсгөл аймгийн Рашаант сумын Засаг дарга “Хоршоо хөгжүүлэх сангийн журам амьдралд нийцэхгүй, иргэдийн тавьсан шаардлагад нь хүрэхгүй байна. Бодит амьдралаас ялангуяа орон нутгийн иргэдийн нөхцөл байдлаас хол тасарсан шаардлагатай. Үүнд анхаарч өгнө үү”.

Хан-Уул дүүргийн Засаг дарга “ТҮЦ-ийг нүүлгэж, зам талбайг чөлөөлсөн ч эргээд ТҮЦ хаа хамаагүй байрлуулж эхлээд байна. Төрийн албан хаагчид тэмцээд ч нэмэргүй, харин гэмтэж бэртсэн тохиолдол гарлаа. Нэгдсэн шийдэл, дэмжлэг хэрэгтэй байна” гэлээ.

Оролцогчид санал хүсэлтээ хэлсний дараа Ерөнхий сайд Г.Занданшатар Засаг дарга нар болон Засгийн газрын гишүүдэд үүрэг өглөө.

Засаг дарга нарын өгсөн саналыг нэг бүрчлэн судалж, тодорхой чиглэл өгөхийг сайд нарт даалгасан бол Засаг дарга нарт аливаа гэмт хэргээс урьдчилан сэргийлж, зорилтод бүлэг, залууст зориулж сургалт зохион байгуулж, соён гэгээрүүлэх ажилд онцгой ач холбогдол өгөхийг даалгалаа. Мөн цахим боловсролын системийг хэрэгжүүлэхэд анхаарахыг сануулав. 

Гантай байгаа аймаг, сумдад ой хээрийн түймэр дэгдэх, хүн малын гоц халдвар өвчнөөс урьдчилан сэргийлэх, улаанбурхан өвчний эсрэг дархлаажуулалтыг идэвхжүүлэх, болзошгүй нөхцөлд сумын эмнэлэг бэлэн байдалд ажиллах, мөн зам тээврийн ослоос сэргийлэх, өвс тэжээлийн нөөц бүрдүүлэх зэрэг чиглэлээр цогц арга хэмжээ авахыг бүх шатны Засаг дарга нарт үүрэг болголоо. 

Төрийн хэмнэлтийн тухай хуулийг амьдралд нийцүүлэх шаардлагатай. Иймээс Засгийн газраас энэ сард багтааж Засаг дарга нартай хэлэлцүүлэг хийж санал авч, Төрийн хэмнэлтийн тухай хуулийн заалтуудыг тодорхой болгохоор боллоо.