Тэргүүн шадар сайд бөгөөд Эдийн засаг, хөгжлийн сайд Н.Учрал өнөөдөр (2025.08.18) Азийн хөгжлийн банк (АХБ)-ны удирдах зөвлөлийн гишүүдтэй уулзлаа.
Азийн хөгжлийн банкны удирдах зөвлөл Монгол улсад өргөн бүрэлдэхүүнээр айлчилж, Монгол улсын засгийн газрын бодлого, тэргүүлэх чиглэл, хэрэгжүүлэх төслүүдийн талаар өргөн хүрээнд санал солилцон сонирхсон асуултаа Тэргүүн шадар сайдаас асууж хариулт авлаа.
Манай оронд хөгжлийн төсөл хэрэгжүүлэгч томоохон байгууллагын хувьд АХБ-ны төлөөлөл хөрөнгө оруулалтын орчин, ирээдүйд ач холбогдол өгч буй тэргүүлэх салбаруудын талаар илүүтэй сонирхож байна. Тэргүүн шадар сайд бизнесийн орчныг сайжруулахын тулд дараах арга хэмжээнүүдийг хэрэгжүүлж байгаагаа олон улсын байгууллагын төлөөллүүдэд танилцууллаа. Үүнд:
- Засгийн газрын хяналт хэрэгжүүлэх газар гадаадын хөрөнгө оруулагчдын гомдлыг хүлээж авахаас гадна хянан шийдвэрлэдэг болсон;
- Экспортыг нэмэгдүүлэхийн тулд Монгол улс газар зүйн байршлаа ашиглан бүс нутагтаа ре-экспорт хийх үндсэн төв болох бодлого;
- Төрийн залгамж халаа үргэлжилж засгийн газраас зарласан төслүүд ач холбогдлын эрэмбийн дагуу үргэлжлэн хэрэгжих тухай;
- Төр хувийн хэвшлийн түншлэлийн чиглэлээр төсөл хэрэгжүүлэх үе шатыг бууруулж зарим төслийг аймаг орон нутаг бие даан хэрэгжүүлэх хуулийн орчин бий болгох;
- Монгол улсын Хөгжлийн банкаар олон улсын зээл тусламжийг дамжуулдаг болох зэрэг асуудлыг хөндөн танилцууллаа.
Тэргүүн шадар сайдын хувьд Хөгжлийн банкны засаглалыг олон улсын жишигт нийцүүлэх зорилт тавин ажиллаж байгаагаа онцлоод АХБ-ны төлөөллийг тус банкны төлөөлөн удирдах зөвлөлд хараат бус гишүүнээр ажиллах, олон улсын хөгжлийн санхүүжилтийг Хөгжлийн банкаар дамжуулан олгосноор Монгол улсын зээлийн орон зай тэлэх боломжийн талаар байр сууриа илэрхийлэв. Үүний тулд хуулийн хүрээнд өөрчлөлт хийж, шалгуур хангах өөрчлөлтийг эхлүүлэх ёстойг ч онцоллоо.
Тэргүүн шадар сайд бөгөөд эдийн засаг, хөгжлийн сайд засгийн газрын бодлого, үйл ажиллагааны талаар цогц мэдээлэл өгсөнд АХБ-ны удирдлагууд талархал илэрхийлэв.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
