Эрх чөлөөт ардчилсан Монгол улсын ард иргэд ээ Ард түмний төлөөлөх эрх болсон Монгол Улсын Их Хурлын эрхэм гишүүд ээ, Энд хуран цугласан дөрөвдэх засаглал болсон хэвлэл мэдээллийн байгууллагууд, сэтгүүлчдээ Өнөөдөр Монгол улс эрх чөлөөт ардчилсан засаглалтай байх уу? эсвэл хэсэг бүлэг хүмүүс төрийн эрх мэдлийн механизийг ашиглаж парламентийг барьцаалж, хүч хэрэглэн дарангуйлалд шилжих үү? гэдэг салаа замын уулзвар дээр бодитой ирээд байна.

Энэ эрсдлийг тооцож миний бие Үндсэн хуулиндаа олон намын тогтолцоо бүхий 126 гишүүнтэй парламентийн холимог тогтолцоог санаачилж, улс төрийн намуудтай зөвшилцөн батлуулж, хэрэгжүүлж эхлэсэн билээ.

Миний бие Хүн биш, хууль засагладаг төр засагтай байхын төлөө, улс төрийн намууд нэг хүний өмч биш хамтын удирдлагын байгууллагыг байлгахын төлөө, Парламентын засаглалаа төгөлдөржүүлэн, ардчилал, эрх чөлөөг хамгаалахын төлөө Монгол Ардын намын даргад өрсөлдсөнийг Та бүхэн мэдэж байгаа. Ингэхдээ ямар том эрх ашгийг сөрж, эр зориг гаргаж, энэхүү шийдвэр гаргасныг сүүлийн хэдэн хоногт өрнөж буй үйлдлүүд нотлож байгаа гэдэгт итгэж байна.

    Энэ бүхний цаана парламентын засаглал, төрийн институцийг тогтворгүй болгох, ард түмний итгэлийг сулруулж, ардчилалыг үгүй хийж, дарангуйлалын хар сүүдэр бий болгох зорилготой байгаа гэдэг нь өдрөөс өдөрт тодорхой болж байна. Харин Монгол Ардын намын даргын өрсөлдөөнд ялагдсан Ерөнхий сайд Г.Занданшатар болон зарим нөхөд маань эхлээд намын дүрэм, бага хурлын гишүүдийнхээ дийлэнх олонхийн гаргасан шийдвэрийг үгүйсгэж, одоо бүр эрээ цээргүйгээр УИХ-ын тухай хуулийг зөрчихийн зэрэгцээ, гадаадын нэр бүхий хэвлэлд ор үндэслэлгүй мэдээлэлийг төлбөр төлөн байршуулж, түүнээс эх сурвалж болгож гүтгэн харлуулсанаа ерөнхий сайд Г.Занданшатар Төрийн байгуулалтын байнгын хорооны хуралд өөрийн биеэр нотлосон.

Тэдний цахим орчинд хийж байгаа гүтгэлэг нь төр засагт ажиллаж байгаа хэнийг ч итгэж дэмжих боломжгүй болтол хараар будаж, өнөөдөр энэ асуудал хил хязгаараасаа давж, Монгол Улсын тусгаар тогтнол алдагдах аюул нүүрлэж байна.

Энэ асуудал засаглалын хямралд хүргэх хүртлээ нэгэнт хүндэрч, Засгийн газар нь Парламентынхаа дээр гарч байгаа хууль бус үйл явдал болж байна. Бидний зорьж тэмүүлж, бүтээж ирсэн ардчилсан Парламентын засаглал цөөн хүний эрх ашгийн явцуу үйлдлүүдээс болж сорилтод орох хүртлээ хэврэг боллоо. Иймээс энэ үед надад албан тушаалтай зууралдан суух эрх, ёс зүй алга. Намайг УИХ-ын даргын албан тушаалтай байгаа учраас шалгуулахгүй байгаа мэтээр олон нийтийг төөрөгдүүлсээр удлаа. Өнөөдрийг хүртэл хийсэн хэрэг, шалгуулсан асуудал надад байхгүй.

Яг энэ цаг үед би бүрэн итгэлтэйгээр Улсын Их хурлын даргын албан тушаалаа өөрийн хүсэлтээр хүлээлгэн өгөх хүсэлтээ гаргаж байгаагаа албан ёсоор мэдэгдэж байна. Цаашид надруу чиглэсэн гүтгэлэг, эргэлзээ бүрийг бүрэн эцэслэж, нэр төрөө сэргээх болно. Нөгөө талаас олон нийтийн өмнө ил харагдахгүй ч хөшигний ард олон үйл явдал хөвөрч байна. Ардчилал, эрх чөлөө, парламентын засаглал, хэвлэн нийтлэх эрх чөлөөнд эрсдэл ч бодитоор учирч, хүмүүс үгээ цэгнэн, бодлоо нуух хэмжээнд очжээ. Цаашдаа монгол төрийн бүх үйл ажиллагаа хуулийн дор явагддаг байх ёстой. Иймээс хуулийг уландаа гишгэсэн, улайран эрх мэдлийн төлөөх тэмцэл удаа дараагийн увайгүй үйлдэл үргэлжилж байгаад цэг тавих ёстой.

Энэ шийдвэр бол Монгол Улсын парламентын тогтолцоог эрхэмлэн дээдлэх ёс зүй, шударга ёсны төлөөх хийж буй тэмцэлийн эхлэл юм. Монгол улсад хүн биш хууль засагладаг байх эрх зүйт төрийн төлөө, парламентын нэр хүндийг сахин хамгаалж, улс төрийн дарангуйлалын хар сүүдрийн хөрс суурийг бий болгохоос сэргийлж гаргаж байгаа шийдвэр юм.

Эцэст нь Ерөнхий сайд Г.Занданшатарт хандаж хэлэхэд Монгол төрийн үйл ажиллагаа тогтвортой, саадгүй хэвийн үргэлжлүүлэх үүднээс хоёулаа хамт огцрох нь зүйтэй гэж үзэж байна. Бусад улс төрийн дотоод асуудлаа Монгол Ардын намын Их хурлаараа хэлэлцэж шийдвэрлүүлэх нь зүйтэй гэж үзэж байна.