“Эх оронч оюутан” дэд хөтөлбөрийн хүрээнд “Дусал цус-Дүүрэн амьдрал” сэдэвт сайн дурын цусаа хандивлах аяны нээлт 11-р  сарын 1-ны өдөр АШУҮИС-ийн “Оюутны соёлын төв”-д зохион байгуулагдлаа. Энэхүү нээлтэд АШУҮИС-ийн бүрэлдхүүн долоон сургууль, гурван салбар сургуулийн оюутнууд нийт 220 оюутан оролцож бусад их дээд сургуулийн оюутан залуусыг уриалсан юм.

“Дусал цус-Дүүрэн амьдрал” сайн дурын аян 11 сарын 1-ээс, 11 сарын 12-ны хооронд АШУҮИС-ийн бүрэлдэхүүн сургуулиуд, Дархан-Уул аймаг, Дорноговь аймаг, Говь-Салбар аймаг дахь салбар сургуулиудад явагдана. Уг аян ЦССҮТ-ийн санаачилсан  сар бүрийн 3-нд  “Цусаа бэлэглэх өдөр”-ийн  80 дахь удаагийн арга хэмжээ, МУЗН-тэй хамтран зохион байгуулагдаж байгаагаараа онцлог юм.

Тус аяны нээлтийн арга хэмжээний үеэр хүмүүнлэгийн үйлсийг дэмжин идэвхтэй ажилладаг багш, ажилтан, оюутнуудыг ЦССҮТ болон МУЗН-ын шагналаар урамшуулсан юм. Үүнд:

·         ЦССҮТ-ийн “Бахархал-10” тэмдгээр  Био Анагаахын Сургуулийн Эмгэг үйл судлалын тэнхимийн багш  О.Зэсэмдорж. (10 удаа цус болон цусны бүрэлдэхүүн хэсгээ бэлэглэж  30 хүнд амьдрал бэлэглэжээ. Анх 2007 онд донорын эгнээнд нэгдсэн.)

·         ЦССҮТ-ийн “Бахархал-10” тэмдгээр АШУҮИС-ийн Анагаахын 323-р  хэсгийн оюутан Б.Пүрэвбаяр (10 удаа цус болон цусны бүрэлдэхүүн хэсгээ бэлэглэж  30 хүнд амьдрал бэлэглэжээ. Анх 2019 онд оюутан болсон цагаасаа донорын эгнээнд нэгдэж тасралтгүй цус болон цусны бүрэлдэхүүн хэсгээ бэлэглэж байна.)

·         ЦССҮТ-ийн “Бахархал-20” тэмдгээр  Био Анагаахын Сургуулийн Анатомийн тэнхимийн хичээлийн туслах ажилтан С. Даваасүрэн (20 удаа цус болон цусны бүрэлдэхүүн хэсгээ бэлэглэж  60 хүнд амьдрал бэлэглэжээ. Анх 2001 онд донорын эгнээнд нэгдэж түүнээс хойш тасралтгүй цус болон цусны бүрэлдэхүүн хэсгээ бэлэглэж байна.)

·         МУЗН-ийн “Шилдэг залуу” алтан медалиар  АШУҮИС-ийн Монгол Японы эмнэлгийн Дотор, Мэдрэлийн нэгдсэн тасгийн их эмч Н.Дэмчигмаа (Ковидийн улаан бүсэд 7  удаа орж ажилласан)

·         МУЗН-ийн “Шилдэг залуу” алтан медалиар  Сувилахуйн сургуулийн Сувилахуйн бакалаврын 4-р дамжааны  оюутан  Г.Хонгорзул (зуны амралтаараа Говь Алтай аймгийн Дэлгэр сумын Гуулин тосгонд ковидийн улаан бүсэд орж ажилласан, 3.4 голч дүнтэй суралцаж байгаа,  шилдэг оюутан)

·         МУЗН-ийн “Шилдэг залуу” алтан медалиар  Сувилахуйн сургуулийн Сувилахуйн арга зүйч мэргэжлийн  4-р  дамжааны оюутан Н.Алтанцэцэг (Зуны амралтаараа БГД-ийн нэгдсэн эмнэлэгт дадлага хийж  ковидийн улаан бүсэд орж ажилласан, 3.1 голч дүнтэй суралцаж байгаа, шилдэг оюутан)

·         МУЗН-ийн “Нигүүсэл” мөнгөн медалиар АШУҮИС-ийн Монгол -Японы эмнэлгийн Дотор, мэдрэлийн  нэгдсэн тасгийн  сувилагч Н.Золзаяа (Ковидийн улаан бүсэд 6  удаа орж ажилласан)

·         МУЗН-ийн “Нигүүсэл” мөнгөн медалиарАШУҮИС-ийн Монгол -Японы эмнэлгийн Дотор, мэдрэлийн  нэгдсэн тасгийн  үйлчлэгч Д. Ариунаа (Ковидийн улаан бүсэд 6 удаа орж ажилласан)

·         МУЗН-ийн “Нигүүсэл” мөнгөн медалиар Био-Анагаахын Сургуулийн Анатомийн тэнхимийн хичээлийн туслах ажилтан С.Даваасүрэн (16 жил сувилагчаар ажиллан, хорооны ахмадуудад үнэ төлбөргүй бариа засал хийж үйлчилдэг, бахархалт донор)

Мөн 2021-2022 оны хичээлийн жилд АШУҮИС-иас ”Оюутны хөгжил” хөтөлбөр хэрэгжүүлж байна. Уг хөтөлбөрт оюутан залуучуудыг эх оронч, өв соёлоо дээдлэгч, хөдөлмөрч, идэвхтэй амьдралын хэв маягтай, эрүүл чийрэг, хүнлэг энэрэнгүй сэтгэлтэй, эв эеийг эрхэмлэсэн зөв хүн болгон төлөвшүүлэх, авьяас чадварыг нээж хөгжүүлэх, ажилсаг, хамтач нөхөрсөг уур амьсгалыг батжуулах, хөхүүлэн дэмжих, өв тэгш хүн болоход дэмжлэг үзүүлэх зорилготойгоор хэрэгжүүлж байгаа юм. Уг хөтөлбөрийн хүрээнд “Эх оронч оюутан, Эрүүл, авьяаслаг оюутан, Үлгэрлэгч оюутан, Хөдөлмөрч оюутан" гэсэн дөрвөн дэд хөтөлбөрөөр оюутанд чиглэсэн үйл ажиллагаа явуулж байна. Уг хөтөлбөрийн зөвлөхөөр АШУҮИС-ийн зөвлөх, МУ-ын ардын багш, академич, АШУ-ны доктор, профессор Ц.Лхагвасүрэн, Ерөнхий зохицуулагчаар БАС-ийн Биологийн тэнхимийн профессор, МУ-ын гавъяат багш, доктор, профессор А.Гүрбадам, Оюутны хөгжил, удирдлагын газрын дарга Ц.Рэнцэндорж нар ажиллаж байна. Тэгвэл “Оюутны ёс зүйн дүрэм”-ийг шинэчлэн боловсруулах, “Эрүүл чийрэг оюутан” сэдэвт холын зайн гүйлтийг төрийн өмчийн 6 сургуулиуд хамтран зохион байгуулахаар төлөвлөж байгаа аж.

Дэлхийд 3 секунд тутамд цусны хэрэгцээ гарч байдаг. Ковидийн цар тахлын улмаас цусны нөөц багасч, цусны хэрэгцээ 15-20% нэмэгдэж, цусаа хандивлах үйл ажиллагаа 20-30% буурсан байна.

Тайван үеийн цусны нөөц, аюулгүй, хүртээмжтэй цус, цусан бүтээгдэхүүний нөөцийг бүрдүүлэх шаардлагыг анагаахын мэргэжлийн оюутнууд мэдэрч, сайн дурын үндсэн дээр, хүнлэг, энэрэнгүй сэтгэлийн үүднээс цусаа хандивлах аянд нэгдэж байгаа нь бахархууштай. Тиймээс "Дусал цус-Дүүрэн амьдрал” сэдэвт сайн дурын цус хандивлах аянд оюутан, залуусыг идэвхтэй хамрагдахыг зохион байгуулагчын зүгээс уриалж байна.