Монгол Улсад орчин цагийн мэргэжлийн урлагийн ууган байгууллага Улсын драмын эрдмийн театрын түүхт 90 жилийн ойг тохиолдуулан Улсын драмын эрдмийн театрын 18 уран бүтээлч төрийн дээд цол, одон медалиар энгэрээ мялаалаа.
Тухайлбал Ардын жүжигчин П.Цэрэндагва, Н.Сувд нар Хөдөлмөрийн баатар, Гавьяат жүжигчин Б.Жаргалсайханыг Ардын жүжигчин цол, УДЭТ-ын захирал Д.Цэрэнсамбуу, жүжигчин Ж.Пүрэвдорж нарыг Монгол Улсын төрийн дээд шагнал “Сүхбаатарын одон”-гоор, жүжигчин Г.Амгаланбаатар, Ц.Баясгалан нарыг “Гавьяат жүжигчин” цолоор, УБХ-ийн дарга, найруулагч Ч.Түвшин, ерөнхий зураач Т.Ганхуяг нарыг “Урлагийн гавьяат зүтгэлтэн” цолоор шагнагдав.
Төрийн дээд цол тэмдэг хүртсэн уран бүтээлчид сэтгэгдлээ хуваалцлаа.
МУАЖ Н.Сувд: "Өнөөдөр би хамгийн түрүүнд шинэ Монгол Улсад орчин үеийн мэргэжлийн театрыг үүсгэн байгуулах гэж итгэл зүтгэл, оюун санаа, авьяас билгээ дайчилсан ахмадууддаа баярлалаа гэж хэлмээр байна. Тэд маань тэнгэрээс харж байгаа гэдэгт би итгэлтэй байна. Тэдний зүтгэл, тэдний хүсэл бидэнд өнөөдөр шагнал болон бууж байна. Тэд нартаа мэхийн ёсолж баярласнаа хамгийн түрүүнд илэрхийлмээр байна. Мэдээж үзэгчгүйгээр театр оршин тогтнохгүй. Тийм учраас үзэгчид та бүхэндээ маш их баярлалаа.
МУАЖ Д.Гүрсэд: "Өнөөдөр төр засаг маань намайг өндөр дээд шагналаар шагнасанд баярлаж байна. Монголын урлаг, түүх соёлын нэгэн үеийг бүтээж явдаг энэ салбарт өөрийн ухамсарт амьдралаа зориулж өнөөдрийг хүрч, төр засгаараа үнсүүлж байгаад ахмад уран бүтээлч би баяртай байна.
Хүүхдүүд та бүхний минь цаашдын ажил үйлс бүх юм өрнөн дэлгэр, сайн сайхан байхын өлзийтэй ерөөлийг өвгөн уран бүтээлч өргөн дэвшүүлж байна. Би 60 гаран кинонд тоглосон. Тэдгээр дунд туслах дүр, гол дүр бий, гаднын улс орнуудтай хамтарсан уран бүтээл ч бий. Холливүүдийн жүжигчин Жонни Депп, Германы Гойко Митич, Өвөрмонголын Баасан зэрэг олон уран бүтээлч бий. Энэ бол уран бүтээлчдийн маань ач буян юм шүү" гэв.
МУАЖ П.Цэрэндагва: Би төрдөө гурав дахь удаагаа үнэсүүлж байна. Төр минь намайг гурван удаа үнэсэхдээ надаас өр нэхэлгүй хишгээ хүртээсэнд сэтгэл их өег байна. Үе үеийг өртөөлж, энэ театрыг өдий хүртэл авч ирсэн уран бүтээлчдэдээ нэгэнтээ мөргөе. Ачааны хүндийг үүрэхээр бэлэн жагсаж байгаа залгамж үеийнхэндээ нэгэнтээ мөргөе. Сэтгэл, хөөрөхгүй байхын арга алга. Гэхдээ бодож, тунгаахаа мартаагүй гэдгээ хэлье. Ханьдаа их баярлаж байна.
Улсын Драмын эрдмийн театрын захирал Д.Цэрэнсамбуу: "Монголын шинэ цагийн театрын урлагийн түүхт 90 жилийн ойг тохиолдуулан манай театрын үйл хэргийг, 90 жилийн түүхэн замналыг Монголын төр түмэн олон хайр хишгээ хүртээж байгаа явдалд үе үеийн удирдлага, зохиолчид, уран бүтээлчид, үйлчилгээний арын албаныхан, театрын хамт олны нэрийн өмнөөс гүн талархлаа илэрхийлж байна.
Like
1
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
