МАН-ын Ерөнхий нарийн бичгийн дарга Д.Амарбаясгалан, УИХ дахь МАН-ын бүлгийн дарга Д.Тогтохсүрэн, Монгол-Германы парламентын бүлгийн дэд дарга Ц.Мөнхцэцэг, УИХ дахь МАН-ын бүлгийн дэд дарга Х.Булгантуяа, УИХ-ын гишүүн Н.Энхболд, МАН-ын Гадаад харилцааны хэлтсийн дарга М.Цэлмүүн нар Германы социал демократ намын урилгаар албан ёсны айлчлал хийсэн тухай дэлгэрэнгүй мэдээллийг бид өмнөх дугаартаа мэдээлсэн. Айлчлалын үеэр МАН-ын Ерөнхий нарийн бичгийн дарга Д.Амарбаясгалан ХБНГУ-ын Бундестагийн гишүүн, Холбооны эдийн засгийн хамтын ажиллагаа, хөгжлийн яамны парламентын төрийн нарийн бичгийн дарга Нилс Аннентай уулзах үеэрээ ХБНГУ-ын Засгийн газраас Монгол Улсыг Хөгжлийн албан ёсны дэмжлэг туслалцаа үзүүлэх орнуудын жагсаалтаас 2024 онд гаргах шийдвэр гаргасан.
Монгол Улсын хөгжил цэцэглэлтэд үнэтэй хувь нэмэр оруулж ирсэн энэхүү хөтөлбөрт үргэлжлүүлэн хамрагдах хүсэлтэй байгаагаа илэрхийлсэн юм. Ноён Нилс Аннен Д.Амарбаясгалангийн хүсэлтийг хүлээн авч, дэмжлэг үзүүлнэ гэдгээ илэрхийлэхдээ “Өмнөх Засгийн газар Монгол Улсыг Хөгжлийн албан ёсны дэмжлэг туслалцаа үзүүлэх орнуудын жагсаалтаас хасах шийдвэр гаргасан хэдий ч та бүхний хүсэлтийн дагуу буцаан оруулах чиглэлээр идэвхтэй, дэмжиж ажиллана” хэмээн мэдэгдсэн юм.
Тэгвэл ирэх долоо хоногт “Бундестагийн хурлаар Монгол Улсыг ХБНГУ-ын Хөгжлийн албан ёсны дэмжлэг туслалцаа үзүүлэх хөтөлбөрт хамруулах асуудлыг хэлэлцэнэ” гэсэн сайхан мэдээлэл ирээд байна. ХБНГУ нь 1992 оноос эхлэн хөгжлийн тусламжийг Монгол Улсад олгож ирсэн анхны улсуудын нэг юм.
Энэхүү хөтөлбөр Монгол, Германы харилцаа, хамтын ажиллагааны анхны механизмуудын нэг бөгөөд өнгөрсөн 30 гаруй жилийн хугацаанд Хөгжлийн бодлогын хамтын ажиллагааны хүрээнд байгаль орчныг хамгаалах, ядуурлыг бууруулах, эдийн засгийг төрөлжүүлэх, эрх зүйн салбарыг шинэчлэх, эрчим хүчний үр ашийг дээшлүүлэх, хүний нөөцийг чадавхжуулах, мэргэжилтэн бэлтгэх зэрэг олон чиглэлээр тусламж, дэмжлэг үзүүлж нийт 488 сая евро зарцуулсан.
Хөтөлбөрийн хэрэгжилтийг ХБНГУ-ын Холбооны эдийн засгийн хамтын ажиллагаа, хөгжлийн яам хариуцан ажилладаг учраас маш үр дүнтэй, өгөөжтэй тусламжуудын нэг юм. Зөвхөн 2020 онд л гэхэд эдийн засгийн тогтвортой хөгжлийг хангах, эрчим хүчний үр ашгийг нэмэгдүүлэх, биологийн олон төрөл зүйлийг хамгаалах зэрэг чиглэлээр нийт 22 сая еврогийн тусламжийг энэхүү хөтөлбөрийн хүрээнд олгосон байна.
Гэвч 2021 онд ХБНГУ-ын зүгээс “Монгол Улсын хувьд хүний хөгжлийн индекс сайжирч бага, дунд орлоготой орнуудын эгнээнд шилжсэн” хэмээн дүгнэн албан ёсны хөгжлийн хамтын ажиллагаагаа зайлшгүй туслалцаа шаардлагатай байгаа бусад улс орнууд руу Хөгжлийн хөтөлбөрөө чиглүүлж, Монгол Улсыг хасахаар болсныг мэдэгдээд байсан юм.
Гэвч МАН-ын Ерөнхий нарийн бичгийн дарга Д.Амарбаясгалан тэргүүтэй төлөөлөгчдийн хүсэлтийг Германы социал демократ намын удирдлагууд болон ХБНГУ-ын Бундестагийн гишүүн, Холбооны эдийн засгийн хамтын ажиллагаа, хөгжлийн яамны парламентын төрийн нарийн бичгийн дарга Нилс Аннен нар нааштайгаар хүлээн авч, Бундестагийн хурлаар Монгол Улсыг ХБНГУ-ын Хөгжлийн албан ёсны дэмжлэг туслалцаа үзүүлэх хөтөлбөрт хамруулах асуудлыг хэлэлцэхээр болоод байна.
Like
0
Зөв
0
0
Буруу
0
Воов
0
Уйтгартай
0
Дуртай
Үндсэн хуулийн өдөрт зориулсан үндэсний бөхийн барилдаанд улсын арслан Ц.Бямба-Отгон түрүүллээ
© 2013-2023. Вэб сайт бүтээсэн: Tsast Solution LLC
