Цус сэлбэлт судлалын үндэсний төвөөс санаачлан сар бүрийн 3-ны өдрийг “Цусаа бэлэглэх өдөр” болгон тэмдэглэн өнгөрүүлдэг уламжлалтай. Энэ өдрийн гол зорилго нь сайн дурын авлагагүй донорын эгнээг өргөжүүлэх, донорын үйлсийг тогтмол сурталчлах, ард иргэдэд цусаа бэлэглэхийн ач холбогдлын талаар ойлголт өгөх, олон нийтийн оролцоог нэмэгдүүлэхэд оршиж байгаа юм.
Коронавируст цар тахлын үед Монгол улсын засгийн газраас халдварын тархалтыг таслан зогсоох, голомтыг хумих зорилгоор хөл хориог шат дараатайгаар 4 удаа тогтоож, ард иргэдийг вакцинжуулах ажил эхэлсэн. Улмаар цус цусан бүтээгдэхүүний нөөц, хангамжийг бүрдүүлэхэд бэрхшээлтэй болж, цус, цусан бүтээгдэхүүний нөөц буурч байна.
Хэвийн үетэй харьцуулахад цусаа өгдөг донорын тоо төвийн хэмжээнд 31 хувь, цус, цусан бүтээгдэхүүний үйлдвэрлэл 20 хувиар буурчээ. Цус, цусан бүтээгдэхүүнийг төрөхийн хүндрэл, автын осол, гэмтлийн үед, зүрх судас, хавдрын өвчлөл болон эрхтэн шилжүүлэн суулгах хагалгаа зэрэгт түлхүү хэрэглэдэг.
Тухайлбал элэг шилжүүлэн суулгах хагалгааны цус, цусан бүтээгдэхүүний захиалгыг 500 орчим донороос бэлтгэдэг бөгөөд 7 хоногт 2-3 элэг шилжүүлэн суулгах хагалгаа хийгдэж байна.
Цус сэлбэлт судлалын үндэсний төв нь Улаанбаатар хотын хэмжээнд улсын болон хувийн 80 гаруй эмнэлэгт үйлчилдэг бөгөөд одоогоор эмнэлгийн захиалгыг бүрэн хангаж байгаа ч улаан эсийн бүтээгдэхүүний хувьд 3-5 хоногийн нөөцтэй байна.
Олон улсын сайн туршлагаас харахад болзошгүй гамшиг, нийгмийн эрүүл мэндийн ноцтой байдлын үед тухайн улс орны иргэд, аж ахуйн нэгж, хамт олны зүгээс цусны албаны үйл ажиллагааг дэмжин цус, цусан бүтээгдэхүүний нөөцийг бүрдүүлэхэд онцгойлон анхаарч ажилладаг. Аливаа улс орнууд цус, цусан бүтээгдэхүүний хангалттай нөөцтэй байх нь хүн амын эрүүл мэндийг хамгаалах үйл ажиллагааны салшгүй хэсэг байдаг тул эрхэм цусны донорууд, байгууллага хамт олон та бүхнийг цусаа бэлэглэхийг Цус сэлбэлт судлалын үндэсний төвөөс уриаллаа.
Уншигч та бүхэн сар бүрийн 3-ны өдөр цусаа бэлэглэж бусдын амь насыг авраарай.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
