Өчигдөрхөн Үндсэн хуулийн цэц их суудлын хуралдаанаараа Улсын Их Хурлын сонгуулийн тогтолцоо, түүний хувилбарыг сонгон хуульчлах хууль тогтоогчийн буюу Улсын Их Хурлын бүрэн эрхийг баталгаажуулсан байна гэж үзэж Монгол Улсын Үндсэн хуулийн цэцийн 2016 оны 05 дугаар дүгнэлт болон 2012 оны 02 дугаар дүгнэлт, 03 дугаар тогтоолыг хүчингүй болгохоор шийдвэрлэсэн юм. Ингэснээр Сонгуулийг холимог системээр явуулж болох нөхцөл бүрдэж байгаа юм. Өөөрөөр хэлбэл Үндсэн хуульд нэмэлт өөрчлөлт оруулахгүйгээр сонгуулийг холимог тогтолцоотой явуулж болохоор болж байна. Тэгвэл энэ талаар эрх баригч МАН болон сөрөг хүчин АН-ын ерөнхий нарийн бичгийн дарга нарын байр суурийг хүргэж байна.
МАН-ын ерөнхий нарийн бичгийн дарга Д.Амарбаясгалан:
Сонгуулийн тогтолцоог аль нэг хэлбэрээр Үндсэн хуульд хатуу заах учиргүй. Монгол Улс Дэлхийгээс өөр байж болохгүй. Бид нийгмийн хөгжлийн түвшинд таарсан, хэрэгцээ шаардлагад нийцсэн сонгуулийн тогтолцоог авч хэрэглэдэг байх тогтолцоог нээлттэй байлгах ёстой. Үүнийг улс төрийн зорилгоор 2012, 2016 онд ҮХЦ-ийн шийдвэрээр хааж байсан. Эдгээр шийдвэрүүд бүдүүлэг шийдвэр байсан. Харин ҮХЦ энэ удаад энэ бол Үндсэн хуулиар хаагаад хориглоод байх зүйл биш, нээлттэй байх ёстой гэсэн шийдвэрийг гаргалаа. Одоо Үндсэн хууль аль ч сонгуулийн тогтолцоог авч хэрэглэх нөхцөлийг хангасан заалттай болох ёстой.
АН-ын Ерөнхий нарийн бичгийн дарга И.Мөнхжаргал:
Үндсэн хуулийн цэц шийдвэрээсээ буцсанаар Үндсэн хуулийн цэц өөрсдийгөө улс төрийн байгууллага гэдгээ дахин нотоллоо. Цэц нэг асуудлаар 2 өөр шийдвэр гаргалаа. Хувь тэнцүүлсэн тогтолцооны зөв бурууг энд ярихгүй. Үндсэн хуулийг манадаг, сахиулдаг, тайлбарладаг байгууллага нь ийм илт зөрүүтэй шийдвэр гаргаад байвал Монгол Улсад юу зөв, юу буруу байх юм бэ. Нэг л зөв, нэг л буруу байх ёстой. Эрхэм Үндсэн хуулийн цэцийн гишүүдээ та бүхэн үтэр түргэн өргөдлөө өгөөд яв. Үндсэн хууль бол Монгол Улсын 3 сая иргэний хэрхэн аж амьдрах зөвшилцлийн баримт бичиг шүү...Энэ асуудал дээр АН маш шүүмжлэлттэй хандаж байна. Цэц бол нэг маргаан шийддэг анхан шатны шүүхийн байгууллага биш шүү.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
