Улсын аварга П.Бүрэнтөгсийн санаачилсан “Бүрэн монгол” төсөл баруун найман аймагт хэрэгжээд түр завсарлаж байна. Тэрбээр төслийн багийнхны хамт Улаанбаатар хотод буцаж ирсэн бөгөөд удахгүй зүүн аймгуудыг зорих юм. Төслийн багийнхан аймаг бүрээс амьдралын төлөө чин сэтгэлээсээ зүтгэж, олон сайхан залууст үлгэрлэн амьдарч яваа гэр бүлийг сонгож, иж бүрэн өргөө цагаан гэр бэлэглэж буй билээ. Энэхүү төсөл нь нэг аймагт 20 сая төгрөгөөр хэрэгжиж байна. 

 Ингээд төслийн багийнхны аялсан найман аймаг болоод шалгарсан гэр бүлүүдтэй танилцъя.

8 дугаар сарын 1-ний өдөр эхэлсэн төслийн эхний аймаг болох Увс аймаг байлаа

   Төсөлд хамрагдах залуу гэр бүлээ сонгохдоо нийт 4-5 сарын хугацаанд судлан сонгожээ. Өөрийн гэсэн орон гэргүй, амьдралын төлөө гэсэн сэтгэлтэй, төрөөс үзүүлж халамжид хамрагддаггүй, хөдөлмөр эрхэлдэг, эсвэл өөрийн гэсэн жижиг бизнес эрхэлж амьдралаа авч явдаг, ажил идэвхтэй хайж байгаа хөдөлмөр эрхлэх чин хүсэлтэй, нийгэмд сайныг үлгэрлэдэг, хичээл зүтгэлтэй, зөв хандлагатай" гэсэн шалгуураар залуу гэр бүлээ судалж сонгосон байна.

Увс аймагт сонгогдсон өрх маань гэр бүлээрээ харааны бэрхшээлтэй, аймагтаа бариа засал хийж өрхийн амьжиргаагаа залгуулдаг, зөв хандлагатай, зөв сэтгэлтэй, 2 хүүхдийн эцэг эх болсон сайхан гэр бүл сонгогджээ. 

Монгол Улсын Аварга П.Бүрэнтөгс болон төслийн багийн зүгээс "ИЖ  БҮРЭН ТАВИЛГАТАЙ ТУСГАЙ ЗАХИАЛГААР ХИЙГДСЭН МОНГОЛ ГЭР" -ээ хосууддаа хүлээлгэн өгчээ. 

Увс аймгаас хөдлөн хоёр дох аймаг болох Баян-Өлгий аймгийг зорив

Баян-Өлгий аймгийн Толбо нуурын зусланд дараагийн залуу гэр бүлд өргөө гэрийг нь гардуулан өглөө. Гурван үеэрээ цэргийн алба хашсан гэр бүл, нийт таван аймагт үүрэг гүйцэтгэсэн Алпамысын гэр бүл сонгогдсон бөгөөд тус гэр бүлд өргөө цагаан гэрийг иж бүрэн тавилгын хамт олгож , гэрээ  барьж амьдрах 0.7 га газрыг Өлгий хотод шийдвэрлүүллээ.

Түүнчлэн цаашид тухайн өрх амьжиргаагаа дээшлүүлэхэд шаардлагатай хөдөлмөр эрхлэх болон бизнес эрхлэх боломжийг бий болгох асуудлыг аймгийг Хөдөлмөр халамж үйлчилгээний газраас шийдвэрлэхээр тогтсон байна.

Гуравдах аймаг бол Ховд аймаг байлаа

 Ховд аймгаас Бүрэн Монгол төсөлд гурван үеэрээ Икел хөгжмийн өв тээгч, дөрвөн хүүхэдтэй гэр бүл сонгогдож, иж бүрэн тавилгатай өргөө цагаан гэр, амьдрах газар олгож, сургалтын байрны асуудлаа шийдвэрлүүлэхээр болжээ.

 Төсөлд шалгарсан гэр бүл маань хөгжлийн бэрхшээлтэй хүүхэд болон амьдралын боломжоосоо шалтгаалан төлбөртэй сургалтад хамрагдаж чадахгүй байгаа хүүхдүүдийг үнэ төлбөргүй сургаж, нийгмийн сайн сайханд өөрийн хувь нэмрээ оруулж буй хүмүүнлэг, хөдөлмөрч, өв уламжлалаа дээдлэгч гэр бүл сонгогдсон юм. 

Дөрөвдөх аймаг бол Говь- Алтай

Говь-Алтай аймгийн Эрдэнэ сумын биет бус өв уламжлагч М.Нямдоржийн гэр бүл сонгогджээ. М.Нямдорж нь эхнэр 4 хүүхдийн хамт амьдардаг бөгөөд уламжлалт мал маллах арга техникийг эзэмшсэн, сур элдэж, хазаар ногт, чөдөр зангидаж, зах зээлд борлуулдаг мөн ардын язгуур урлагийн нэг болох хөөмийн урлагийг хүүхэд багачуудад зааж сургаж, өвлүүлэхэд үнэтэй хувь нэмрээ оруулж байгаа ардын авьяастан залуу юм.

 Говь-Алтай аймгаас хөдлөн тав дахь аймаг болох Завхан аймгийг зорив

Завхан аймгаас сонгогдсон гэр бүл маань Завхан аймгийн шүүхийн шинжилгээний албаны туслах ажилтан цагдаагийн ахлагч Т.Цогтбаатарынх юм. Т.Цогтбаатар аав, ээж, эхнэр, хүүхэд, дүү нарын хамт нэг гэрт 8-уулаа амьдардаг. Амьдралын төлөө өөрийн чадлаараа зүтгэж яваа чин хүсэл эрмэлзэлтэй залуу юм. 

Зургаа дахь аймаг буюу Архангай аймаг

Архангай аймгийн Батцэнгэл сумын харьяат малчин С.Ганбаатарын гэр бүл Бүрэн Монголд төсөлд сонгогдлоо. С.Ганбаатар эхнэр дөрвөн хүүхдийн хамт амьдардаг.

Мал маллахын зэрэгцээ сураар бүх төрлийн эд эдлэл хийдэг ажилч, хичээнгүй, хөдөлмөрч залуу гэр бүл юм. Мөн Архангай аймгийн Хөдөлмөр халамж,  үйлчилгээний хэлтэс малжуулах төсөлд хамруулахаар болжээ. Төслийн үед хосууд гал голомтоо бадрааж, хуримаа өргөн дэлгэр хийлээ. 

Долоо дахь аймаг буюу Өвөрхангай аймаг

Өвөрхангай аймгаас сонгогдсон Н.Ууганбаяр Б.Жагдагсүрэн нар  Улаанбаатар хотоос аймагтаа ирж  суурьшаад  даруй  3 жил болж байгаа бөгөөд  аймагтаа " Өв-Ур-999" брэндийг үүсгэн байгуулаад, Модон бүтээгдэхүүнээр төрөл бүрийн бүтээгдэхүүн  үйлдвэрлэдэг  ажилч хичээнгүй залуу гэр бүл юм. Н.Ууганбаяр Б.Жагдагсүрэн нар  үйлдвэрлэлээ эрхэлж эхэлснээс хойш бэлэг дурсгал болон өрхийн хэрэгцээний 60 гаруй нэр төрлийн бүтээгдэхүүнийг өөрсдийнхөө брэндээр тамгалж гаргасан байна. 

Бүрэн Монгол төсөл найм дахь аймаг болох Ламын гэгээний өлгий нутаг Баянхонгор аймаг

Баянхонгор аймгийн Өлзийт сумын харьяат Д.Төмөрпүрэв Х.Болортуяа нарт өргөө цагаан гэрээ гардан авчээ. Гэр бүлийн хосууд сумандаа хүнсний ногооны  тариалалтын  аж ахуй эрхэлж амьдардаг ба сум орон нутгийнхаа хадлангийн нөөцийг бэлтгэдэг, энэ жилээс 3 улирлын хүлэмждээ бүх төрлийн нарийн ногоог тариалдаг  амьдралын төлөө чин сэтгэлээсээ зүтгэж олон сайхан залууст үлгэрлэн амьдарч яваа гэр бүл юм.

Хосуудад НХХЯ-ны харьяа Баянхонгор аймаг дахь ХХҮХэлтсээс өрхийн амьжиргаа дэмжих төсөл хөтөлбөрт хамруулахаа мэдэгдсэний дээр Аймгийн Нийгмийн бодлогын хэлтсээс гэрийг бүрэн халаалтын шийдэлд холбож өгөхөө мэдэгдлээ .

   П.Бүрэнтөгс аваргын “БҮРЭН МОНГОЛ ТӨСӨЛ”-д иргэд ихээхэн ам сайтай байгаа бөгөөд магтан сайшаажээ. Гэвч “сайны хажуугаар саар гэгчээр” улс төрд орж, нэр дэвших нь үү? гэж олон нийт хардах нь бий. Харин аварга асуултын хариултыг товч бөгөөд тодорхой өгсөн нь : “Нэр төрөө өсгөх гээд, эсвэл улс төрд орох гэж энэ төслийг санаачлаагүй. Надад үндэсний өв соёлыг тээсэн аварга гэх нэр хүнд минь хангалттай. Нэр төрөө цэвэр авч явж , нийгэмдээ сайн сайхныг түгээх хүслээр энэ ажлыг хийж байгаа” гэжээ.

Бэлтгэсэн: Б.Лхагва