Жил бүрийн зургадугаар сарын 14-ний өдөр дэлхий нийтээрээ "Цусны донорын дэлхийн өдөр”-ийг зэрэг тэмдэглэн өнгөрүүлдэг. Энэ баяр бол цусны салбар болоод цусаа бэлэглэдэг ачтан доноруудын хүсэн хүлээдэг хамгийн том баяр байдаг билээ. Цусны донорын дэлхийн өдрийн гол зорилго нь ачтан доноруудаа алдаршуулах, цусны нөөцийг нэмэгдүүлэх, аюулгүй байдлыг хангахад дэмжлэг үзүүлдэг нийгмийн хариуцлагатай аж ахуйн нэгж, ТББ-ыг алдаршуулахад оршдог. Арга хэмжээний үеэр нэгэн онцлох номинацийн эзэн болсон ачтан донорыг онцлон хүргэж байна. Бүхэл цусаа эрэгтэй хүн жилд 6 удаа, эмэгтэй хүн 4 удаа бэлэглэх боломжтой байдаг бол цусны салбарын өндөр техник технологийн үр дүнд цусны бүрэлдэхүүн хэсгүүдийг зориулалтын аппаратаар авах боломжтой болж цусны бүрэлдэхүүн хэсгээ 14-өөс дээш хоногийн хугацаатай бэлэглэх боломж бүрдсэн. Энэ жил хамгийн олон удаа цус болон цусны бүрэлдэхүүн хэсгээ бэлэглэсэн донороор Цус сэлбэлт судлалын үндэсний төвийн сувилагч С.Нандинчимэг шалгарлаа. Тэрээр төрөхдөө их хэмжээний цус алдаж, цусны хэрэглээ, хэрэгцээ ямар их байдгийг өөрийн биеэр мэдэрсэн учраас зовлон нэгт хүмүүстээ тус болохыг зорьж 2017 оноос эхлэн цусаа бэлэглэж эхэлснээр ийнхүү баярын өдрөөрөө “Хүндэт донор” мөн “Жилийн хамгийн олон өгөлттэй” донороор шалгарч хоёр шагналын эзэн болсон юм. Тэрээр энэ жил 16 удаа цус болон цусны бүрэлдэхүүн хэсгээ бэлэглэж 48 хүний амь аварчээ. Нэмж хэлэхэд Цус сэлбэлт судлалын үндэсний төвийн хамт олны ная гаруй хувь нь идэвхтэн донорууд байдаг билээ.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
