Монгол Улсын Ерөнхийлөгч Х.Баттулга, Боловсрол, шинжлэх ухааны сайд Л.Энх-Амгалан тэргүүтэй албаныхан “Степпе Арена” ХХК-ийн хэрэгжүүлж буй “Мөрөөдөл биелэх-Мөсөн өргөө” төсөл, мөн нийслэлийн өмчит “Улаанбаатар Спорт менежмент” ХК-ийн захиалгаар хэрэгжүүлж буй “Зүүн Азийн Залуучуудын наадам-2023”, “Олон Улсын Залуучуудын ногоон наадам-2025”-ыг хүлээн авах Спортын цогцолборын төслийн барилгын ажлын явцыг шалгалаа.
Үндэсний аж ахуйн нэгжүүдийн санхүүжилтээр, улсын төсвөөс хараат бусаар хэрэгжүүлж буй тус төслийн барилга угсралтын ажил үндсэндээ дуусаж, дотоод засал, мөсөн шалыг тавих ажил эхлээд байна.
Төслүүдийн хүрээнд 3500 хүртэлх хүний багтаамж бүхий Монголын анхны битүү дээвэртэй спортын ордон, төрөл бүрийн спортын тэмцээнийг зохион байгуулах зориулалттай, 2100 хүний багтаамж бүхий спортын цогцолбор, 10 замтай усан спортын ордон, хөл бөмбөгийн талбай, техникийн төвийг цогцолбор хэлбэрээр нэг байршилд барьж байгуулж байна.
Бүтээн байгуулалтын ажлууд дэлхий нийтийг хамарсан цар тахлын улмаас удааширч, хэсэг хугацаанд саатсан ч өнөөдрийн байдлаар ажил хэвийн үргэлжилж байгаа талаар төсөл хэрэгжүүлэгчид хэллээ. Тэд тус ордныг ирэх долоодугаар сард багтаан ашиглалтад оруулахаар ажиллаж байгаа аж.
Монгол Улсын Ерөнхийлөгч Х.Баттулга залуусын хөгжлийг дэмжих эдгээр төслүүдийг амжилттай хэрэгжүүлж дуусгах нь онцгой чухал байгааг тэмдэглэж, бодлогын дэмжлэг үзүүлж, хамтран ажиллахыг захилаа.
Тус ордон нь Олон улсын олимпын хорооны баримтлах стандарт буюу 60х30 метрийн хэмжээстэй мөсөн гулгуурын талбай, тамирчид, шүүгчдийн хувцас солих өрөө, хэвлэл, мэдээллийн ажилтнуудын өрөө, эмнэлгийн анхан шатны тусламж үзүүлэх өрөө зэрэг зөвхөн уралдаан, тэмцээнд зориулсан 10 гаруй өрөө, тасалгаатай юм.
“Мөсөн ордон”-той болсноор мэргэжлийн хоккей, уран гулгалт зэрэг өвлийн спортын төрлүүдийг Монгол Улсад хөгжүүлэх суурь тавигдахаас гадна тусгай зориулалтын шал дэвссэнээр бүх төрлийн танхимын спортын уралдаан, тэмцээн, соёл, урлагийн болон хурал, зөвлөгөөн зэрэг бусад үйл ажиллагааг зохион байгуулах боломжтой болж байна.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
