Цар тахлын нөлөөгөөр иргэдийн санхүүгийн чадамж буурснаар зээл битгий хэл, хүнсээ цуглуулахад ч хүндрэл учирсан. Иймээс Цар тахлын тухай хуулийн дагуу 2 жилийн хугацаанд ипотекийн зээлийн эргэн төлөлтийг хойшлуулсан. Цар тахал ч намжиж, иргэд болон ААН-үүдийн бизнес нээгдсэнээр байдал арай дээрдсэн. Гэхдээ л хор нөлөө нь бүрэн арилаагүй байна.
Өнгөрсөн зунаас л ипотекийн зээл төлөлтийг дахин хойшлуулах асуудал УИХ, Засгийн газрын хэмжээнд яригдаж эхэлсэн.
Шадар сайд С.Амарсайхан хэлэхдээ “Эргэн төлөлтийг хойшлуулах нь иргэдэд ашигтай мэт боловч цаашид сөрөг нөлөөтэй. Тиймээс хойшлуулах нь буруу. Харин зээлийн хүүг бууруулах боломжтой” гэж байлаа. Тэгвэл иргэдийн зүгээс “Өргөн хэрэглээний барааны үнэ өдрөөс өдөрт өсөж, амьжиргаа муу байгаа тул эргэн төлөлтийг хойшлуулах нь зөв” гэх байр суурийг илэрхийлж байгаа юм.
Өчигдөр /2022.11.07/ МАН-ын бүлгийн дарга Д.Тогтохсүрэн “Ипотекийн зээлтэй холбоотой асуудлыг УИХ хэлэлцэж байна. Улсын төсөв энэ долоо хоногт батлагдана. УИХ дахь ажлын хэсгийн ажиллаж буй хэлбэрээр 2023 оны долдугаар сарын 1 хүртэл ипотекийн зээлийн эргэн төлөлтийг үргэлжилүүлэн хойшлуулах талаар яригдаж байна. Энэ долоо хоногт эцэслэн шийдвэрлэнэ" гэсэн юм. Түүнчлэн Барилга, хот байгуулалтын сайд Б.Мөнхбаатар “"Ипотекийн зээл 2008 оноос хэрэгжиж эхэлснээс хойш 100 мянга гаруй иргэнийг хамруулсан. Үүссэн нөхцөл байдлыг та бүхэн мэдэж байгаа. Ипотекийн зээл авч байгаа иргэдийнхээ эрх ашгийг хохироохгүй шийдэл гаргана" гэв.
Уг нь ипотекийн зээл нь эргэн төлөлтөөрөө дараагийн санхүүжилтээ босгодог журамтай ч урт хугацаанд хойшлуулсаар байвал иргэдийг дэмжих гэхээс илүүтэйгээр хохироож мэдэхээр байна.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
