Д.Амарбаясгалан: Намын харьяалал, танил талаар бус МЭРГЭШИЖ ТУРШЛАГАЖСАН нь ажилд ордог болно
Ирэх онд төрийн өмчит компаниудын бүтэц бүрэлдэхүүнийг шинэчилж, нээлттэй ил тод сонгон шалгаруулалтаар хүмүүсийг ажилд томилно гэдгийг ЗГХЭГ-ын дарга Д.Амарбаясгалан онцоллоо.
Ингэснээр төрийн өмчит компаниудад намын харьяалал, танил талаар хүмүүсийг ажилд томилдог байдал үгүй болно гэж Засгийн газар үзжээ. “Эрдэнэс Монгол” ХХК-ийн менежментийг сайжруулж, гадаад дотоодод өрсөлдөх чадварыг нэмэгдүүлэх, хөрөнгө оруулагчдыг татан төвлөрүүлэхийн тулд тус компанийн бүтцийг ийнхүү шинэчилж байгаа ажээ.
Ингэснээр 89 орон тоонд нээлттэй сонгон шалгаруулалт зарлалаа. “Эрдэнэс Монгол” ХХК-д хийж буй энэ өөрчлөлт нь төрийн өмчит компаниудын бүтцийг оновчтой, орон тоог цомхон, чадварлаг байлгах тогтолцоо руу шилжиж байгаагийн эхлэл юм.
Мөн компанийн удирдлагын албан тушаалд “дарга” гэдэг нэршлийг хэрэглэхээс татгалзаж, давуу эрх эдэлдэг, тусгай хангамж шаарддаг байдлыг зогсоож байна. Ийнхүү шинэ бүтцийн дагуу долоон газрыг долоон ахлах менежер удирдах юм байна. Ажлын байрны нээлттэй сонгон шалгаруулалтын бүртгэлийг ирэх оны нэгдүгээр сарын 2-ноос явуулж эхэлнэ. Их, дээд сургууль, төрийн алба, хувийн хэвшлийн төлөөлөл оролцсон есөн хүнтэй комисс сонгон шалгаруулалтыг явуулж, олон улсын жишигт нийцсэн тест, ярилцлагын шалгалтууд авах юм байна.
Цаашид “Эрдэнэс Монгол” ХХК-ийн энэхүү бүтцийг бусад төрийн өмчит компанид бий болгож, компанийн хүний нөөцийг олон нийтийн дунд нээлттэй сонгон шалгаруулалтаар бүрдүүлдэг болох аж. Ийнхүү бүтцийн шинэчлэл хийснээр цаашид төрийн байгууллагад намын харьяалал, танил талаар ажилд ордог байдлыг халж, мэргэшиж туршлагажсан хүмүүсийг ажиллуулдаг болно гэдгийг Д.Амарбаясгалан дарга мэдэгдлээ.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
