Говь-Алтай аймгийн залуучуудын ууган байгууллага болох “Ирээдүй Алтай” холбоо санаачлан, Говь-Алтай аймгийн Залуучуудын холбоодтой хамтран хэрэгжүүлсэн “ХЯЗГААРАА ТЭЛ” хөгжлийн форум амжилттай зохион байгуулагдлаа. 

Алтай нутгийн 18 сумаар нар зөв тойрон өртөөлөн үргэлжилсэн уг форум нэгдүгээр сарын 14-нд Тонхил сумаас эхэлж, нэгдүгээр сарын 31-нд Шарга сумын иргэд, хөдөлмөрчидтэй “ХЯЗГААРАА ТЭЛ”-снээр өндөрлөсөн юм.

Улаанбаатар хот, төв суурин газар болдог хөгжлийн форум алс хол сумдад, тэр дундаа малчин, хөдөлмөрчдөд хүрч тэдний үзэл бодол, санал санаачилгыг сонссон нь онцлог боллоо.  

     Форумын баг, хамт олон Улаанбаатар хотоос гарснаас хойш даруй 4300 км замыг туулж, 18 сумын 4000 гаруй иргэнтэй уулзан, тэдний санал бодлыг сонсож, мэдээлэл солилцсон юм.

“Ирээдүй Алтай” холбооны тэргүүн, МЗХ-ны удирдах зөвлөлийн гишүүн Н.Амартүвшин “Өөрчлөлтөөс эхлэл, алхмаас амжилт өөд” сэдвээр, УБ хот дахь Говь-Алтай аймгийн залуучуудын холбооны тэргүүн Д.Нармандах “Харилцаа хандлага, оролцоогоо тэлье”, “MCBC” ХХК-ийн гүйцэтгэх захирал, ОУ-ын хэмжээний мастер Д.Гоолингоо “Эрүүл мэнд ба эрүүл мэндийн мэдлэгээ тэлье” сэдвээр, “Төр” мэдээллийн агентлагийн захирал, сэтгүүлч Б.Шүрэнцэцэг “Түншлэл ба Хязгааргүй боломж”, “Ирээдүй Алтай” холбооны дэд тэргүүн З.Алтантуяа “Сэтгэлийн тэнхээ бодлын хязгаар”, Говь-Алтай аймгийн залуучуудын холбооны дэд тэргүүн Б.Баян-Эрдэнэ “Малчдын бизнесийн боломж орлогынхоо хязгаарыг тэлье” сэдвээр илтгэл хэлэлцүүлж, иргэд хөдөлмөрчидтэй санал бодлоо хуваалцав. 

    Сумдын нийтлэг төрхийг ажиглахад урлаг спортын клуб болон иргэд чөлөөт цагаа зөв боловсон өнгөрүүлэх газрыг олноор бий болгон хөгжүүлэх шаардлагатайг иргэд хэлж байсан юм.

Түүнчлэн залуучуудын оролцоог нэмэгдүүлэх, сумандаа сурч боловсрох, хөгжих боломжийг бүрдүүлэх, оюуны болоод мэдлэг тэлэх сургалт, уулзалтыг тогтмол зохион байгуулахыг хүсэж буйгаа илэрхийлэв.

Говь-Алтай аймгийн 18 сумын иргэд хөдөлмөрчид “ХЯЗГААРАА ТЭЛ” багийнхныг халуун дотноор угтан авч, урмын үгээр тэтгэн, “Хүн ходоодоо өлссөнөө мэддэг ч, тархиа өлссөнөө анзаардаггүй”. Оюуны их ХЯЗГААРЫГ ТЭЛЖ, мэдлэг, мэдээллээр тэлж, урам зориг, эрч хүрч өгсөнд талархал илэрхийлж байлаа.

     "Гантай зуны анхны бороо орж байгаа мэт оюуны их хур орсонд баяртай байна. Цаашид сумын иргэд бидэнд ийм үйл ажиллагааг олон зохион байгуулж өгөөсэй гэж хүсэж байна” хэмээн Цогт сумын иргэн н.Мөнхтөр хэлсэн бол Социализмын үед 7 хоног бүр "Боловсрол дээшлүүлэх бүлгэм" хичээллэж иргэд бидэнд мэдлэг, мэдээлэл түгээдэг байлаа. Үүнтэй адил “ХЯЗГААРАА ТЭЛ” уулзалтыг тогтмол зохион байгуулбал залуус мэдлэгээ тэлж чадна хэмээн Бигэр сумын өндөр настан онцлов. 

Дарив нутгийн 10 настай бяцхан хүү алдартай тамирчин болох мөрөөдөлтэй бөгөөд уран мэхтэй, хүч бяртай бөх болохоор хүсэж буйгаа илэрхийлж, Залуучууд өв соёлоо түгээн дэлгэрүүлэхэд онцгойлон анхаарч, түүчээлэх учиртайг Эрдэнэ сумын ахмадууд захилаа. Хувь хүний хөгжил, залуусын оролцоог нэмэгдүүлэх чиглэлд анхаарах шаардлагатайг Тайширчууд илэрхийлж, залуусын авьяасыг хөглөж, хөгжих боломжийг бүрдүүлж өгөх хэрэгтэйг Цээлчүүд уламжлав. 

“Эрдэнэ засгийн унага” дууг Улсын алдарт дуучин Г.Повронгийн нутгийнхан бүгд дуулж, “Зулай цагаан Алтай” дууг нутгийн зон олон түрэн уухайлж, МУСТА, дуучин Я.Гэрэлчулуун, МУСТА, дуучин Г.Батсүх, МУСТА, дуучин Л.Уранболор нар уран бүтээлийн тоглолтоо толилуулан дуутай хууртай, илтгэл хэлэлцүүлэгтэй, санал санаачилга гаргасан форум боллоо.

“ХЯЗГААРАА ТЭЛ” багийнхан төгсөх ангийн сурагчидтай уулзан мэргэжил сонголтын талаар ярилцаж, сурагчдын хүсэл мөрөөдлийг сонсож, Алтай сум дахь Монгол Улсын баатар Д.Гуулингийн нэрэмжит Цэргийн гавьяаны одонт, Хилийн 0214-р ангитай танилцан, Улсын баатар М.Жанчивын хөшөөнд цэцэг өргөж, хүндэтгэл үзүүлэв. 

“ИРЭЭДҮЙ АЛТАЙ” холбоо нь Говь-Алтай аймгийн 18 суманд салбар зөвлөлтэйгөөр үйл ажиллагаагаа явуулж буй бөгөөд зарим сумдын салбар зөвлөлийн даргыг томилон баталгаажууллаа. 

 “ХЯЗГААРАА ТЭЛ” хөгжлийн форумын үеэр тус форумыг санаачлан зохион байгуулсан “Ирээдүй Алтай” холбооны тэргүүн, Монголын залуучуудын холбооны Удирдах зөвлөлийн гишүүн Н.Амартүвшингээс форумын талаар зарим зүйлийг тодрууллаа.

-20 гаруй хоног үргэлжилж, 18 сумаар өртөөлсөн форумын талаар сэтгэгдлээсээ хуваалцаач?
-“Хязгаараа тэл” баг маань Төрийн тахилгат Сутай хайрхны бэлд орших миний  төрж өссөн Тонхил сайхан сумаас нар зөв тойроод энэхүү форум, аяллыг зохион байгууллаа. Би урьд нь нутагтаа амарч, аялдаг байсан бол энэ удаа нэг ч гэсэн хүний зүрх сэтгэлд оч бадрааж, гэрэл асаах хүсэлтэй аялсан нь сайхан байлаа. Элгэн нутгийнхаа ахан дүүс, найз нөхөдтэйгээ уулзаж, санал хүсэлтийг нь сонсож, харилцан мэдээлэл авлаа. Залуучууд бидний өөрсдийн санаачилгаар эхлүүлсэн форумыг нутгийн зон олон маань хүндэтгэн угтаж, очсон сум бүр заал дүүрэн идэвхтэй оролцон, дэмжсэнд туйлын их баяртай байна. 

-“ХЯЗГААРАА ТЭЛ” форумыг зохион байгуулах болсон шалтгаан юу байв?

-Миний бие 20 жилийн түүхтэй “Ирээдүй Алтай” холбооны долоо дахь тэргүүнээр сонгогдон ажиллаж байна. Энэ жил түүхт 20 жилийнхээ ойн хүрээнд хэд хэдэн бүтээлч ажил өрнүүлэхээр зорьсны эхлэл нь энэхүү форум юм. Түүнчлэн ихэвчлэн хот, суурин газарт болдог уулзалт, хэлэлцүүлгийг алсын сумдад хүргэхийг эрмэлзсэн. Тэнд баялаг бүтээгч, үйлдвэрлэгчид, мэдлэг, эрдэмтэй иргэд, хөдөлмөрчид их бий. Өнгөрсөн хавар Алтайн бизнес эрхлэгч 100 залуус уулзан ХЯЗГААРАА ТЭЛЖ, арванхоёрдугаар сард Улаанбаатар хот болон орон нутагт амьдарч буй залуусын уулзалтыг зохион байгуулсан. Удаах нь ийнхүү сумдад хэрэгжлээ. Ингэж л бид ХЯЗГААРАА тэлнэ шүү дээ. Хамгийн том шалтгааны нэг нь ГЭРЭЛ асаах. Алтай нутгаас олон оюунлаг, соён гэгээрүүлэгч нар төрж манлайлж байсан. Алдарт Л.Түдэв, М.Цэдэндорж, Ч.Лодойдамба зэрэг алдартнуудыг нэрлэж болно. 20-р зуунд тэдний асаасан амжилтын бамбарыг 21-р зуунд Алтайчууд үргэлжлүүлэн буухиалах учиртай. Хязгаар нутгийн маань иргэд тэдний үргэлжлэл. Олон оюунлаг залуус сумандаа амьдарч байна. 

-Ярилцсанд баярлалаа. Амжилт хүсье. 

Төр.мн