Даваа гарагт Турк, Сири улсын хилийн бүс нутагт болсон хүчтэй газар хөдлөлтийн улмаас амиа алдсан иргэдийн тоо 12 мянгыг даваад байна.
Лхагва гараг /2022.02.08/-ийн байдлаар Турк улсад 9057, Сирид 2950 хүн амиа алджээ. Турк улсад гамшгийн хамрах хүрээ баруун талдаа Адана, зүүн талдаа Диярбакир хот хүртэл 450 км урт газар нутгийг хамарчээ. Энэ бүс нутагт 13.5 сая хүн оршин суудаг аж.
Лхагва гарагт гамшгийн бүс нутагт очсон Туркийн Ерөнхийлөгч Рэжэп Тайип Эрдоган Засгийн газар нь газар хөдлөлтийн дараа шуурхай арга хэмжээ авч чадалгүй цаг алдсаныг хүлээн зөвшөөрсөн байна.
Тэрбээр гамшгийн улмаас орон гэргүй болсон бүх хүмүүсийг орон байраар хангахаа амлажээ. Орон гэргүй болсон хүмүүсээс гадна гамшгийн дараа нурах аюултай болсон байшин барилгад амьдардаг хүмүүс өвлийн хүйтэнд гудамж талбай, автомашинд хоноглож байгаа ажээ.
Аврах ажиллагаа тасралтгүй үргэлжилж, нурангинаас нас барсан болон амьд хүмүүсийг гаргасаар байгаа ч амьд хүн олдох магадлал багассаар байна. Ажиллагаанд мэргэжилтнүүдийн туршлага чадвар, техник хэрэгсэл дутагдаж байгаа талаар гамшигт нэрвэгдсэн бүс нутгийн иргэд гомдоллож, үүнд эрх баригчдыг буруутгаж байгаа.
Like
0
Зөв
0
0
Буруу
0
Воов
2
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
