Ноос ноолуурын чиглэлээр үйл ажиллагаа эрхэлж буй аж ахуйн нэгж, байгууллагын ажиллагчдын хөдөлмөрлөх эрхийн хэрэгжилт, цалин хөлс, цалин хөлсний систем нь ажлын гүйцэтгэл, үр ашиг, бүтээмжтэй хэрхэн уялдаж буйг тодорхойлох, салбарын тарифын хэлэлцээр байгуулах суурь мэдээллийн бааз бий болгох, нийгмийн түншлэгч талуудад санал зөвлөмж боловсруулах зорилгоор дээрх судалгааг Фридрих-Эбертийн сангийн захиалгаар Хөдөлмөр, нийгмийн харилцааны дээд сургууль хийсэн байна. Мөн уг судалгааны ажилд ХХААХҮЯ-ны ахлах мэргэжилтэн Б.Эрхэмбаяр болон Шинжлэх ухааны академи, Ноос ноолуурын холбооны судлаачид оролцжээ.
Судалгаанд 100-аас дээш ажиллагчидтай 4 үйлдвэр, жижиг дунд 17 үйлдвэрийн нийт 392 ажиллагчид хамрагджээ. Эдгээр хүмүүсийн 58.3 хувь нь бүрэн дундаас доош боловсролтой бөгөөд энэ салбарт үйлдвэрлэл эрхлэгчдэд мэргэжилтэй хүний нөөц дутагдаж байгаа нь хамгийн томоохон асуудлуудын нэг болсон байна.
ШУТИС нэхмэлийн үйлдвэрийн технологич инженер, оёдлын үйлдвэрийн технологич, механик инженерүүдийг бэлтгэдэг. 2010 оноос өмнө элсэлт харьцангуй сайн байсан бол сүүлийн 10 жилд инженер, технологийн чиглэлээр суралцах хүсэлтэй суралцагчид, төгсөгчдийн тоо эрс цөөрснийг судалгаанд хамрагдсан экспертүүд өгүүлжээ.
Тиймээс Боловсрол, шинжлэх ухааны яам, Хүнс, хөдөө аж ахуй, хөнгөн үйлдвэрийн яам хамтран тус салбарт шаардлагатай дээд боловсролтой инженер бэлтгэхэд онцгойлон анхаарч, Ерөнхий боловсролын сургуулийн төгсөгчдөд хандсан цахим контент гаргах, үйлдвэрлэлийн үйл ажиллагаатай танилцуулах зэрэг шат дараалсан цогц арга хэмжээг хэрэгжүүлэх санал зөвлөмжийг гаргасан байна.
Ноолуурын салбарын үндэсний үйлдвэрлэгчдэд хөнгөлөлттэй зээл олгоно
2023 оны ноолуур бэлтгэлд зориулан үндэсний үйлдвэрлэгчдэд 500 хүртэл тэрбум төгрөгийн хөнгөлөлттэй зээл олгох шийдвэрийг Засгийн газрын хуралдаанаар гаргасан. Үндэсний үйлдвэрлэгчдийн түүхий эдийн зах зээл дээрх өрсөлдөх чадварыг нэмэгдүүлэх, тэднийг эргэлтийн хөрөнгөөр дэмжих зорилгоор Олон Улсын Санхүүгийн корпорац, Европын сэргээн босголт, хөгжлийн банк болон арилжааны банкны эх үүсвэрээр уг зээлийг олгох юм. Энэхүү зээлийн Засгийн газраас хариуцан төлөх хүүгийн хөнгөлөлт 13.0 нэгж хүртэл хувийг төсвийн ерөнхийлөн захирагчийн батлагдсан төсвийн хүрээнд зохицуулалт хийх замаар шийдвэрлэж байгааг Дэд сайд М.Ганхүлэг тус хэлэлцүүлэгт оролцож байгаа төлөөлөгчдөд танилцуулсан юм.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
