![\"\"](\"http://resource.24tsag.mn//24tsag/images/2016/3/12e12f7bc6b67035cc19e4908b34f701/is4nnnhlme0qso6f4i25j9to1.jpg\")
2016 оны сонгууль болоход дөрөв хүрэхгүй сарын хугацаа үлдээд байна. Намууд дотооддоо албан бусаар хуралдаж, хэнийг жагсаалтад оруулж, хэнийг тойрогт өрсөлдүүлэх талаараа нилээн нухацтай ярилцаж буй сурагтай. Одоогоор АН, МАН болон бусад намуудын аль нь ч тойрогт болон нэрсийн жагсаалтад оруулах хүнийхээ нэрийг тодорхой болгоогүй байгаа аж. Зарим намуудын дунд намын нэрийн жагсаалт нэлээдгүй өндөр үнэ хүрч байгаа талаар эх сурвалж мэдэгдлээ.
АН энэ сардаа багтаан ҮЗХ-оо хуралдуулж сонгуульд нэр дэвшигчдийн асуудлыг ярилцах аж. Тус намын хувьд өнгөрсөн хугацаанд намын ажлыг идэвхтэй сайн гүйцэтгэсэн гишүүд болон хоёр буюу түүнээс дээш ялалт байгуулж, парламентад суусан нөхдөө нэрсийн жагсаалтад багтаах гэнэ.Тодруулбал, УИХ-ын гишүүн Н.Алтанхуяг, БШУ-ны сайд Л.Гантөмөр, УИХ-ын гишүүн Д.Ганхуяг, УИХ-ын гишүүн, АН-ын дэд дарга С.Одонтуяа, УИХ-ын гишүүн, АН-ын нарийн бичгийн дарга Г.Батхүү, УИХ-ын гишүүн Н.Батбаяр, УИХ-ын гишүүн Р.Амаржаргал нарын хүмүүс жагсаалтад орох аж.
Эх сурвалжийн мэдээлж буйгаар АН-ын жагсаалтыг Н.Алтанхуяг тэргүүлэх гэнэ. Түүний хувьд хамгийн сайн бүтээн байгуулалтыг хийсэн Ерөнхий сайдаар нэрлэгдээд байгаа. Тиймээс АН-ынхан Н.Алтанхуягийгаа жагсаалтын нэгдүгээрт эрэмбэлэжээ.
Харин намын дарга болон Ерөнхий сайд гээд намын удирдах албан тушаалтай эрхмүүд тойргоос нэр дэвшихээр тохирсон гэж байгаа юм. УИХ-ын 76 гишүүний 48-ыг нь тойргоос шууд сонгодог, 28-ыг намын жагсаалтаар сонгодог хуучин системээр ирэх сонгууль явагдана. Сонгуулийн шинэ хуулиар намын жагсаалтаар орохоос илүү тойргоос сонгогдох хувилбар нь үнэ цэнэтэй байна. Учир нь тухайн нам нийт сонгогчийн таваас илүү хувийн санал авсан ч тойргоос нэр дэвшсэн нэг боловч хүн нь УИХ-д сонгогдоогүй бол хаалганы гадна үлдэх зохицуулалтыг хуульд тусгасан юм. ТиймээсАН-ынхан сонгогдоно гэсэн найдвар тавьж буй өрсөлдөгчөө тойрогт сойхоор төлөвлөж буй аж.Тодруулбал, тус намын дарга З.Энхболд өөрөө тойрогт нэр дэвшихээр болжээ. Тэрбээр Өвөрхангай аймагт хүч үзэж магадгүй гэж буй. Мөн Ерөнхий сайд Ч.Сайханбилэг Дорнод аймагт нэр дэвшинэ гэж байгаа юм.
Нийслэлийн ХАМГИЙН их хүн амтай том тойргийн нэг БЗД-т ирэх сонгуулиар хэн, хэн нэр дэвших нь олны сонирхлыг ихээхэн татаж байна. Тус тойрогт МАН-аас хуучин дүүргийн Засаг даргаар ажиллаж байсан, Шийдлийн Засгийн газар байгуулагдах үед ХХАА-н дэд сайдаар ажиллаж байсан Б.Батзориг нэр дэвших нь тодорхой байна. Мөн Үндэсний цэцэрлэгт хүрээлэнгийн захирал асан Б.Саранчимэг нар нэр дэвшинэ. Хүн амын хөгжил, нийгмийн хамгааллын дэд сайдаар саяхныг болтол ажиллаж байсан, урьд нь нийслэлийн орлогч дарга, дүүргийн Засаг даргаар ажиллаж байсан Б.Мөнхбаатар, МАХА үзлийн талаар ярьдаг НИТХ-ын төлөөлөгч Б.Төмөрчулуун нарын нэр мөн яригдаж байгаа. Мөн УИХ-ын гишүүн Ж.Энхбаяр буурь сэлгэн БЗД-т нэр дэвшиж магадгүй гэх яриа байгаа юм.
Харин АН-аас БЗД-ийн Засаг даргаар ажиллаж буй Д.Пүрэвдаваа нэр дэвшихээр бэлтгэлээ базааж, айлуудаар ажлын тайлангийн сэтгүүл, хуанли гэх зүйлсийг тарааж эхэлжээ. Бас УИХ-ын гишүүн Ж.Батзандан нэр дэвшинэ. Мөн И.Нарантуяа, Б.Мөнхтуяа гээд хууччуулын нэр сонсогдож байна. Харин МАХН-аас Батлан Хамгаалахын сайд Ц.Цолмон нэр дэвшинэ.
Мөн тус дүүрэгт хүч үзэх нэгэн содон хүн байгаа. Тэр нь УИХ-ын гишүүн ХҮН-ын дарга С.Ганбаатарын төрсөн дүү С.Гантуяа. Түүний хувьд тус дүүрэгт бие даан нэр дэвших гэнэ. Нэгэн цагт \"Оюутолгой” компанийг хүний эрхийг зөрчиж, ажилчдын хөдөлмөрийг мөлжиж байна хэмээн шүүмжлэн ажлаасаа халагдаж улмаар компанийн шийдвэрийг эсэргүүцэн шүүхээр заргалдан ялж байсан. Энэ бүсгүй \"Рио Тинто”-г ялсан анхны эмэгтэй гэдгээрээ олон нийтэд танигдсан. Ахыгаа бодвол боловсрол өндөр, нам гэж туйлширдаггүй энэ эмэгтэй БЗД-т шинэ хүн болох нь.
Т.Энхэлээ
Эх сурвалж:24цаг.мн
Like
0
Зөв
0
0
Буруу
0
Воов
0
Уйтгартай
0
Дуртай
ДАРААГИЙН МЭДЭЭ
Зуун айлын нийтийн байрыг дахин төлөвлөх төслийн үр дүнд эхний айлууд орон сууцандаа оржээЕрөнхий сайд Г.Занданшатар өнөөдөр /2025.12.13/ Сүхбаатар дү...
© 2013-2023. Вэб сайт бүтээсэн: Tsast Solution LLC
