Төр.мн

Нүүр / Спорт / Ц.Раднаа: Энэ онд болох бүх тэмцээнд оролцоно

Спорт

Ц.Раднаа: Энэ онд болох бүх тэмцээнд оролцоно

Б.Шүрэнцэцэг

6 жилийн өмнө

$\"\"$

Польшийн Торун хотод гуравдугаар сарын 24-30-нд болсон хөнгөн атлетикийн мастеруудын ДАШТ-нд өндөр амжилт гаргаж эх орныхоо нэрийг мандуулсан, 85 настай Ц.Раднаа, 81 настай Т.Цэрэндолгор нар өнөөдөр эх орондоо хүрэлцэн ирлээ. 45 -90 насны 88 орны 500 гаруй тамирчнаас Ц.Раднаа өөрийн насандаа гурван алт, нэг мөнгөн медаль, Т.Цэрэндолгор нэг алт, дөрвөн мөнгөн медаль зүүсэн юм.

Хөнгөн атлетикийн мастеруудын Дэлхийн аварга шалгаруулах тэмцээнд 800 метр, 60 метрийн саадтай гүйлт, гурвын харайлтын төрөлд аваргын алтан медаль хүртэж, 800 метрт дэлхийн рекорд шинэчлэн тогтоосон Ц.Раднаа гуай бүчин авсан олонд хандан \"Би 30 гаруй жил спортоор хичээллэсэн, мэргэжлийн биеийн тамирын багш. Өмнөговь аймагт ажиллаж байгаад тэтгэвэртээ гарсан, олон шавьтай. Насаараа спортоор хичээллэж байгаа миний хувьд, өндөр амжилт гаргасандаа хэлэх үг олдохгүй байна\" гээд дараах хариулт өглөө.

-ДАШТ-ий бэлтгэлээ хаана хийсэн бэ?

- Улаанбаатар хотод хийсэн. Сайн бэлтгэсэн байсан учраас, 85-аас дээш насны ангилалд АНУ, Их Британи, Япон, Герман, Итали зэрэг орны хүчтэй тамирчидтай өрсөлдлөө.

- Танай гэр бүлийнхэн их спортлог гэсэн. Та өөрөө ч биеийн тамирын багш. Энэ бүхэн амжилтад тань нөлөөлсөн үү?

– Манайх 10 хүүхэдтэй, өнөр өтгөн сайхан амьдардаг. Спортлог айл гэдэг нь үнэн. Гэргий Н.Пүрэвийн дэмжлэгээс гадна, олон жил хүүхдүүдтэй ажилласны маань үр дүн байх. Би маш олон шавьтай. Манай удамд биеийн тамирын багш олон. Ер нь ах, дүүсийн маань дунд спорттой холбогдсон хүмүүс бий.

-Та говь нутгийн хүн. Говийнхон хурдан байдаг юм уу?

-Манай Өмнөговийнхон хөнгөн атлетикийн төрлөөр улсдаа тэргүүлдэг. Улсын томоохон тэмцээнд тогтмол амжилттай оролцдог. Эх орноо төлөөлөн тив, дэлхий, олон улсын тэмцээнд амжилт гаргаж байгаа олон тамирчин байна.

-Амжилтын нууцаасаа...?

-Биеэ зөв авч явсны ач тус байх. Би архи, тамхи хэрэглэдэггүй учраас өдий зэрэгтэй яваа юм. Спортоор хичээллэж явсан болохоор, надад олон талын өвчин байдаггүй. Багшийн ажлаа хийгээд тэтгэвэрт гарсны дараа хэсэг хугацаанд мал дагасан. Тэгээд эхнэр бид хоёр хотод хүүхдүүд дээрээ ирлээ. Долоо хоногт хоёр удаа бүжгэнд явдаг. Энэ нь ч бас нөлөөлсөн байх. Мөн бэлтгэлээ хийх зорилгоор байнга алхана. Үүний ач тусаар ийм том амжилтад хүрлээ.

-2019 онд дахин тэмцээн уралдаанд оролцохоор төлөвлөж байгаа юу?

-Энэ онд Япон, Канад, Австралид олон улсын тэмцээн болно. Тэдгээр тэмцээнд оролцох бодол байна.