Төр.мн

Нүүр / Спорт / “Лозанн-2020” наадмын гүйлтийн цанын тэмцээн өндөрлөв

Спорт

“Лозанн-2020” наадмын гүйлтийн цанын тэмцээн өндөрлөв

Т.Төгөлдөр

5 жилийн өмнө

$\"\"$

Швейцарийн Лозанн хотноо болж буй залуучуудын өвлийн III наадмын гүйлтийн цанын тэмцээн Vallee de Joux Cross Country Centre-d өчигдөр /2020.01.21/ гүйлтийн цанын классик буюу сонгодог техникээр эмэгтэйчүүд 5 км , харин эрэгтэйчүүд 10 км -т уралдаан болж өндөрлөв.

Эмэгтэйчүүдэд 82 цаначин мэдүүлгээ өгснөөс 77 тамирчин гараанаас гарсан бөгөөд Монголын тамирчин Б.Номин-Эрдэнэ 18 минут 08.7 секундын амжилтаар 61 дүгээр байрт оржээ. Харин Д.Урангоо барианд орж чадаагүй хоёр тамирчны нэг болов. Манай тамирчин мөсөн дээр хальтирч унан, эмнэлэгт хүргэгдсэн байна. Биеийн ерөнхий байдал гайгүй бөгөөд шинжилгээ хийлгэж байгаа аж.

$\"\"$

Эмэгтэйчүүдийн 5 км -т Шведийн М.Русенберг 14:15.7 амжилтаар алтан медаль хүртлээ.Энэ нь түүний \"Лозанн -2020” -оос хүртэж буй гурав дахь медаль бөгөөд Русенберг ийнхүү залуучуудын олимпийн алт, мөнгө, хүрэл цогц медальтай болов. Мөнгөн медалийг Швейцарийн Ш. Виггер 14:28.4 амжилтаар хүртлээ. Түүний хувьд гурав дахь медаль бөгөөд Виггер өмнө нь хоёр алтан медаль хүртээд байсан юм. Харин 14 минут 36.3 секундын амжилт үзүүлсэн АНУ-ын К.Крамер энэ зайд хүрэл медалийн эзэн боллоо.

Эрэгтэйчүүдийн уралдаанд 85 тамирчин мэдүүлгээ өгсөн ч гараанаас 79 гарсан. Монголын цаначин О.Золбаяр 10 км-ийн зайг 30 минут 03.7 секундэд туулж, 38 дугаар байрт орлоо. Манай тамирчны ард Украин, Швейцар, АНУ, Канад, БНСУ гэх мэт улсын 41 тамирчин бичигдлээ. Мөн Б.Хонгор 32 мин 06.6 сек амжилтаар 61 дүгээр байрт оров.

$\"\"$

Энэ зайн алтан медалийг ОХУ-ын И.Трегубов 26:40.5 амжилтаар хүртсэн бол мөнгөн медалийг Германы Э.Кех 27:25.5 , хүрэл медалийг АНУ-ын У. Кох 27:29.5 амжилтаар хүртлээ.

Ташрамд дурдахад, Монголын хоёр цаначин охид 15 настай бол Б.Хонгор 16, О.Золбаяр 17 настай юм.

\"Таван цагариг”-ийн сурвалжлагч Э.Гуамарал

Гэрэл зургийг OIS/ Chloe Knott, Joel Marklund