Ж.Ганбаатар гишүүнээ УИХ таны хувийн компани биш
УИХ-ын Хуульзүйн байнгын хорооны өчигдрийн хуралдаанаар Эрүүгийн хуульд нэмэлт өөрчлөлт оруулах тухай хуулийн төслийн эцсийн хэлэлцүүлгийг хийсэн.
Энэ үеэр УИХ-ын гишүүн Ж.Ганбаатар нэг үндэслэлээр хувь хүн болон хуулийн этгээдэд давхар хариуцлага тооцоыг эсэргүүцсэн юм. Угтаа энэхүү заалт нь 2015 онд батлагдсан, энэ оны долдугаар сарын 01-ний өдрөөс хэрэгжих Эрүүгийн хуулиар хуулийн этгээдтэй бус тухайн албан тушаалыг гүйцэтгэж буй хувь хүнтэй хариуцлага тооцохоор зохицуулалттай байгаа нь ял шийтгэл гарцаагүй байх зарчимд нийцэхгүй гэж үзсэн учраас нэмж тусгасан болохыг Хууль зүй, дотоод хэргийн дэд сайд Б.Энхбаяр тайлбарласан юм.
Өөрөөр хэлбэл УИХ-ын гишүүн Ж.Ганбаатарын хувийн бизнес \"Оргил” сүлжээ худалдааны төв ноцтой алдаа гаргаж хууль зөрчсөн тохиолдолд зөвхөн ажил гүйцэтгэж байгаа хүн хариуцлага хүлээж, цаад эзэн нь сугарч үлддэг гажуудлыг засах агуулгаар оруулсан байна.
Харин \"Оргил”-ын эзэн, УИХ-ын гишүүн Ж.Ганбаатар үүнийг өөрөөр тайлбарлаж байнгын хорооны хуралдааны үеэр багагүй маргаан дэгдээв. Тэрбээр \"Samsung\", \"Сoca Cola”, \"Volkswagen” зэрэг томоохон компаниудын талаарх мэдээллийг та бүхэн харж байгаа байх. Гадны компаниудад торгуулийн арга хэмжээ л авч байна. Жишээ нь \"Samsung”-ийг дэлхийг хамарсан зөрчлийнх нь улмаас хөрөнгийг нь хураагаад, торгоод, лацадчихвал юу болох вэ. \"Volkswagen” машинууд их хэмжээний дизель ялгаруулсан асуудлыг дэлхий нийтээрээ мэдэж байна.
Гэтэл монголд ийм байдал үүсвэл яах вэ. Өнөөдрийн хуулиар бол эзнийг нь шоронд хийгээд хаалга үүдийг нь лаздах юм байна, орлогыг нь хураах юм байна. тэгээд хэн бизнес хийж хүмүүсийг ажилтай болгох вэ. Дэлхий нийтийн хандлагыг дага л даа” хэмээн ихэд ундууцсан юм.
Угтаа бол хуулийн этгээдийн хэлбэр, төрөл олон болсон тул ямар нэг хууль зөрчих үйлдэл хийсэн албан тушаалтан, хувь хүн хариуцлага хүлээхийн зэрэгцээ тухайн албан тушаалтан, хувь хүнийг хууль зөрчих үүрэг өгсөн хуулийн этгээд мөн хариуцлага хүлээх нь зүйтэй хэмээн үзэж дээрх зохицуулалтыг тусгажээ.
Тодруулбал мөнгө угаах, терроризм, хээл хахууль өгөх, байгаль орчныг бохирдуулах, улсын эдийн засгийн аюулгүй байдал, өмчийн эсрэг гэх мэт тодорхой тооны хууль зөрчсөн үйлдлийг аль нэг хуулийн этгээдийн эзэмшигч, хөрөнгө оруулагчдын шийдвэрээр гүйцэтгэх захирал нь хэрэгжүүлсэн нь нотлогдвол тухайн захиралд л хариуцлага тооцдог. Үүний цаана үүрэг, чиглэл өгсөн удирдлагууд, эзэмшигчид хариуцлага хүлээлгүй үлддэг байдлыг өөрчлөх нь зүйтэй гэдэг чиглэлийг барьсан байна.
УИХ-ын гишүүд дундаа чинээлэг, жилийнх нь орлого 10 тэрбумаар хэмжигддэг Ж.Ганбаатар гишүүн өөрийнх нь санал дэмжигдээгүй учир \"Тэгвэл би энд чинь байх хэрэг алга” хэмээн хуралдааны дундуур гарч явав. УИХ бол хэн нэгний эрх ашгаа урдаа барьдаг, хувийн компанийхаа захирлын албанд сууж байгаа мэт аашилдаг газар биш байлтай.
эх сурвалж: Зөв.мн
Б.Сондор
ЭНЭ МЭДЭЭНД ӨГӨХ ТАНЫ ҮНЭЛГЭЭ?
Like
0
Зөв
0
0
Буруу
0
Воов
0
Уйтгартай
0
Дуртай
![\"\"](\"http://www.tur.mn/uploads/posts/2017-05/1494397223_13.jpg\" "\\"\\"")
