УИХ-ын хаврын чуулган эхлэхэд 7 хүрэхгүй хоногийн хугацаа үлдээд байна. Өөрөөр хэлбэл, энэ сарын 15-ны лхагва гарагт эхлэх юм. Энэ удаагийн чуулганаар олны анхааралд байгаа хэд хэдэн “ГАЛ”-тай асуудлыг хэлэлцэж, цөөнгүй хэдэн томилгоог ч хийнэ. Тухайлбал, “НҮҮРСНИЙ ХУЛГАЙ”-н хэрэгт яллагдагчаар татагдаж, ажлаа “ӨГӨХӨӨР” болсон УИХ-ын гишүүн, ХНХ-ын сайд Т.Аюурсайхан, УИХ-ын гишүүн Ж.Мөнхбат болон бусад 7 гишүүнийг огцруулах асуудал бий. Түүнчлэн, сонгуулийн тухай хуульд өөрчлөлт оруулж, ээлжит бус сонгууль явуулах магадлал өндөр байна.
“СЕНСАЦ”-ууд дунд эргэлдэж буй нэгэн бол Монголбанкны Ерөнхийлөгч Б.Лхагвасүрэн мөн. Түүнийг огцруулах багагүй шалтгаан бий.
Жишээлбэл, Хөгжлийн банкны ТУЗ-ийн гишүүнээр ажиллаж байхдаа тус банкны “ЧАНАРГҮЙ” зээлдэгчдийн нэг болох “Бэрэн” группт зээл олгосон асуудлаар прокурор яллах дүгнэлт үйлдэж, яллагдагчаар татаад зогсохгүй, хилийн “ХОРИГ” тавьсан гэх бөгөөд Эрүүгийн хуулийн 22.1 буюу “Эрх мэдэл, албан тушаалын байдлаа урвуулан ашигласан” үндэслэлээр буруутгаж байгаа юм.
Хоёрдугаарт, цар тахлын оргил үеэс хойш валютын ханш тогтмол өсөж, төгрөгийн ханш буурсаар буй. Тодруулбал, Ам.долларын ханш өссөөр өчигдрийн /2023.03.08/ Монголбанкны хаалтын ханшаар 3525 төгрөгтэй тэнцэж байна. Анх валютын ханш өсөж эхлэх үед Б.Лхагвасүрэн хэлэхдээ “Хил гаалийн асуудлаас болж, экспорт буурсан. Үүнээс шалтгаалж, валютын нөөц тасарч, ханш өсөхөд нөлөөлсөн” гэж байв. Гэвч “COVID-19”-ийн тархалт буурч, хил гаалийн асуудал хэвийн болж, улмаар валютын нөөц мэдэгдэхүйц өсөж буйг Сангийн сайд Б.Жавхлан Засгийн газрын хуралдаанаар хэлж байлаа. Өнгөрсөн сарын байдлаар валютын нөөц 4.2 хувиар өсжээ. Гэсэн хэдий ч валютын ханш өссөн хэвээр л байна.
Б.Лхагвасүрэн хэвлэлд ярихдаа “Иргэдийн дунд валютын ханш буурч, төгрөгийн ханш өснө гэх хүлээлт байгаатай холбоотой. Энэ хүлээлт арилвал ханш хэвийн болох боломжтой” гэх тайлбарыг өгсөн нь олон нийтийн эгдүүцэл, дургүйцэл хоёрыг зэрэг хүргээд байгаа юм.
Ийнхүү Б.Лхагвасүрэнг төв банкны тэргүүнээс буулгаж, шинэ тэргүүний эрэлд гарах ажил УИХ-д ирлээ.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
