Монголын эрүүл мэндийн ажилтны Үйлдвэрчний эвлэлийн холбооноос “Эрүүл мэндийн салбарын үйлчилгээний ажилтны улсын зөвлөгөөн”-ийг гурван жилд нэг удаа зохион байгуулдаг бөгөөд тав дахь удаагийн улсын зөвлөгөөн өнгөрсөн баасан гариг /2023-04-07/-т МҮЭ-ийн Соёлын төв ордонд боллоо.
Нийслэл, дүүрэг, аймаг, сумдын эрүүл мэндийн байгууллагад үүрэг гүйцэтгэж буй үйлчилгээний 11 мянга гаруй ажилтны төлөөлөл 250 гаруй хүн чуулсан улсын зөвлөгөөнд Эрүүл мэндийн сайд С.Чинзориг оролцож сайдын алба авснаас хойш өнгөрсөн гурван сарын хугацаанд эрүүл мэндийн салбарт хийж хэрэгжүүлсэн ажлууд болон үйлчилгээний ажилтнуудын ажиллах орчин нөхцөл, цалин урамшуулал, нийгмийн хамгааллыг сайжруулах, хууль эрх зүйн орчинг боловсронгуй болгохтой холбоотой баримталж буй бодлогоо танилцуулсан.
Тэрбээр эрүүл мэндийн салбарт ажиллаж буй 56 мянган хүний 80 гаруй хүвийг эмэнтэйчүүд эзэлдэг бол нийт ажиллагсдын 11 мянга гаруй нь эмнэлгийн үйлчилгээ гэж том салбарт үүрэг гүйцэтгэж хүн ардын эрүүл энхийн манаанд эмч мэргэжилтнүүдийн хамт цаг наргүй зүтгэж байгааг дурдаад үйлчилгээний ажиллагсдын нийгмийн хамгааллыг сайжруулах, цалин хөлсийг нэмэгдүүлэх, ажиллах орчин нөхцөл, хөдөлмөрийн аюулгүй байдлыг хамгаалахад анхаарах нь салбарын яам төдийгүй төр засгийн үүрэг тул эхний ээлжинд цалинг нэмэгдүүлэх арга зам, боломж бололцоог тодорхойлох зорилготой ажлын хэсгийг томилон ажиллуулж байгаагаа дуулгав.
Түүнчлэн эрүүл мэндийн салбарын ажиллагсдыг орон сууцны ипотекийн зээлд тэргүүн ээлжинд хамруулах зорилгоор Худалдаа, хөгжлийн банктай хамтран ажиллах санамж бичиг байгуулсан. Мөн эрүүл мэндийн салбарт зайлшгүй хэвшүүлэх үйлчилгээний стандартыг боловсруулж хэрэгжүүлж эхлэх гэж байгаа болон салбарын хууль эрх зүйн шинэчлэлийг хийх тал дээр тодорхой ажлуудыг хийж эхлээд байгаа зэрэг олон мэдээллийг улсын зөвлөгөөнд оролцогчдод өглөө.
Зөвлөгөөний үеэр илтгэл тавьж, мэдээлэл хийсэн хүмүүс Засгийн газрын 2022 оны “Эрүүл мэндийн салбарын төрийн үйлчилгээний бусад байгууллага болон төрийн байгууллагын хэвийн үйл ажиллагааг хангахад туслах албан тушаалын цалингийн доод хэмжээ”-г 488 дугаар тогтоолын дагуу ТҮ ангиллын цалингийн зардлын төсөв 8.0 хувиар өссөн.
Эрүүл мэндийн салбарын ажилчдад олгож байгаа нийт нэмэгдлийн дундаж хэмжээ-56 хувь, үүнээс эрүүл мэндийн үйлчилгээний ажилтнуудад ажилласан жилийн нэмэгдэл 5-25 хувиар, доктор профессорын нэмэгдэл 5-20 хувиар, орон нутагт ажилласны нэмэгдэл 10-20 хувь хамаарч байна.
2022 оны байдлаар ТҮ-ээр ажиллаж байгаа ажилчдын дундаж цалин 550,0 - 829,6 мянган төгрөг байна. (Засгийн газрын 2022 оны 107 дугаар тогтоолоор баталсан үндсэн цалин – 712,956 төг) 2022 оны байдлаар яамны харьяа байгууллагууд үндсэн цалингаа 65 хувиар, нийслэлийн харьяа байгууллагууд 61,5 хувиар, орон нутгийн эрүүл мэндийн байгууллагууд 56 хувиар тус тус нэмсэн тухай болон эмнэлгүүд ажиллагсдынхаа цалинг хэрхэн нэмсэн талаар тодорхой тоо судалгаа бүхий мэдээллүүдийг танилцуулсан.
Like
0
Зөв
0
0
Буруу
0
Воов
0
Уйтгартай
0
Дуртай
Г.Занданшатар: Хүн сольсноор асуудал шийдэгдэхгүй, тогтолцоогоор нь авч үзэх хэрэгтэй
© 2013-2023. Вэб сайт бүтээсэн: Tsast Solution LLC
