Говь-Алтай аймгийн залуучуудын “Ирээдүй Алтай” холбооноос санаачлан, Улаанбаатар хот дахь Говь-Алтай аймгийн залуучуудын холбоо хамтран зохион байгуулж буй “ЦАГИЙН ЗӨРҮҮ-2” форум эхэллээ.

      Форумд Говь-Алтай аймгийн харьяат бөгөөд шинжлэх ухаан, соёл урлаг, улстөр, бизнес, нийгмийн олон салбарт амжилттай ажиллаж, суралцаж буй 300 гаруй залуус зочноор оролцож, илтгэл тавьж, туршлага, мөрөөдөл, үзэл бодлоо хуваалцах юм.

Энэ удаагийн форум 4 үе шаттай явагдах бөгөөд сэтгэлгээний, хөгжлийн, харилцаа хандлагын, цагийн зөрүүгийн талаар хэлэлцэн байр сууриа илэрхийлж, дуу хоолой нэгтгэх аж. 

Форумыг нээж “Ирээдүй Алтай” холбооны тэргүүн Н.Амартүвшин үг хэллээ. Тэрбээр “Өнөөдөр энэ мөчид ЦАГИЙН ЗӨРҮҮ форум болж байхад АНУ-д сагсан бөмбөгийн NBA-гийн плей-оффын эхний шатны тоглолт эхлэх гэж байна. Одоогоос 4 жил хоёр хоногийн өмнө буюу 2019 оны дөрөвдүгээр сарын сарын 13-нд “Цагийн зөрүү-1” форумыг зохион байгуулж байхад дэлхийн хүн ам 7 тэрбум 284 сая байсан бол өнөөдөр найман тэрбумд хэдийнэ хүрчээ.  

Бид бүхэнд энэ зааланд сэтгэлгээний, харилцаа хандлагын зөрүү, хөгжлийн зөрүү, цаг хугацааны зөрүү гээд олон сэдвээр ярилцаж, манай өнөөдрийн зочид сонирхолтой яриануудыг бид бүхэнтэй өрнүүлнэ гэдэгт итгэлтэй байна. Өнөөдрөөс 7300 хоног, 87 мянга 600 цагийн түүхийг бичсэн ИРЭЭДҮЙ АЛТАЙ холбоо түүхэн 20 жилийнхээ ойтой золгож байна.  

Тус холбоо өнгөрсөн 20 жилийн хугацаанд Алтайн ирээдүйн эздийг ирээдүй Алтайгаас төрүүлнэ гэсэн уриатай ажиллаж  олон залуусыг сурч боловсрох, хамтдаа хөгжих, мөрөөдөл зорилгынхоо төлөө алхахад нь гүүр болж чадсан. Залуучуудын хөгжлийг дэмжих, урлаг, спорт, оюуны болоод боловсролд чиглэсэн олон ажлыг үе шаттай зохион байгуулж ирлээ “ хэмээн онцоллоо.

Он гарсаар тус холбоо Говь-Алтай аймгийн 18 сумаар тойрч ХЯЗГААРАА ТЭЛ хөгжлийн форумыг зохион байгуулж нийт 4000 гаруй иргэд хөдөлмөрчид, залуустай уулзаж үзэл бодлоо хуваалцаж, санал санаачлагыг нь сонссон байна.

"ЦАГИЙН ЗӨРҮҮ" форум “СЭТГЭЛГЭЭНИЙ ЗӨРҮҮ” хэлэлцүүлгээр эхэллээ. “Ирээдүй Алтай” холбооны дэд тэргүүн, “Эртэч Монгол” хөтөлбөрийн санаачлагч Н.Энхбаатар модератораар ажиллаж, “Ирээдүй Алтай” холбоог үүсгэн байгуулагч, холбооны 6 дахь тэргүүн Т.Сайхнаа СЭТГЭЛГЭЭНИЙ ЗӨРҮҮГИЙН талаар үндсэн илтгэл хэлэлцүүллээ. 

    Монголын Эмэгтэйчүүдийн холбооны Говь-Алтай аймаг дахь салбарын тэргүүн Э.Энхнаран, Говь-Алтай аймгийн Нутгийн зөвлөлийн гүйцэтгэх захирал Ч.Хандмаа, “Ирээдүй Алтай” холбооны Бодлогын хэрэгжилтийн хорооны гишүүн А.Номин-Эрдэнэ нар байр сууриа илэрхийлж залуустай ярилцав.

         Энэ үеэр Зочин илтгэгч Э.Энхнаран хэлэхдээ “Энд ирсэн зарим залуус амралтаараа аав ээж, ах дүүсээ зорин нутагтаа очиж байгаа. Та бүхэндээ сонин болгож хэлэхэд, биднийг оюутан байх үе шиг “фургон” машинд чихүүлээд, 2 хоног явж очдог, аав ээжийн үе шиг “Зил-130” дээр суугаад 7 хонож ирдэг “үлгэр, домог” шиг үе ард хоцорчээ. Бид засмал замаар Улаанбаатар хоттой холбогдсон. Олон олон шинэ барилга бий болж, харанхуй гудамжууд нь гэрэлтэй болсон гээд ЭЕРЭГ талуудыг нь харвал олон бий.

Гэхдээ XXI зуунд амьдарч буй гэхэд тэнд Хөгжлийн болон Сэтгэлгээний зөрүү ч бий. “Хоцрогдсон зүйлсийг минь хэн нэгэн улстөрч, удирдлага нь ирээд хөгжүүлэх болов уу” гэж олон мянган цаг хүлээдэг. Тухайлбал, 10-20 жилийн өмнө, магадгүй ХХ зууны үеийн барилга өнөөдрийг хүртэл хэвээрээ л байна” гэв.

      Харин Үндсэн илтгэгч Т.Сайханаа “Ирэх 2024 онд манай аймгийн 14 сумын 100 жилийн ой тохионо. Бид ойгоо тэмдэглэхээр нутагтаа очиход, 2 гишгүүрт модон “00”-доо л сууна. Цаг ашиглаж ирсэн ч бид хөгжиж чадаж байгаа эсэх нь эргэлзээтэй” байгааг хэлж байлаа.

“ХӨГЖЛИЙН ЗӨРҮҮ”-г хэлэлцэж, хот хөдөөг холбов

  Хувь хүний болон нутаг орны хөгжлийн ялгаа яагаад үүсэв, хэн үүсгэв зэрэг асуултад хариулт эрсэн "Цагийн зөрүү” форум “ХӨГЖЛИЙН ЗӨРҮҮ”  хэлэлцүүлгээр үргэлжилж байна.  Энэ үед улс төрийн намуудын төлөөлөл оролцож, Хөгжлийн зөрүү, ялгааг хэлэлцлээ.

     АН-ын ҮБХ-ны гишүүн О.Батханд “Бид 33 жил нам ярьж ирсэн. Би ч нэг намын төлөөлөл. Гэтэл энэ хугацаанд Монгол Улсад юу болов. Бид 1000 гаруй үйлдвэр, сангийн аж ахуй, түүхий эд бэлтгэлийн баазтай байсан. Гэтэл сүүлийн 4 жилийн хугацаанд буюу 2019-2023 онд цар тахалтай нүүр туллаа. Энэ үед дунджаар нэг хүн өдөрт 3 ширхэг амны хаалт хэрэглэсэн. Өөрөөр хэлбэл, бидний нэг өдрийн хэрэглээ нь 6 сая ширхэг байгаа юм. Бид амны хаалтаа үйлдвэрлэж чаддаг билүү. Мөн бид хоол идсэнийхээ дараа ашигладаг шүдний чигчлүүрээ үйлдвэрлэж чаддаггүй, гаднаас авдаг. 

ОУБ-ын судалгаагаар Монгол Улсын хүн амын 51 хувь нь ядуу гэх дүгнэлт гарсан. Үүнээс гадна оюутан залуус ч орлоготой байхын тулд бааранд ажиллаж байна. Тэнд биш үйлдвэрт ажиллахын хажуугаар дадлага хийж хөгжих ёстой” гэж хэлээд, бодлогын алдаанаас энэ байдал үүссэнийг онцолсон юм.  

Монгол Улсын Үйлчилгээний гавьяат ажилтан Д.Бат-Эрдэнэ “Эдийн засгийн өрсөлдөх чадварын судалгааны төвөөс аймгуудын өрсөлдөх чадварын индексийг гаргадаг. Үүнийг хөгжлийн зөрүүтэй холбож ярихад, Дорнод аймгийг Говь-Алтай аймагтай харьцуулъя. 20-30 мянган хүний зөрүүтэй л болохоос газар нутгийн хэмжээгээр адилхан аймгууд юм. Гэвч дээрх индекст Говь-Алтай аймаг тогтмол доогуур байр эзэлж, Дорнод аймаг дээгүүр байр эзэлдэг. Алтай нутаг бол хил гаальтай гэвэл бий, баялагтай. Хөгжих боломж бүрэн бий” хэмээв. Хөгжихөд дараах ажлыг нэн түрүүнд хийх шаардлагатай гэж үзжээ. Үүнд:

• Барилга, бүтээн байгуулалт, авто зам сайжруулах, ногоон байгууламж бий болгох
• Ажлын байр бий болгож, ажиллах хүчний оролцоог нэмэгдүүлэх
• Бизнес эрхлэгчдээ дэмжиж, төрөөс ирэх татварын дарамтыг багасгах
• Төрийн үйлчилгээг шуурхай, хүнд сурталгүй болгох

 Даяаршил, цахим ертөнцийн нөлөөгөөр дэлхий хавтгай болж, хот хөдөөгийн ялгаа аажмаар арилж байгаа ч баян хоосны, эрүүл болон эрүүл бус хүний, мэдлэг мэдээлэлтэй, эсвэл ажил, мэргэжилгүй хувь хүний ялгаа улам их болж байгааг залуус онцоллоо. 

"ЦАГИЙН ЗӨРҮҮ-2" форум үргэлжилж байна.