Эрдэнэт хотынхон цэцэрлэгт хүрээлэндээ шинээр хэд хэдэн бүтээн байгуулалтыг тусгаж, нийслэлд байрлах хамгийн их ногоон  байгууламжтай газрын нэг Үндэсний цэцэрлэгт хүрээлэнгийн ажлын хамт олноос туршлага судалж байна.

Эрдэнэт хотод 2018 оноос эхлэн цэцэрлэгт хүрээлэн байгуулагдаж,  тус цэцэрлэг хүрээлэн 20 га газрыг хамарч үйл ажиллагаагаа явуулж байна. Энэ удаа Эрдэнэт хотын цэцэрлэгт хүрээлэнгийн ашиглалтын өмнөх захиргааны дарга М.Энхбат тэргүүтэй төлөөллүүд  Үндэсний цэцэрлэгт хүрээлэнтэй ирж танилцлаа. 

Эрдэнэт цэцэрлэгт хүрээлэнгийн ашиглалтын  өмнөх захиргааны дарга М.Энхбат: 

          "Эрдэнэтийн цэцэрлэгт хүрээлэнгийн бүтээн байгуулалтын ажил анх 2018 онд хийгдэж эхэлсэн. Одоогийн УИХ-ын гишүүн Д.Батлут анх Эрдэнэт хотын засаг даргын албан тушаалд томилогдон ажиллаж байхдаа энэ бүхнийг  гүйцэтгэж хийсэн. Эрдэнэтийн цэцэрлэгт хүрээлэнгийн хамрах талбай нь 20 га газар байдаг. Нийт цэцэрлэгт хүрээлэнгийн талбайгаас 10 га газар нь зориулалтайгаар ашиглагдаж байна. Үлдсэн талбайд бүтээн байгуулалт хийхээр ажиллаж байна.

Бид цэцэрлэгт хүрээлэнгийн үлдсэн хэсгийг ирэх 2023 онд ашиглалтад оруулна.  Ардын хувьсгалын 100 жилийн ойн хүрээнд Эрдэнэт хотдоо тэр дундаа цэцэрлэгт хүрээлэндээ шинээр 100 гаруй мянган  мод, бут  суулгасан.

Одоогийн байдлаар таригдах ёстой суулгацын 50 мянга гаруй нь сургууль, цэцэрлэгийн хашаан дотор болон эргэн тойронд нь таригдсан. Мод, бут суулгах ажилд Эрдэнэт хотын иргэд маш их идэвхитэй оролцсон. Мөн бид шинээр хийгдэх гэж буй бүтээн байгуулалтаа дан ганц өөрсдөө мэдэн хийгээгүй.

Үүн дээр иргэдийн санаа бодлыг сонсож, хэрэгжүүлж байгаа. Харин цэцэрлэгт хүрээлэнгийн хувьд шинээр дөрвөн төрлийн 1800 бут , сөөг, ногоон ургамал  шинээр тарьсан.

         "Манай цэцэрлэгт хүрээлэнд хийгдэж буй бүтээн байгуулалтад  улсаас 3.8 тэрбум төгрөгийн хөрөнгө оруулалт хийгдсэн байна. Магад цаашлаад 10 гаруй газарт хүүхдийн парк байгуулах мөн тус талбайд ногоон байгууламж байгуулах төлөв байгаа.

Нийслэлд байрлах Үндэсний  цэцэрлэгт хүрээлэнгийн зохион байгуулалтыг илүү тусгаж харж байгаа. Үндэсний цэцэрлэгт хүрээлэн өөрийн гэсэн онцлогтой. Мөн иргэдэд үйлчлэх талбай нь хэр байх, худалдаа үйлчилгээний газраа яаж байршуулах гэх мэт олон харж судлах зүйл бий. Хүүхэд залуучууд чөлөөт цагаа өнгөрөөх спортын талбайг хэрхэн шийдэх, гарц гаргалгаа гээд олон зүйл байна.
Түүнчлэн бид олон улсын цэцэрлэгт хүрээлэнг давхар судалж үзсэн. Гадаадын томоохон бүтээн байгуулалттай цэцэрлэгт хүрээлэн нь хэд хэдэн зүйлсийг бүтээн байгуулалтадаа тусгаж өгсөн байдаг. Үүнд, устаж үгүй болж буй ургамлыг олноор авчирч тарьж буйгаараа ихээхэн бахархдаг юм билээ. Үүнээс гадна газрын хөрсний судалгаа үргэлжилнэ. Тухайн хөрсөнд ямар бут, ногоон ургамал таривал тохиромжтой вэ гэх мэтээр олон асуудалд дээр нүүр тулж байна" гэлээ. Дэлхийд хэмжээгээрээ  дээгүүрт орох Үндэсний цэцэрлэгт хүрээлэн өдрөөс өдөрт өнгө нэмж бүтээн байгуулалт бусад зүйлсээрээ олон улсаас ялгарах хэд хэдэн шийдлийг харлаа. Мөн  ногоон байгууламжийн асуудлыг бүрэн дүүрэн шийдэж өгсөн байна" хэмээн хэллээ.

“Үндэсний цэцэрлэгт хүрээлэн”ОНӨТҮГ-ын дарга Ү.Оюунзул:

      "Үндэсний цэцэрлэгт хүрээлэн одоогоос  11 жилийн өмнө албан ёсоор байгуулагдсан. Энэ хугацаанд үндэсний цэцэрлэгт хүрээлэнгийн үйл ажиллагаанд зарцуулагдсан улсын төсвөөс тооцоолбол 23 тэрбум орчим төгрөгийн  хөрөнгө оруулалт хийгдсэн. Энэ гол хөрөнгө оруулалт бол Үндэсний цэцэрлэгт хүрээлэнгийн нийт талбайн тохижилтод зарцуулагдсан буюу спорт талбай, төв талбай, дугуйн зам, гүйлтийн зам гэх энэ бүтээн байгуулалтад руу орсон байна.

Үүнээс гадна Үндэсний цэцэрлэгт хүрээлэнд байрлах ногоон байгууламж руу буюу цэцэрлэгт хүрээлэн дээр ургаж буй 140 мянга гаруй 32 төрөл зүйлийн мод тарих энэхүү ажилд орсон байгаа. Үндэсний цэцэрлэгт хүрээлэн нь 30 жилийн хугацаатай томоохон төсөл. 

Үндсэндээ 1/3 хувь буюу 11 жилд төлөвлөгөөт ажил үргэлжилж байна. Үлдсэн жилүүдэд дараа дараагийн төлөвлөгөөний дагуу бүтээн байгуулалт болон ногоон байгууламжын ажил хийгдээд явна.

Үндэсний цэцэрлэгт хүрээлэн өнөөдрийн байдлаар нийслэлд 943 га газрыг эзэлдэг. Үүнээс зөвхөн 183 га газарт бүтээн байгуулалт хийгдсэн.

Эрдэнэт хотын цэцэрлэгт хүрээлэнгийн хамт олон, манай баг хамт олноос туршлага, мэдлэг хуримтлуулах үүднээс ирсэн. Ингээд хоёр талын удирдах алба уулзаж талбай болон  ногоон бүтээн байгуулалттай  танилцлаа.
Бид аливаа зүйлсийг цагаан цаасан дээр буулгах биш, өөр хоорондоо аман хэлэлцээрээр ярилцах биш зөвхөн нүдээрээ үзэж, гараараа барьж, практик тал дээрээ илүү сайн судлах нь зөв хэмээн үзсэн" гэж тэрбээр хэллээ.

Төр.мн