УИХ-аар Гаалийн албан татвараас чөлөөлөх тухай хуулийг өнгөрсөн долоо хоногт баталсан. Энэ хууль ирэх тавдугаар сарын 1-нээс хэрэгжинэ. Өөрөөр хэлбэл, гадаадаас импортоор оруулж ирэх гурилын гаалийн албан татварыг чөлөөлж байгаа юм. Үүнд импортын гурилын хэмжээ, хугацаанд хязгаар тавиагүй.
Хууль батлагдсаны дараа монголчуудын өргөн хэрэглээний гурилын үнэ буурсаар байгаа таатай мэдээ бий. Энэ талаар ШӨХТГ-ын дарга Б.Билгүүн зарим телевизэд өгсөн ярилцлагадаа “Хууль батлагдсаны дараа буюу өнгөрсөн долоо хоногийн баасан гарагаас эхлэн томоохон зах худалдааны төвүүдэд гурилын үнэ 50-100 төгрөгөөр буурсан мэдээлэл бий.
Энэ нь хууль батлагдсантай холбоотойгоор зах зээлд өрсөлдөөн бий болж байна гэсэн үг. Өрсөлдөөн гэдэг нь гадаадын зах зээл дээрээс бараа бүтээгдэхүүн орж ирээд үндэсний үйлдвэрлэгчидтэй өрсөлдөх боломж бий болжээ. Ингэснээр бодит үнэ тогтох боломж бий болсон гэж бид харж байна” гэв.
Гурилын үнэ буурвал нийгэмд, иргэдийн амьдралд олон эерэг нөлөө бий болно. Гурил, гурилан бүтээгдэхүүн нь инфляцийн 30 орчим хувьд нөлөөлдөг. Гурилын үнэ буурснаар инфляц буурна. Цаашлаад Монголбанкны бодлогын хүү ч буурна. Бодлогын хүү буурснаар арилжааны банкны хүү буурах нөхцөл бүрддэг. Тиймээс эдийн засагт эерэг нөлөөлөл үзүүлэх шийдвэрийг иргэд таатай хүлээж байгаа юм.
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
