Онцгой байдлын ерөнхий газраас жил бүр уламжлал болгон зохион байгуулдаг “Онцгой байдлын байгууллагын удирдах ажилтны цугларалт” хоёр дахь өдрөө үргэлжилж байна. Уг арга хэмжээнд Монгол Улсын Шадар сайд С.Амарсайхан оролцож, гурван чиглэлээр үүрэг даалгавар өглөө. 

   Тэрбээр хурлын эхэнд “Үндэсний сөрөн тэсвэрлэх чадавхад дэмжлэг үзүүлэх чиг үүрэг бүхий үндэсний тогтолцоог бий болгох” зорилтыг дэвшүүлж, сөрөн тэсвэрлэх чадавхыг нэмэгдүүлэх, эрсдэлийн удирдлагын реформ хийх арга хэмжээг төлөвлөн, хэрэгжүүлж эхэлснийг мэдэгдлээ.

Мөн ирэх 4 жилд Онцгой байдлын байгууллагын үйл ажиллагааг стандарт, мэдээллийн болон дэвшилтэт технологид тулгуурлан явуулах нөхцөлийг бий болгож, гамшгийн үеийн шуурхай ажиллагааны удирдлага, зохицуулалт, хүч хэрэгслийн чадавхыг сайжруулж, техник, тоног төхөөрөмж, багаж хэрэгслийн хангалтыг нэмэгдүүлж, хөдөлмөрийн аюулгүй байдал, эрүүл ахуйг хангаж, бэлтгэл, бэлэн байдлыг дээшлүүлэх олон зорилт байгааг онцолсон юм. 

   Түүнчлэн 2025 он бол Онцгой байдлын байгууллагын үйл ажиллагаанд стандарт, мэдээллийн технологийн шинэчлэлт хийж, гамшгийн удирдлагын нэгдсэн мэдээллийн санг хөгжүүлэх, алба хаагчдын хөдөлмөрийн аюулгүй байдал, эрүүл ахуй, аюулгүй ажиллагааг сайжруулж, ёс зүй, сахилга хариуцлагыг дээшлүүлэх жил байх болно хэмээн мэдэгдлээ. 
Эдгээрийг бэхжүүлэх хүрээнд Шадар сайд С.Амарсайханы өгсөн үүрэг чиглэлээс онцлон хүргэе.
1.    Онцгой байдлын салбарт технологийн шинэчлэлт хийх, ялангуяа харилцаа холбоо, зарлан мэдээллийн тогтолцоог иж бүрэн шинэчлэх, алба хаагчдын ажиллах нөхцөл, хөдөлмөрийн аюулгүй байдал, эрсдэлгүй ажиллагааг хангахад техник технологийн шинэ боломжуудыг ашиглах, нэвтрүүлэх,

2.    Монгол Улсын Шадар сайд болон Боловсрол, шинжлэх ухааны сайдын хамтарсан тушаалын хэрэгжилтийг хангах, Ерөнхий боловсролын сургуулиудад заадаг “Аюулгүй амьдрах ухаан” сургалтын хөтөлбөрийг хэрэгжүүлэхэд онцгой анхаарч, оюутан, сурагч, хүүхдүүдэд гамшгаас хамгаалах мэдлэг, чадвар олгох ажлыг хэрэгжүүлэх, 
3.    Гамшгаас урьдчилан сэргийлэхэд аж ахуйн нэгжүүдийн оролцоог нэмэгдүүлэх, өмчийн хэлбэр харгалзахгүй аж ахуйн нэгж, байгууллагуудыг сар бүрийн сүүлийн долоо хоногийн “Пүрэв” гарагт хэвлэл мэдээллийн хэрэгслээр урьдчилан сэргийлэх сургалт, сурталчилгааны ажлыг олон нийтэд тогтмол түгээж хэвших, 

4.    Уур амьсгалын өөрчлөлтийн талаарх НҮБ-ын суурин конвенцэд нэгдсэн талуудын COP хурал 2026 онд Монгол Улсад болохтой холбоотой алба хаагчдын гадаад хэл суралцах боломжийг бүх талаар дэмжих,

5.    Гамшгаас хамгаалах, гамшгийн менежментийн чиглэлээр ОХУ, Польш, Турк, Хятад, Солонгос, Япон, Тайланд зэрэг улс орнуудын их дээд сургуулиудад бакалавр, магистрын хөтөлбөрүүдэд суралцах алба хаагчдын тоог нэмэгдүүлэх,

6.    Монгол Улсын Шадар сайдын 2024 оны 12 дугаар сарын 18-ны өдрийн 129  тушаалаар “Онцгой байдлын байгууллагын алба хаагчдыг орон сууцжуулах хөтөлбөр” батлагдсан. Уг хөтөлбөр батлагдсантай холбогдуулан алба хаагчдыг төрөөс хэрэгжүүлж байгаа орон сууцны хөтөлбөрт хамруулах квотыг нэмэгдүүлэх, банк, санхүүгийн байгууллагатай орон сууц худалдан авахад санхүүгийн дэмжлэг, хөнгөлөлт үзүүлэх чиглэлээр хамтрах, орон сууцны хороолол, хотхон байгуулах газар, дэд бүтэц, санхүүжилтийн асуудлыг шийдвэрлэх чиглэлээр засаг захиргаа, нутаг дэвсгэрийн нэгжийн удирдлагатай хамтран ажиллах, өмнө нь энэ чиглэлээр өгөгдсөн үүрэг даалгаврын биелэлтийг хангах; 

7.    Төв, орон нутгийн Онцгой байдлын байгууллагын удирдах бүрэлдэхүүн нэг бүр манлайлах чадвар, ёс зүй, зөв харилцаа, хандлагатай байж, алба хаагчдаа албандаа тогтвор суурьшилтай, урам зоригтой ажиллах итгэл, үнэмшлийг төрүүлж, онцгой албаны нэр хүндийг өргөх, албаны хэмжээнд хөдөлмөрийн аюулгүй байдал, эрүүл ахуй, аюулгүй ажиллагааг сайжруулж, сахилга, хариуцлагыг дээшлүүлэх 

8.    Улсын Онцгой комиссоос гаргасан “Ой, хээрийн гал түймрээс урьдчилан сэргийлэх, тэмцэх арга хэмжээний удирдамж, төлөвлөгөө, албан даалгаврын мөрөөр аймаг, нийслэлийн Онцгой комиссыг хуралдуулж, зардал, хөрөнгийг шийдвэрлүүлэх, бүх шатны Онцгой комисс, төрийн байгууллагын харилцан ажиллагаа, уялдаа холбоог хангаж ажиллах,

9.    Мал, амьтны гоц халдварт өвчнөөс урьдчилан сэргийлэх, аймаг, сумын хэмжээнд шаардагдах малын эм, бэлдмэл, вакцин, халдвар хамгааллын хувцас, халдваргүйтгэлийн багаж, тоног төхөөрөмж, бодисын нөөцийг бүрдүүлэх, отор нүүдэл, малын шилжилт хөдөлгөөнийг дагасан тандалтыг тогтмол хийх;

10.    Гамшгийн нөхцөл байдал үүссэн үед бүх шатны Онцгой комиссыг мэргэжлийн удирдлагаар хангах, Шуурхай штабын үйл ажиллагаанд шаардлагатай мэдээ, мэдээлэл бүрдүүлж, мэдээллийн сан үүсгэх, түүнчлэн нэгдсэн удирдлагаар хангахад ашиглах удирдлагын системийг хөгжүүлэх техник эдийн засгийн үндэслэлийг боловсруулж, системийг хөгжүүлэхэд шаардлагатай хөрөнгө, зардлыг шийдвэрлүүлэх; 

11.    Гамшгийн аюулыг эрт зарлан мэдээлэх нэгдсэн системийг өргөжүүлж, холбоо, мэдээллийн технологи, инновацыг нэвтрүүлэх.  Монгол Улсад тохиолдсон гамшиг, аюулт үзэгдэл, ослын тоо, давтамж, хохирол, өртөнгийг тооцоолон, дата боловсруулалт, шийдвэр гаргалтад дэвшилтэд техник технологийг ашиглан нэвтрүүлэх зэрэг үүрэг даалгаврыг өглөө.